ໜັງສືພິມ ປະຊາຊົນ

ກອງທຶນຮ່ວມໃຈ ປະກອບຊ່ວຍສ້າງໂຮງຮຽນປະຖົມ ບ້ານສາງ 250 ລ້ານກີບ

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 20/02/2020 09:07:49 ຈຳນວນຢ້ຽມຊົມ 1036 ຄັ້ງ

ກອງທຶນຮ່ວມໃຈທະນາ ຄານຮ່ວມພັດທະນາ ໄດ້ມອບເງິນ ຈໍານວນ 250 ລ້ານກີບ ເພື່ອ ປະກອບສ່ວນປຸກສ້າງໂຮງຮຽນ ບ້ານສາງ ເມືອງເຊໂປນ ແຂວງສະຫວັນນະເຂດ ໃນວັນທີ 7 ກຸມພາ 2020 ທີ່ໂຮງແຮມແລນມາກ ນະຄອນຫຼວງວຽງຈັນ ຊຶ່ງ ບ້ານສາງ ມີທີ່ຕັ້ງຫ່າງຈາກເທດ ສະບານ ເມືອງເຊໂປນ 35 km.
ເມືອງເຊໂປນ ມີທັງໝົດ 88 ບ້ານ. ບ້ານສາງ ມີ 45 ຫຼັງ ຄາເຮືອນ, ມີ 59 ຄອບຄົວ, ມີປະ ຊາກອນທັງໝົດ 291 ຄົນ, ຍິງ 145 ຄົນ, ອາຊີບຕົ້ນຕໍແມ່ນເຮັດໄຮ່, ເຮັດສວນ ແລະ ລ້ຽງສັດເປັນສໍາຮອງ, ມີນັກຮຽນທັງໝົດ 41 ຄົນ, ຍິງ 18 ຄົນ ແລະ ມີຄູ 1 ຄົນ ສະພາບໂຮງຮຽນປະຖົມ ແມ່ນມີສະພາບບໍ່ສົມບູນ, ສ້າງຄວາມຫຍຸ້ງຍາກ ໃນການສິດສອນ-ຮໍ່າຮຽນ ແລະ ບໍ່ມີທຶນໃນການປຸກສ້າງໂຮງຮຽນ.
ໃນໂອກາດວັນສະເຫຼີມ ສະຫຼອງ ຄົບຮອບ 30 ປີ ວັນສ້າງ ຕັ້ງທະນາຄານຮ່ວມພັດທະນາ,ທ່ານ ເອກະພັນ ພະພິທັກ ປະທານສະພາບໍລິຫານ ທະນາຄານຮ່ວມພັດທະນາ ໄດ້ມອບເງິນປຸກສ້າງໂຮງຮຽນບ້ານດັ່ງກ່າວ ແລະ ກ່າວຮັບໂດຍ ທ່ານ ຄໍາຫຼ້າ ພົມມີໄຊ ຮອງເຈົ້າເມືອງ ເຊໂປນ. ກອງທຶນຮ່ວມໃຈຂອງທະນາຄານຮ່ວມພັດທະນາ ໄດ້ສ້າງຕັ້ງຂຶ້ນໂດຍ ທ່ານ ເອກະພັນ ພະພິທັກ ເພື່ອຊ່ວຍເຫຼືອສັງຄົມ ກໍ່ຄືນໍາໄປຊ່ວຍເຫຼືອການປຸກສ້າງໂຮງຮຽນ ໃນເຂດຊົນນະບົດຫ່າງໄກສອກຫຼີກ ທີ່ມີຄວາມທຸກຍາກຂາດເຂີນ ອາຄານຮຽນ, ອຸປະກອນ ການສຶກສາ , ໄພ ພິບັດ , ໂລກລະບາດ ແລະ ເຫດ ການອື່ນໆ.
ທະນາຄານຮ່ວມພັດທະ ນາ ໄດ້ຊ່ວຍເຫຼືອ ວຽກງານການພັດທະນາຊັບພະຍາກອນມະນຸດ ແລະ ການຊ່ວຍເຫຼືອດ້ານມະນຸດສະທໍາ ເປັນວຽກງານທີ່ສໍາຄັນ ເພື່ອເປັນການປະກອບສ່ວນທີ່ສໍາຄັນ ໃນການສ້າງສາພັດທະນາ ປະເທດ ຊາດໃຫ້ມີຄວາມຮຸ່ງເຮືອງສີວິໄລ.
(ຂ່າວ : ຄໍາຕົ້ນ ວໍລະຈັກ)