ຫົວ​ຂໍ້ : ລາວ - ຟີລິບປິນ ສືບຕໍ່ສົ່ງເສີມການພົວພັນ ຮ່ວມມືສອງຝ່າຍ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 21/02/2020 08:51:52 ຈຳ​ນວນ​ຜູ້​ເຂົ້າ​ຢ້ຽມ​ຊົມ 748 ຄັ້ງ

  ທ່ານ ສະເຫຼີມ​ໄຊ ກົມ​ມະ​ສິດ ລັດຖະມົນຕີ​ກະຊວງ​ການ​ຕ່າງປະເທດ ແຫ່ງ ສປປ ລາວ ແລະ ທ່ານ ເຕ​ໂຢ​ໂດ​ໂຣ ລ​ັອກ​ຊິນ ຈູ​ເນຍ (TEODORO L. LOCSIN JR) ລັດຖະມົນຕີ​ກະຊວງ​ການ​ຕ່າງປະເທດ ແຫ່ງ ສ. ຟີ​ລິບ​ປິນ ໄດ້​ມີ​ການ​ພົບ​ປະ​ສອງ​ຝ່າຍ ໃນ​ວັນ​ທີ 20 ກຸມພາ​ນີ້ ທີ່​ໂຮງແຮມ​ດອນ​ຈັນ​ພາ​ເລດ.
  ໃນ​ໂອກາດ​ທີ່ ທ່ານ ເຕ​ໂຢ​ໂດ​ໂຣ ລັອກ​ຊິນ ຈູ​ເນຍ ພ້ອມ ດ້ວຍ​ຄະນະ ເດີນທາງ​ເຂົ້າ​ຮ່ວມ ກອງ​ປະຊຸມ​ລັດຖະມົນຕີ​ຕ່າງ ປະເທດ ອາ​ຊຽ​ນ-​ຈີນ ສະໄໝ​ພິເສດ ກ່ຽວ​ກັບການ​ລະບາດ​ຂອງ​ພະຍາດ​ອັກເສບ​ປອດ​ຈາກ​ເຊື້ອ​ຈຸ​ລະ​ໂ​ຣກ​ສາຍ​ພັນ​ໃໝ່ (Covid-19) ໃນ​ລະຫວ່າງ​ວັນ​ທີ 19-21 ກຸມພາ 2020, ທີ່ ນະຄອນຫຼວງ​ວຽງ​ຈັນ.
  ການ​ພົບ​ປະ​ຄັ້ງ​ນີ້ ສອງ​ຝ່າຍ ໄດ້​ສະແດງ​ຄວາມຊົມ ເຊີຍ​ຢ່າງ​ຈິງ​ໃຈ ຕໍ່​ການ​ສະເຫຼີມ ສະຫຼອງ​ສາຍ​ພົວພັນ​ການ​ທູດ ລະຫວ່າງ ລາວ​-​ຟີ​ລິບ​ປິນ ຄົບ ຮອບ 65 ປີ ແລະ ຕີ​ລາຄາ​ສູງຕໍ່​ສາຍ​ພົວພັນ​ມິດຕະພາບ​ອັນ​ຍາວ​ນານແລະ ການ​ຮ່ວມ​ມື​ທີ່​ດີງາມ ລະຫວ່າງ​ສອງ​ປະເທດ ທີ່​ໄດ້​ຮັບ​ການ​ພັດທະນາ ແລະ ຮັດ​ແໜ້ນ​ໃຫ້​ເຂັ້ມແຂງ ຕະຫຼອດ​ໄລຍະ​ເວລາ 6 ທົດ​ສະ​ວັດ​ເຄິ່ງ​ທີ່​ຜ່ານ​ມາ, ຊຶ່ງ​ເຫັນ​ໄດ້​ຈາກ​ການ​ແລກປ່ຽນ​ການ​ຢ້ຽມຢາມ​ຂອງ​ການ​ນຳ​ຂັ້ນ​ສູງ ລະຫວ່າງ​ສອງ​ປະເທດ ຢ່າງ​ເປັນ​ປົກກະຕິ, ໄດ້​ມີ​ການ​ສົ່ງເສີມ​ການ​ຮ່ວມ​ມື ລະຫວ່າງ​ສອງ​ກະຊວງ​ການ​ຕ່າງປະເທດ ແລະ ການ​ຮ່ວມ​ມື​ກັບ​ບັນດາ​ກະຊວງ​ຂະແໜງການ​ຕ່າງໆ ໃນ​ແຕ່​ລະ​ດ້ານເຊັ່ນ: ການ​ຮ່ວມ​ມື​ດ້ານ​ປ້ອງ​ການ​ຊາດ​-​ປ້ອງ​ກັນ​ຄວາມ​ສະຫງົບ, ດ້ານ​ເສດຖະກິດ​ການ​ຄ້າ ແລະ ການ​ລົງທຶນ, ດ້ານ​ການ​ສຶກສາ ແລະ ພັດທະນາ​ຊັບພະຍາກອນ​ມະນຸດ, ດ້ານ​ວັດທະນະທຳ ແລະ ທ່ອງ​ທ່ຽວ, ການ​ຮ່ວມ​ມື​ຕ້ານ​ການ​ຄ້າຂາຍ​ຢາ​ເສບ​ຕິດ​ຜິດ​ກົດໝາຍ ແລະ ດ້ານ​ອື່ນໆ. ພ້ອມ​ນີ້, ທັງ​ສອງ​ຝ່າຍ ຍັງ​ໄດ້​ປຶກສາ​ຫາລື ແລະ ວາງ​ທິດ​ທາງ​ເຮັດ​ວຽກ​ຮ່ວມ​ກັນ​ໃນຕໍ່ໜ້າ ເພື່ອ​ກະກຽມ​ໃຫ້​ແກ່ ກອງ​ປະຊຸມ​ຄະ​ນະ​ກໍາ​ມາ​ທິ​ການ​ຮ່ວມ ວ່າ​ດ້ວຍ​ການ​ຮ່ວມ​ມື​ສອງ​ຝ່າຍ ລາວ​-​ຟີ​ລິບ​ປິນ ຄັ້ງ​ທີ 2 ຊຶ່ງ​ແນໃສ່​ສົ່ງເສີມ​ການ​ຮ່ວມ​ມື ລະຫວ່າງ​ສອງ​ປະເທດ ໃຫ້​ແໜ້ນ​ແຟ້ນ ແລະ ຂະຫຍາຍຕົວ​ຍິ່ງໆ​ຂຶ້ນ. ນອກຈາກ​ນີ້, ສອງ​ຝ່າຍ ຍັງ​ໄດ້​ແລກປ່ຽນ​ທັດສະນະ ກ່ຽວ​ກັບ ສະພາບ​ການ​ພາກ​ພື້ນ ແລະ ສາກົນ ທີ່​ສອງ​ຝ່າຍ​ມີ​ຄວາມ​ສົນ​ໃຈ.
  ໃນ​ໂອກາດ​ດັ່ງກ່າວ, ທ່ານ ສະເຫຼີມ​ໄຊ ກົມ​ມະ​ສິດ ໄດ້ສະແດງ​ຄວາມ​ຍິນດີ​ເປັນ​ຢ່າງ​ຍິ່ງ ທີ່​ໄດ້​ຕ້ອນຮັບ ທ່ານ ເຕ​ໂຢ​ໂດ​ໂຣ ລ​ອັກ​ຊິນ ຈູ​ເນຍ ພ້ອມ​ດ້ວຍ​ຄະນະ ໃນ​ໂອກາດ​ເດີນທາງ​ມາ​ເຂົ້າ​ຮ່ວມ​ກອງ​ປະຊຸມ​ດັ່ງກ່າວ, ພ້ອມ​ທັງ​ສະແດງ​ຄວາມ​ຊົມເຊີຍ ຕໍ່​ຜົນ​ສໍາ​ເລັດ​ໃນ​ການ​ເປັນ​ເຈົ້າພາບ​ຈັດ​ງານ​ມະ​ຫາ​ກໍາ​ກິລາ​ຊີເກມ ຄັ້ງ​ທີ 30 ທີ່​ຜ່ານ​ມາ ດ້ວຍ​ຜົນ​ສໍາ​ເລັດ​ຢ່າງ​ຈົບງາມ ຊຶ່ງ​ເຈົ້າພາບ​ຟີ​ລິບ​ປິນ ສາມາດ​ເປັນ​ເຈົ້າ​ຫຼຽນ​ຄໍາ​ໃນ​ງານ​ມະ​ຫະ​ກໍາ​ກິລາ​ຊີເກມຄັ້ງ​ນີ້. ພ້ອມ​ນີ້, ຍັງ​ສະແດງ​ຄວາມ​ຂອບໃຈ ມາ​ຍັງ​ລັດຖະບານ ແລະ ປະຊາຊົນ ຟີ​ລິບ​ປິນ ທີ່​ໄດ້​ໃຫ້ການ​ຕ້ອນຮັບ​ອັນ​ອົບ​ອຸ່ນ ແລະ ອໍາ​ນວຍ​ຄວາມ​ສະດວກ ໃຫ້​ແກ່​ຄະນະ​ຜູ້​ແທນ ແລະ ນັກ​ກິລາ ຈາກ ສປປ ລາວ. ໃນ​ຕອນ​ທ້າຍ, ທ່ານ ສະເຫຼີມ​ໄຊ ກົມ​ມະ​ສິດ ກໍ​ໄດ້​ອວຍພອນ​ໃຫ້ ທ່ານ ເຕ​ໂຢ​ໂດ​ໂຣ ລ​ອັກ​ຊິນ ຈູ​ເນຍ ພ້ອມ​ດ້ວຍ​ຄະນະ ຈົ່ງປະສົບ​ຜົນ​ສໍາ​ເລັດ ໃນ​ການ​ເຂົ້າ​ຮ່ວມກອງ​ປະຊຸມ​ອາ​ຊຽ​ນ-​ຈີນ ສະໄໝ​ພິເສດ ຢ່າງ​ຈົບ​ງາມ.
  ໃນ​ໂອກາດ​ດຽວ​ກັນ, ທ່ານ ເຕ​ໂຢ​ໂດ​ໂຣ ລ​ອັກ​ຊິນ ຈູ​ເນຍ ກໍ​ໄດ້​ສະແດງ​ຄວາມ​ຂອບໃຈ​ເປັນ​ຢ່າງ​ສູງ ມາ​ຍັງ​ລັດຖະບານ ແຫ່ງ ສປປ ລາວ ກໍ​ຄືກະຊວງ​ການ​ຕ່າງປະເທດ ທີ່​ໄດ້​ໃຫ້ການ​ຕ້ອນ​ຮັບ​ຢ່າງ​ອົບ​ອຸ່ນ ໃນ​ການ​ເຂົ້າ​ຮ່ວມ​ກອງ​ປະຊຸມ​ອາ​ຊຽ​ນ-​ຈີນ ສະໄໝ​ພິເສດ ໃນ​ຄັ້ງ​ນີ້ ແລະ ອວຍພອນ​ໃຫ້ ສປປ ລາວ ໄດ້​ຮັບ​ຜົນສຳເລັດ​ຢ່າງ​ຈົບງາມ ໃນ​ການ​ເປັນ​ເຈົ້າພາບ​ຈັດ​ກອງ​ປະຊຸມ​ຕ່າງໆ.
    ໃນ​ຕອນ​ບ່າຍ​ຂອງ​ວັນ​ດຽວ​ກັນ, ທ່ານ ເຕ​ໂຢ​ໂດ​ໂຣ ລ​ອັກ​ຊິນ ຈູ​ເນຍ ຍັງ​ໄດ້​ນຳພາ​ຄະນະ ເດີນທາງ​ເຂົ້າ​ຢ້ຽມ​ຂໍ່າ​ນັບ ການ​ນຳ​ຂັ້ນ​ສູງ​ຂອງ​ລາວ​ເຮົາ​ຈຳ​ນວນ​ໜຶ່ງອີກ​ດ້ວຍ.
(ຂ່າວ: ກະຊວງ​ການ​ຕ່າງ​ປະ​ເທດ​-​ພາບ: ສຸກ​ສະຫວັນ)
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110