ຫົວ​ຂໍ້ : ຜົນກອງປະຊຸມລັດຖະມົນຕີຕ່າງປະເທດ ແມ່ນຳ້ຂອງແມ່ນຳ້ລ້ານຊ້າງ ຄັ້ງທີ 5

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 21/02/2020 08:55:58 ຈຳ​ນວນ​ຜູ້​ເຂົ້າ​ຢ້ຽມ​ຊົມ 1016 ຄັ້ງ

  ສປປ ລາວ ໄດ້​ເປັນ​ເຈົ້າພາບ​ຈັດ​ກອງ​ປະຊຸມ​ລັດ ຖະມົນຕີ​ຕ່າງປະເທດ ແມ່​ນໍ້າ​ຂອງ​-​ແມ່​ນໍ້າ​ລ້ານ​ຊ້າງ ຄັ້ງ​ທີ 5 ຈັດ​ຂຶ້ນ​ໃນ​ວັນ​ທີ 20 ກຸມພາ​ນີ້ ທີ່ນະຄອນຫຼວງ​ວຽງ​ຈັນ  ໂດຍ​ການ​ເປັນ​ປະທານ​ຮ່ວມ​ລະຫວ່າງ ທ່ານ ສະເຫຼີມ​ໄຊ ກົມ​ມະ​ສິດ ລັດຖະມົນຕີ​ກະຊວງ​ການ​ຕ່າງປະເທດ ແຫ່ງ ສປປ ລາວ ແລະ ທ່ານ ຫວາງ ອີ້ ທີ່​ປຶກສາ​ແຫ່ງ​ລັດ ລັດຖະມົນຕີ ກະຊວງ​ການ​ຕ່າງປະເທດ   ສປ ຈີນ ແລະ ບັນດາ​ຄະນະ​ຜູ້​ແທນ ຈາກ​ປະເທດ​ສະມາຊິກ ເຂົ້າ​ຮ່ວມ​ຢ່າງ​ພ້ອມ​ພຽງ. 
  ກອງ​ປະຊຸມ​ຄັ້ງ​ນີ້ ໄດ້​ທົບ​ທວນຄືນ​ຜົນ​ການ​ຮ່ວມ​ມື​ຂອບ​ການ​ຮ່ວມ​ມື ແມ່​ນໍ້າ​ຂອງ​-​ແມ່​ນໍ້າ​ລ້ານ​ຊ້າງ ໃນ​ໄລຍະ​ຜ່ານ​ມາ ໂດຍ​ສະເພາະແມ່ນ​ການຈັດຕັ້ງ​ປະຕິບັດ​ຖະແຫຼງການ​ຊານ​ຢາ ກອງ​ປະຊຸມ​ຜູ້​ນໍາ ແມ່​ນໍ້າ​ຂອງ​-​ແມ່​ນໍ້າ​ລ້ານ​ຊ້າງ​ຄັ້ງ​ທີ 1, ຖະແຫຼງການ​ພະນົມ​ເປັນ ກອງ​ປະຊຸມ​ຜູ້​ນໍາ ແມ່​ນໍ້າ​ຂອງ​-​ແມ່​ນໍ້າ​ລ້ານ​ຊ້າງ ຄັ້ງ​ທີ 2 ແລະ ແຜນ​ປະຕິບັດ​ງານ 5 ປີ (2018-2022) ຂອງ​ຂອບ​ການ​ຮ່ວມ​ມື​ແມ່​ນໍ້າ​ຂອງ​-​ແມ່​ນຳ​້ລ້ານ​ຊ້າງ ​ຊຶ່ງ​ກອງ​ປະຊຸມ​ຕີ​ລາຄາ​ວ່າ ຂອບ​ການ​ຮ່ວມ​ມື​ດັ່ງກ່າວ ໄດ້​ມີ​ທ່າ​ກ້າວ​ຂະຫຍາຍຕົວ​ຢ່າງ​ໄວວາ​ໄປສູ່​ ລວງ​ກວ້າງ ແລະ ລວງ​ເລິກ ພາຍ​ໃຕ້ 3 ເສົາ​ຄໍ້າ ຂອງ​ການ​ຮ່ວມ​ມື ກໍ​ຄື 5 ຂົງເຂດ​ບຸລິ​ມະ​ສິດ (ການ​ເຊື່ອມ​ຈອດ, ຄວາມ​ອາດ​ສາມາດ​ດ້ານ​ການ​ຜະລິດ, ການ​ຮ່ວມ​ມື​ດ້ານ​ເສດຖະກິດ​ຂ້າມ​ຊາຍ​ແດນ, ການ​ຄຸ້ມ​ຄອງ​ຊັບ​ພະຍາ​ກອນ​ນຳ້ ແລະ ກະ​ສິ​ກໍາ ແລະ ການ​ຫຼຸດຜ່ອນ​ຄວາມທຸກ​ຍາກ) ​ຊຶ່ງມັນ​ສະແດງ​ອອກ​ຢູ່​ບ່ອນ​ວ່າ ນັບ​ແຕ່​ມີ​ການ​ສ້າງຕັ້ງ​ຂອບ​ການ​ຮ່ວມ​ມື​ດັ່ງກ່າວ​ໃນ​ປີ 2016 ເປັນຕົ້ນ​ມາ, ບັນດາ​ປະເທດ​ສະມາຊິກ ໄດ້​ມີ​ການ​ສ້າງຕັ້ງ​ກອງ​ເລຂາ​ປະສານ​ງານ ແລະ ສູນ​ຄົ້ນຄວ້າ​ແມ່​ນໍ້າ​ຂອງ​ສາກົນ​ຂອງ​ແຕ່​ລະ​ປະເທດ​ຂຶ້ນ, ໄດ້​ມີ​ການ​ຍົກ​ລະດັບ​ກົນ​ໄກ​ການ​ຮ່ວມ​ມື​ໃນ​ຂົງເຂດ​ການ​ຄຸ້ມ​ຄອງ​ຊັບ​ພະຍາ​ກອນ​ນໍ້າ ຈາກ​ໜ່ວຍ​ງານ​ວິຊາ​ການໄປ​ສູ່​ລະດັບ​ກອງ​ປະຊຸມ​ລັດຖະມົນຕີ​ດ້ານ​ຊັບ​ພະຍາ​ກອນນຳ້  ໃນ​ເດືອນທັນວາ  2019.  ຂອບ​ການ​ຮ່ວມ​ມືແມ່​່​ນຳ້​​ຂອງ​-​ແມ່​່​ນຳ້​ລ້ານ​ຊ້າງ ໄດ້​ສ້າງຕັ້ງ​ກອງ​ທຶນ​ພິເສດ ແມ່​ນຳ້​ຂອງ​-​ແມ່​່​ນຳ້​​ລ້ານ​ຊ້າງ ຂຶ້ນ​ໃນ​ປີ 2017 ​ຊຶ່ງ ສປ ຈີນ ໄດ້​​ປະກອບ​​ສ່ວນ​ເຂົ້າ​ໃນ​ກອງ​ທຶນ​ດັ່ງກ່າວ 300 ລ້ານ​ໂດ​ລາ​ ເພື່ອ​ຈັດ​ຕັ້ງ​ປະຕິບັດ​ບັນດາ​ໂຄງການ​ຮ່ວມ​ມື​ຕ່າງໆ ​ໃນ​ປະເທດ​ສະມາຊິກແມ່​່​ນຳ້​​ຂອງ​-​ແມ່​່​ນຳ້​​ລ້ານ​ຊ້າງ ໃນໄລຍະ​ເວລາ 5 ປີ (2017-2022) ມາ​ຮອດ​ປັດຈຸ​ບັນ​ມີ​ຫຼາຍ​ກວ່າ 300 ໂຄງການ (ນັບ​ແຕ່​ປີ 2017-2019) ທີ່​ໄດ້​ຮັບ​ການຈັດຕັ້ງ​ປະຕິບັດ​ຢູ່​ໃນ 6 ປະເທດ​ສະ ມາຊິກ ຊຶ່ງ​ໄດ້​ປະກອບ​ສ່ວນ​ສໍາ​ຄັນ​ເຂົ້າ​ໃນ​ການ​ພັດທະນາ​ເສດ​ຖະ​ກິດ​-​ສັງຄົມ​ໃນ​ພາກ​ພື້ນ​ແມ່​ນໍ້າ​ຂອງ ຢ່າງ​ເປັນ​ຮູບ​ປະ​ທໍາ ແລະ ມີ​ໝາກ​ຜົນ. ໃນ​ນັ້ນ​ມີ 36 ໂຄງການ​ທີ່​ກໍາ​ລັງ​ຖືກ​ຈັດ​ຕັ້ງ​ປະຕິບັດ​ຢູ່ ສປປ ລາວ ອັນ​ພົ້ນ​ເດັ່ນແມ່ນ​ໂຄງການ​ພັດທະນາ​ຊົນນະບົດ ແລະ ຫຼຸດຜ່ອນ​ຄວາມທຸກ​ຍາກ ລວມ​ມູນ​ຄ່າ 33 ລ້ານ​ຢວນ ຫຼື ປະມານ 42 ຕື້​ກີບ, ໂຄງການ​ປິ່ນປົວ​ແກ່ນ​ຕາ​ຂຸ້ນ​ບໍ່​ເສຍ​ຄ່າ ໂດຍ​ແພດ​ຊ່ຽວຊານ ຈາກ ສປ ຈີນ ທີ່​ເດີນທາງ​ມາ​ໃຫ້ການ​ກວດ​ຮັກສາ​ຢູ່ ສປປ ລາວ ແລະ ໂຄງການ​ສ້າງ​ຄວາມ​ອາດ​ສາມາດ ໃຫ້​ແກ່​ພະນັກງານ​ທີ່​ຕິດ​ພັນ​ກັບ 5 ຂົງເຂດ​ບຸ​ລິ​ມະ​ສິດຂອງ​ການ​ຮ່ວມ​ມື. 
  ນອກຈາກ​ນັ້ນ, ກອງ​ປະ ຊຸມ​ຍັງ​ໄດ້​ປຶກສາ​ຫາລື ທິດ​ທາງ​ຮ່ວມ​ມື​ໃນຕໍ່ໜ້າ ເພື່ອ​ເພີ່ມ​ທະວີ​ຂອບ​ການ​ຮ່ວມ​ມື​ແມ່​່​ນຳ້​​ຂອງ​-​ແມ່​່​ນຳ້​​ລ້ານ​ຊ້າງ ກ້າວ​ໄປ​ສູ່ລວງ​ ເລິກ ແລະ ລວງ​ກວ້າງກໍ​ຄື​ການ​ຂະຫຍາຍ​ການ​ຮ່ວມ​ມື​ໄປ​ສູ່​ຂົງເຂດ​ອື່ນໆ​ທີ່​ເຫັນ​ວ່າ ມີ​ຄວາມ​ຈໍາ​ເປັນ ແລະ ເໝາະ​ສົມເຊັ່ນ: ຂົງເຂດສາທາລະນະ​ສຸກ ແລະ ສຶກສາ ເປັນ​ຕົ້ນ  ພ້ອມ​ດຽວ​ກັນ​ນີ້, ສປ ຈີນ ກໍ​ໄດ້​ປະກາດ​ອະນຸມັດ​ໂຄງການ​ງວດ​ໃໝ່ປະ ​ຈໍາ​ປີ 2020 ພາຍ​ໃຕ້​ກອງ​ທຶນ ​ພິເສດ ແມ່​່​ນຳ້​​ຂອງ​-​ແມ່​່​ນຳ້​​ລ້ານ ​ຊ້າງ ອີກຈໍາ​ນວນ 152 ໂຄງ ການ ເພື່ອ​ສືບຕໍ່​ຈັດ​ຕັ້ງ​ປະຕິບັດ ຢູ່​ບັນດາ​ປະເທດ​ສະ​ມາ​ຊິກ.
  ກອງ​ປະຊຸມ​ຄັ້ງ​ນີ້ ຍັງໄດ້​ ຮັບຮອງ​ເອົາ​ຖະແຫຼງຂ່າວ​ຮ່ວມ ​ກອງ​ປະຊຸມ​ລັດຖະມົນຕີ​ຕ່າງ ປະເທດ ແມ່​່​ນຳ້​​ຂອງ​-​ແມ່​່​ນຳ້​​ລ້ານ​ຊ້າງ ຄັ້ງ​ທີ 5 ແລະ ຮັບ​ຊາບ​ເອກະສານ​ແນບ​ທ້າຍ 3 ສະບັບ ເພື່ອ​ເປັນ​ບ່ອນ​ອີງ​ໃຫ້​ແກ່​ການ​ຮ່ວມ​ມື​ໃນ​ຕໍ່​ໜ້າ.
  ຂອບ​ການ​ຮ່ວມ​ມື ແມ່​່​ນຳ້​ຂອງ​-​ແມ່​່​ນຳ້​​ລ້ານ​ຊ້າງ ໄດ້​ຖືກ​ສ້າງຕັ້ງ​ຂຶ້ນ​ໃນ​ປີ 2016 ຜ່ານ​ມາ​ໂດຍ​ມີ 6 ປະເທດ​ສະມາຊິກ​ຄື: ກໍາ​ປູ​ເຈຍ, ລາວ, ມຽນ​ມາ, ໄທ, ຫວຽດນາມ ແລະ ສປ ຈີນ ຊຶ່ງ​ກອງ​ປະຊຸມ​ລະດັບ​ລັດຖະມົນຕີ​ຕ່າງປະເທດ ແມ່ນ​ຖືກ​ຈັດ​ຂຶ້ນ​ທຸກໆ​ປີ ແລະ ກອງ​ປະຊຸມ​ຜູ້​ນໍາ​ແມ່​ນຳ້​​ຂອງ​-​ແມ່​​ນຳ້​​ລ້ານ ຊ້າງ ແມ່ນ​ຈັດ​ຂຶ້ນ​ທຸກໆ 2 ປີ. ໃນ​ຕົ້ນປີ 2018 ສປປ ລາວ ໄດ້​ຮັບ​ໜ້າທີ່​ຕໍ່​ຈາກ ກໍາ​ປູ​ເຈຍ ໃນ​ການ​ເປັນ​ປະທານ​ຮ່ວມກັບ ສປ ຈີນ ໄລຍະ​ປີ 2018-2020 ແລະ ໃນ​ລະຫວ່າງການເປັນ​ປະທານ​ຮ່ວມ ສປປ ລາວ ໄດ້​ເປັນ​ເຈົ້າພາບ​ຈັດ​ກອງ​ປະຊຸມ​ລັດຖະມົນຕີ​ຕ່າງປະເທດແມ່​່ນຳ້​​ຂອງ​-​ແມ່​່​ນຳ້​ລ້ານ​ຊ້າງ ຄັ້ງ​ທີ  4  ໃນ​ທ້າຍ​ປີ 2018 ທີ່ນະຄອນ- ຫຼວງ​ພະ​ບາງ ແລະ ຄັ້ງ​ທີ 5 ໃນ​ປີ 2020 ທີ່ນະຄອນຫຼວງ​ວຽງ​ຈັນ ເພື່ອ​ກະກຽມ​ໃຫ້​ແກ່​ການ​ເປັນ​ເຈົ້າພາບ​ຈັດ​ກອງ​ປະຊຸມ​ຜູ້​ນໍາ ແມ່​ນຳ້​​ຂອງ​-​ແມ່​ນຳ້​​ລ້ານຊ້າງ ຄັ້ງ​ທີ 3 ໃນ​ທ້າຍ​ເດືອນມີນາ 2020 ແລະ ຈະ​ໄດ້​ສົ່ງ​-​ມອບ​ໜ້າທີ່ ໃຫ້ ມຽນ​ມາ ເປັນ​ປະທານ​ຮ່ວມ​ກັບ ສປ ຈີນ ຕໍ່​ໄປ. 
(ຂ່າວ: ກະຊວງ​ການ​ຕ່າງ​ປະ​ເທດ​-​ພາບ: ສຸກ​ສະຫວັນ)
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110