ຫົວ​ຂໍ້ : ລາວ ເປັນເຈົ້າພາບຈັດກອງປະຊຸມລັດຖະມົນຕີຕ່າງປະເທດອາຊຽນ-ຈີນ ສະໄໝພິເສດກ່ຽວກັບໄວຣັດໂຄໂຣນາ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 21/02/2020 08:59:07 ຈຳ​ນວນ​ຜູ້​ເຂົ້າ​ຢ້ຽມ​ຊົມ 862 ຄັ້ງ

  ສປປ  ລາວ ໄດ້​ເປັນ​ເຈົ້າພາບ​ຈັດ​ກອງ​ປະຊຸມ​ລັດຖະມົນຕີ​ຕ່າງປະເທດ​ອາ​ຊຽ​ນ-​ຈີນ ສະໄໝ​ພິເສດກ່ຽວ​ກັບການ​ແຜ່​ລະບາດ​ຂອງ​ພະຍາດ​ອັກເສບ​ປອດ​ຈາກ​ເຊື້ອ​ຈຸ​ລະ​ໂຣກ​ສາຍ​ພັນ​ໃໝ່ (Special ASEAN-China Foreign Ministers’ Meeting on Coronavirus Disease (COVID-19) ໃນ​ວັນ​ທີ 20 ກຸມພາ 2020 ທີ່ໂຮງແຮມດອນ​ຈັນພາ​ເລດ, ນະຄອນຫຼວງ​ວຽງ​ຈັນ​ພາຍ​ໃຕ້​ການ​ເປັນ​ປະທານ​ຮ່ວມ​ຂອງ ທ່ານ ເຕ​ໂຢ​ໂດ​ໂຣ ລ​ອັກ​ຊິນ ຈູ​ເນຍ (Teodoro L. Locsin Jr) ລັດຖະມົນຕີ​ຕ່າງປະເທດ ແຫ່ງ ສາທາລະນະ​ລັດ ຟີ​ລິບ​ປິນ ແລະ ທ່ານ ຫວາງ ອີ້ (Wang Yi) ທີ່​ປຶກສາ​ແຫ່ງ​ລັດ ທັງ​ເປັນ​ລັດຖະມົນຕີ​ຕ່າງປະເທດ ແຫ່ງ ສປ ຈີນ. ສຳລັບ​ຄະນະ​ຜູ້​ແທນ ສປປ ລາວ ເຂົ້າ​ຮ່ວມ​ກອງ​ປະຊຸມ​ຄັ້ງ​ນີ້ ນຳ​ໂດຍ ທ່ານ ສະເຫຼີມ​ໄຊ ກົມ​ມະ​ສິດ ລັດຖະມົນຕີ​ຕ່າງປະເທດ ແຫ່ງ ສປປ ລາວ ແລະ ຍັງ​ມີ​ບັນດາ​ລັດຖະມົນຕີ​ຕ່າງປະເທດ​ອາ​ຊຽນ ແລະ ເລຂາທິການ​ໃຫຍ່​ອາ​ຊຽນ ພ້ອມ​ດ້ວຍ​ພະນັກງານ​ວິຊາ​ການ​ກ່ຽວ ຂ້ອງເຂົ້າ​ຮ່ວມ. 
  ກອງ​ປະຊຸມ​ຄັ້ງ​ນີ້ ບັນດາ​ລັດຖະມົນຕີ​ຕ່າງປະເທດ​ອາ​ຊຽນ ໄດ້​ສະແດງ​ຄວາມ​ເຫັນ​ອົກ​ເຫັນໃຈ ແລະ ຕີ​ລາຄາ​ສູງ ຕໍ່​ມາດ​ຕະການ ກໍ​ຄື​ຄວາມ​ພະຍາຍາມ​ຂອງ​ລັດຖະບານ ສປ.ຈີນ ໃນ​ການ​ຕ້ານ ແລະ ຮັບ​ມື​ກັບ​ເຊື້ອ​ພະຍາດ​ດັ່ງກ່າວ ແລະ ເຊື່ອ​ໝັ້ນ​ວ່າ ລັດຖະບານ ກໍ​ຄື​ປະຊາຊົນ​ຈີນ ຈະ​ສາມາດ​ຜ່ານ​ຜ່າ​ຄວາມ​ຫຍຸ້ງຍາກ​ໃນ​ຄັ້ງ​ນີ້​ໄດ້​ຢ່າງ​ແນ່​ນອນ. ກອງ​ປະຊຸມ​ຄັ້ງ​ນີ້​ໄດ້​ປຶກສາ​ຫາລື ແລະ ແລກປ່ຽນ ຄຳ​ຄິດ​ຄຳ​ເຫັນ ລວມ​ທັງ​ຖອດ​ຖອນ​ບົດຮຽນ​ທີ່​ດີ​ຮ່ວມ​ກັນ​ໃນ​ການ​ຊອກ​ຫາ​ຊ່ອງ​ທາງ, ກຳນົດ​ມາດ​ຕະການ ແລະ ຮ່ວມ​ມື​ກັນ ເພື່ອ​ປ້ອງ​ກັນ, ຮັບ​ມື ແລະ ສະກັດ​ກັ້ນ​ການ​ແຜ່​ລະບາດ​ຂອງ​ພະຍາດ​ອັກເສບ​ປອດ​ຈາກ​ເຊື້ອ​ຈຸ​ລະ​ໂຣກ​ສາຍ​ພັນ​ໃໝ່​ນີ້. ພິເສດ​ກອງ​ປະຊຸມ​ໄດ້​ຮັບຮອງ​ເອົາ​ຖະແຫຼງການ​ກອງ​ປະຊຸມ ໃນ​ການ​ຕ້ານ ແລະ ຮັບ​ມື​ກັບ​ການ​ແຜ່​ລະບາດ​ຂອງ​ພະຍາດ​ດັ່ງກ່າວ (Statement of the Special ASEAN-China Foreign Minsters’ Meeting on Coronavirus Disease (COVID-19)) ແລະ ໄດ້​ມອບ​ໝາຍ​ໃຫ້ ຂະແໜງການ​ກ່ຽວຂ້ອງ​ນຳໄປ​ຜັນ​ຂະຫຍາຍ​ໃນ​ລາຍ​ລະອຽດ​ຕໍ່​ໄປ.
  ກ່ອນ​ກອງ​ປະຊຸມ​ລັດຖະ ມົນຕີ​ຕ່າງປະເທດ ອາ​ຊຽ​ນ-​ຈີນ ສະໄໝ​ພິເສດ​ນີ້, ພາຍ​ໃນ​ອາ​ຊຽນ​ເອງ ກໍ​ໄດ້​ຈັດ​ກອງ​ປະຊຸມ​ສະພາ ປະສານ​ງານ​ອາ​ຊຽນ ສະໄໝ​ພິເສດ (Special Meeting of the ASEAN Coordinating Council (ACC)) ກ່ຽວ​ກັບ ການ​ແຜ່​ລະບາດ​ຂອງ COVID-19 ພາຍ​ໃຕ້​ການ​ເປັນ​ປະທານ​ຂອງ ທ່ານ ຟ້າມ ບິ່ງ ມິງ ຮອງ​ນາຍົກລັດຖະມົນຕີ, ລັດຖະມົນຕີ​ກະຊວງ​ການ​ຕ່າງປະເທດ ສສ ຫວຽດນາມ ໃນ​ຖານະ​ປະທານ​ໝູນວຽນ ອາ​ຊຽນ ປີ 2020 ໂດຍ​ມີ​​ບັນດາ​ລັດຖະມົນຕີ​ຕ່າງປະເທດ​ອາ​ຊຽນ ແລະ ເລຂາທິການ​ໃຫຍ່​ອາ​ຊຽນ​ເຂົ້າ​ຮ່ວມ. ກອງ​ປະຊຸມ​ໄດ້​ທົບ​ທວນຄືນ​ຄວາມ​ພະຍາຍາມ​ຂອງ​ອາ​ຊຽນ ໃນ​ການ​ປ້ອງ​ກັນ, ແກ້​ໄຂ ແລະ ຮັບ​ມື​ກັບ​ພະຍາດ COVID-19 ແລະ ໄດ້​ກໍາ​ນົດ​ທິດ​ທາງ​ໃນ​ຕໍ່​ໜ້າ.
  ທ່ານ ລັດຖະມົນຕີ ສະເຫຼີມ​ໄຊ ກົມ​ມະ​ສິດ ໃນ​ຖານະ​ເປັນ​ເຈົ້າພາບ​ກອງ​ປະຊຸມ ໄດ້​ປະກອບ​ຄຳ​ຄິດ​ຄຳ​ເຫັນ ແລະ ແລກປ່ຽນ​ບົດຮຽນ​ທີ່​ດີ ໃນ​ຄວາມ​ພະຍາຍາມ​ຂອງ ສປປ ລາວ ໃນ​ການ​ປ້ອງ​ກັນ, ສະກັດ​ກັ້ນ ແລະ ຮັບ​ມື​ກັບ​ການ​ແຜ່​ລະບາດ​ຂອງ​ພະຍາດ​ອັກເສບ​ປອດ​ຈາກ​ເຊື້ອ​ຈຸ​ລະ​ໂຣກ​ສາຍ​ພັນ​ໃໝ່​ດັ່ງກ່າວ​ຕໍ່​ທີ່​ປະຊຸມ​ໄດ້​ຮັບ​ຊາບ. ກອງ​ປະຊຸມ​ສະພາ​ປະສານ​ງານ​ອາ​ຊຽນ ສະໄໝ​ພິເສດ ແລະ ກອງ​ປະຊຸມ​ລັດຖະມົນຕີ​ຕ່າງປະເທດ ອາ​ຊຽ​ນ-​ຈີນ ສະໄໝ​ພິເສດ​ຄັ້ງ​ນີ້ ໄດ້​ສິ້ນ​ສຸດ​ລົງ​ດ້ວຍ​ຜົນສຳເລັດ​ອັນ​ຈົບງາມ ຊຶ່ງ​ສະແດງ​ອອກ​ໃນ​ການ​ມີ​ບົດບາດ ແລະ ປະ ກອບສ່ວນ​ຢ່າງ​ຫ້າວຫັນ​ຂອງ ສປປ ລາວ.
(ຂ່າວ: ກະຊວງ​ການ​ຕ່າງ​ປະ​ເທດ​-​ພາບ: ສຸກ​ສະຫວັນ)
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110