ໜັງສືພິມ ປະຊາຊົນ

ຫົວຂໍ້ : ກອງປະຊຸມວົງແຄບ ADMM ອອກຖະແຫຼງການຮ່ວມ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 21/02/2020 09:21:03 ຈຳນວນຜູ້ເຂົ້າຢ້ຽມຊົມ 490 ຄັ້ງ

ວິທະຍຸກະຈາຍສຽງຫວຽດ ນາມລາຍງານວ່າ: ໃນກອງປະຊຸມວົງແຄບ ADMM ຄັ້ງນີ້, ບັນດາປະເທດ ໄດ້ອອກຖະແຫຼງການຮ່ວມກ່ຽວກັບການຮ່ວມມືດ້ານປ້ອງກັນຊາດ  ຮັບມືກັບໄພຂົ່ມຂູ່ຄວາມໝັ້ນຄົງແບບໃໝ່ ໃນໄລຍະເກີດໂຣກລະບາດ Covid -19.
ປະຕິບັດໂຄງການ ປີເປັນປະທານອາຊຽນ 2020, ວັນທີ 19 ກຸມພາຜ່ານມາ, ຢູ່ນະຄອນຫຼວງຮ່າໂນ້ຍ ສສ ຫວຽດນາມ, ກອງປະຊຸມວົງແຄບລັດຖະມົນຕີກະຊວງປ້ອງກັນປະເທດບັນດາປະເທດ ອາຊຽນ ປີ  2020 (ADMM) ໄດ້ດໍາເນີນກອງປະຊຸມຄົບຄະນະ ພາຍໃຕ້ການເປັນປະທານຂອງທ່ານ ພົນເອກ ໂງຊວັນລິກ ລັດຖະມົນຕີກະຊວງປ້ອງກັນປະເທດຫວຽດນາມ, ຫົວໜ້າຄະນະຜູ້ແທນຫວຽດນາມ. ເຂົ້າຮ່ວມກອງປະຊຸມດັ່ງກ່າວ ຍັງມີລັດຖະມົນຕີ, ຫົວໜ້າຄະນະຜູ້ແທນບັນດາປະເທດ ອາຊຽນ ແລະ ທ່ານ ລິມ ຈັອກຮອຍ ເລຂາທິການໃຫຍ່ ອາຊຽນ.
ກ່າວຄໍາເຫັນທີ່ກອງປະ ຊຸມ, ທ່ານ ໂງຊວັນລິກ ເນັ້ນໜັກວ່າ: ນີ້ແມ່ນກອງປະຊຸມຂັ້ນສູງເທື່ອທໍາອິດໃນປີ 2020, ກອງປະຊຸມວົງແຄບ ADMM ຄັ້ງນີ້, ມີບົດບາດສໍາຄັນທີ່ສຸດໃນການກໍານົດທິດການຮ່ວມມືໃຫ້ແກ່ ອາຊຽນ ໃນປີນີ້, ກະກຽມຂັ້ນຕອນເບື້ອງຕົ້ນໃຫ້ແກ່ກອງປະຊຸມ ADMM, ADMM + ຊຶ່ງຈະຈັດຂຶ້ນໃນທ້າຍປີນີ້. ບັນດາຜູ້ແທນເຂົ້າຮ່ວມກອງປະຊຸມ ກໍໄດ້ແລກປ່ຽນຄໍາຄິດຄໍາເຫັນຢ່າງກົງໄປກົງມາ, ມີລັກສະນະສ້າງສັນກ່ຽວກັບບັນດາສິ່ງທ້າທາຍຄວາມໝັ້ນຄົງ ຊຶ່ງໂລກ ແລະ ພາກພື້ນ, ພິເສດແມ່ນ ອາຊຽນ ພວມຕ້ອງປະເຊີນໜ້າ. ພວກເຮົາກໍຕີລາຄາກ່ຽວກັບກົນໄກຮ່ວມມື ADMM, ADMM + ພ້ອມທັງປຶກສາຫາລືເປັນເອກະພາບກັນກ່ຽວກັບບາງການກໍານົດທິດ ແລະ ເນື້ອໃນຮ່ວມມື.
ຂ່າວລະບຸວ່າ: ຕໍ່ໜ້າສະ ພາບການຂອງເຊື້ອພະຍາດ Covid - 19 ໄດ້ແຜ່ລະບາດໄປສູ່ໂລກ ແລະ ພາກພື້ນ, ທ່ານ ໂງຊວັນລິກ ເນັ້ນໜັກວ່າ: ດ້ວຍບົດບາດເປັນປະທານຄະນະຜູ້ອໍານວຍການສູນເສນາຮັກ ອາຊຽນ ໃນປີ 2020, ຫວຽດນາມ ສະເໜີໃຫ້ບັນດາປະເທດສະມາຊິກ ຄົ້ນຄວ້າ, ຈັດຕັ້ງການຝຶກແອບກ່ຽວກັບການແກ້ໄຂ ແລະ ຮັບມືກັບເຊື້ອພະຍາດຕິດຕໍ່ໃນປີນີ້.
ທີ່ກອງປະຊຸມວົງແຄບ ADMM ຄັ້ງນີ້, ບັນດາປະເທດ ໄດ້ອອກຖະແຫຼງການຮ່ວມກ່ຽວກັບການຮ່ວມມືດ້ານປ້ອງກັນຊາດ,  ຮັບມືກັບໄພຂົ່ມຂູ່ຄວາມໝັ້ນຄົງແບບໃໝ່ ໃນໄລຍະເກີດໂຣກລະບາດ Covid - 19. ຖະແຫຼງການຮ່ວມສະບັບດັ່ງກ່າວ ໄດ້ຢັ້ງຢືນວ່າ: ຈະເພີ່ມທະວີການຮ່ວມມື, ສົມທົບ, ສາມັກຄີກັນໃນບັນດານະໂຍບາຍ, ຍຸດທະສາດ ແລະ ລາຍການຮັບມືກັບໂຣກລະບາດຂອງ ອາຊຽນ.
ຂະນະດຽວກັນນັ້ນ, ທ່ານ ພົນໂທ ຫງວຽນຈີ໊ວິ້ງ ຮອງລັດຖະມົນຕີກະຊວງປ້ອງກັນປະເທດ ຫວຽດນາມ ໄດ້ເນັ້ນໜັກເຖິງບັນດາບຸລິມະສິດ ເພື່ອຮັບປະກັນຜົນສຳເລັດຂອງກອງປະຊຸມນີ້ວ່າ: ຂ້າພະເຈົ້າຖືວ່າ ກອງປະຊຸມວົງແຄບລັດຖະມົນຕີກະຊວງປ້ອງກັນປະເທດ ອາຊຽນ ມີຄວາມສຳຄັນທີ່ສຸດ. ມັນຕັດສິນຜົນສຳເລັດຂອງປີ ອາຊຽນ, ຂອງ 10 ປະເທດອາຊຽນ ແຕ່ບໍ່ແມ່ນສະເພາະ ຫວຽດນາມ ເທົ່ານັ້ນ ແລະ ຕັດສິນຜົນສຳເລັດຂອງ ADMM+ ອີກດ້ວຍ. ຢາກປະສົບຜົນສຳເລັດແມ່ນຕ້ອງແກ້ໄຂໃຫ້ໄດ້ 2 ບັນຫາຄື: ໜຶ່ງ; ບັນດາເນື້ອໃນທີ່ມີລັກສະນະຫຼັກການໃນຮ່າງເອກະສານໂອ້ລົມສົນທະນາ ລະຫວ່າງ ອາຊຽນນຳກັນ ແລະ ອາຊຽນກັບບັນດາປະເທດເຂົ້າຮ່ວມ, ລະອຽດແມ່ນຫຼັກການລວມຂອງ ADMM ແລະ ຖະແຫຼງການ ADMM+. ສອງ; ຕ້ອງຮັບຮອງເອົາໂຄງການດຳເນີນງານ. ພວກເຮົາຕ້ອງສ້າງໂຄງການທີ່ເໝາະສົມ ຊຶ່ງບັນດາປະເທດມາຮ່ວມເຫຼົ່ານີ້ ຮູ້ສຶກວ່າສະບາຍໃຈ, ມີຄວາມສະດວກໃຫ້ແກ່ເຂົາເຈົ້າ. ເຮັດໄດ້ຄືແນວນັ້ນ ພວກເຮົາຈຶ່ງປະສົບຜົນສຳເລັດ.