ໜັງສືພິມ ປະຊາຊົນ

ໂຄງການກໍ່ສ້າງທາງດ່ວນ ນະຄອນຫຼວງວຽງຈັນ ໝາຍເລກ 1 ຈະໃຊ້ເວລາກໍ່ສ້າງ 24 ເດືອນ

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 21/02/2020 09:58:04 ຈຳນວນຢ້ຽມຊົມ 1360 ຄັ້ງ

ພິທີວາງສີລາລືກໂຄງການກໍ່ສ້າງທາງດ່ວນ ນະຄອນຫຼວງວຽງຈັນໝາຍເລກ 1 ໄດ້ຈັດຂຶ້ນໃນວັນທີ 20 ກຸມພານີ້ ທີ່ບ້ານໂນນຫວາຍ (ເສັ້ນທາງຕັດໃໝ່ບຶງທາດຫຼວງ) ໂດຍເປັນກຽດເຂົ້າຮ່ວມຂອງທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ເຈົ້າຄອງນະຄອນຫຼວງວຽງຈັນ. ທ່ານ ພຶດສະພາ ພູມມະສັກ ປະທານບໍລິສັດໂຄງການທາງດ່ວນນະຄອນຫຼວງວຽງຈັນໝາຍເລກ 1 ຈຳກັດຜູ້ດຽວ.ມີບັນດາລັດຖະມົນຕີ ຮອງລັດຖະ ມົນຕີ ພະແນກການກ່ຽວຂ້ອງ ພ້ອມແຂກຖືກເຊີນເຂົ້າຮ່ວມ.
ທ່ານ ພູຂົງ ບັນນາວົງ ຮອງເຈົ້າຄອງນະຄອນຫຼວງວຽງຈັນ ໄດ້ລາຍງານໃຫ້ຮູ້ວ່າ:ໂຄງການທາງດ່ວນ ນະຄອນຫຼວງວຽງຈັນໝາຍເລກ 1 ເປັນໂຄງການຍຸດທະສາດທີ່ສຳຄັນຂອງນະຄອນຫຼວງວຽງຈັນ ເປັນໂຄງການປ້ອງກັນ ແລະ ແກ້ໄຂສະພາບລົດຕິດຕາມທ້ອງຖະໜົນ ທີ່ນອນໃນ 6 ໂຄງການບຸກທະລຸຂອງນະຄອນຫຼວງວຽງຈັນ. ຈຸດປະສົງຂອງໂຄງ ການແມ່ນແນໃສ່ເພື່ອແກ້ໄຂສະພາບລົດຕິດ ແລະ ເປັນໂຄງການພັດທະນາພື້ນຖານໂຄງລ່າງເພື່ອອຳນວຍຄວາມສະດວກໃນການ ພັດທະນາເສດຖະກິດ-ສັງຄົມຂອງ ນ/ວ ແລະ ເປັນທາງເລືອກໃຫ້ແກ່ປະຊາຊົນທີ່ຈະເດີນທາງໄປ ຜ່ານຖະໜົນໄກສອນ ພົມວິຫານ ໄປຫາເຂດໃຕ້ ແລະ ບໍລິເວນອ້ອມຮອບ. ເພື່ອໃຊ້ເປັນເສັ້ນທາງສຸກເສີນ ຫຼື ເວລາຮີບດ່ວນໃນເວລາເກີດເຫດເຊັ່ນ: ລົດດັບເພີງ, ລົດໂຮງໝໍ, ລົດກູ້ໄພ ພ້ອມທັງເປັນການພັດທະນາລະບົບການຂົນສົ່ງ ແລະ ໂຄງການຂະຫຍາຍຖະໜົນພາຍໃນນະຄອນຫຼວງວຽງຈັນ ເຊື່ອມຕໍ່ເຂົ້າສູ່ສະໜາມກິລາຊີເກມ,ສູນກາງສຳນັກງານລັດ ທີ່ຢຸ່ເຂດເມືອງໄຊທານີ ເຂດອຸດສະຫະກຳຫຼັກ 21 ແລະ ເພື່ອອຳນວຍຄວາມສະດວກໃຫ້ແກ່ພະນັກ ງານ ແລະ ປະຊາຊົນໃນການສັນຈອນໄປມາ.
ໂຄງການທາງດ່ວນນະຄອນຫຼວງວຽງຈັນໝາຍເລກ1ເປັນການລົງທຶນຂອງເອກະຊົນ 100% ໃນຮູບແບບ BOT ມີອາຍຸ ສຳປະທານ 50 ປີ ມີມູນຄ່າການລົງທຶນທັງໝົດ 200 ລ້ານໂດລາ ໃນນັ້ນລວມມີຄ່າຊົດເຊີຍ ແລະທົດແທນຄ່າເສຍຫາຍ ໃຫ້ຜູ້ຖືສິດໃຊ້ທີ່ດີນທີ່ຖືກໂຄງການ.ທາງດ່ວນນະຄອນຫຼວງວຽງຈັນໝາຍເລກ 1 ມີຄວາມຍາວ 15,30 ກິໂລແມັດໃນນັ້ນ ມີຂົວລອຍ 3,95 ກິໂລແມັດ,ທາງໜ້າດິນ11,35 ກິໂລແມັດ.ກວ້າງ 54 ແມັດ (ຈຸດກວ້າງສຸດແມ່ນສະຖານີເກັບເງິນ ມີ 100 ແມັດ) ສະເພາະໜ້າທາງກວ້າງ 23,6 ແມັດ ແລະ ເຂດສະຫງວນ 2 ເບື້ອງ ເບື້ອງລະ 15,2 ແມັດ ປະກອບມີ 4 ເລນ ກວ້າງເລນລະ 3,6 ແມັດ ປະກອບມີໄຟເຍື້ອງທາງ ປ້າຍຈາລະຈອນຕ່າງໆ ແຄມທາງເປັນເຂດປູກຫຍ້າ ແລະຕົ້ນໄມ້ປະດັບປະດາ ແລະ ປ້າຍໂຄສະນາ .ທາງດ່ວນສາມາດຮອງຮັບລົດໄດ້ສູງສຸດ 75.000 ຄັນ/ມື້ ເປັນມາດຕະຖານທາງດ່ວນອາຊຽນປະເພດ 1 . ມີດ່ານເກັບເງິນ 2 ດ່ານ (ດ່ານທີ 1 ຢູ່ຮ່ອງສຸພາບ.ດ່ານທີ 2 ຢູ່ທາງເຂົ້າອອກເຂດເສດຖະກິດສະເພາະບຶງທາດຫຼວງ. ມີທາງຂຶ້ນ ແລະ ລົງ 8 ຈຸດຄື: ຈຸດທີ 1 ເຂດເສດຖະກິດສະເພາະບຶງທາດຫຼວງ, 2. ບ້ານໂພນສະຫວ່າງ, 3. ເມືອງດອກຈຳປາອອກ, (ບ້ານໂພນພະເນົາ ສູ່ຖະໜົນໄກສອນ), 4. ຕະຫຼາດອານຈີ (ບ້ານໜອງໜ່ຽງ), 5. ຖະໜົນ 450 (ບ້ານໂຊກໃຫຍ່-ນາແຄ), 6. ບ້ານໄຊ ຈຸດຕັດກັບທາງລົດໄຟ, 7. ຖະໜົນ13 ໃຕ້ (ບ້ານໄຊສະຫວ່າງ) ແລະ 8. ບໍລິເວນດົງໝາກຄາຍ ຈຸດສິ້ນສຸດ. ໂຄງການກໍ່ສ້າງທາງດ່ວນນະຄອນຫຼວງວຽງຈັນໝາຍເລກ 1 ມີເນື້ອທີ່ທັງໝົດ 289,2 ເຮັກຕາ ກວມເອົາ 2 ເມືອງ ມີ 21 ບ້ານຄື: ເມືອງໄຊເສດຖາ ມີ 14 ບ້ານ ແລະ ເມືອງໄຊທາ ນີ 7 ບ້ານ.
ໃນໂອກາດນີ້ ທ່ານ ສິນລະວົງ ຄຸດໄພທູນ ກໍໄດ້ຮ່ວມວາງສີລາລືກ ແລະ ລັ່ນຄ້ອງ 9 ບາດເພື່ອເປັນນິມິດໝາຍໃຫ້ແກ່ການກໍ່ສ້າງທາງດ່ວນນະຄອນຫຼວງວຽງຈັນໝາຍເລກ 1 ແລະ ຈະໃຊ້ເວລາການກໍ່ສ້າງທີ່ໄດ້ກຳນົດໄວ້ 24 ເດືອນໃຫ້ສຳເລັດ ນັບແຕ່ມື້ວາງສີລາລືກເປັນຕົ້ນໄປ.
(ຂ່າວ: ກົງມະລີ)