ຫົວ​ຂໍ້ : ປກສ ສົ່ງ 11 ປະເພດກິລາ ຮ່ວມ ຊຽງຂວາງ ເກມ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 21/02/2020 10:33:01 ຈຳ​ນວນ​ຜູ້​ເຂົ້າ​ຢ້ຽມ​ຊົມ 1355 ຄັ້ງ

   ທ່ານ ພັນ​ເອກ ທອງ​ເພັດ ມະນີ​ສະຫວັນ ຫົວໜ້າ​ກົມ​ກິລາ ກົມ​ໃຫຍ່​ການເມືອງ ປກສ ຄະນະ​ຮັບຜິດ​ຊອບ​ຊີ້​ນຳ​ລວມ​ກິລາ ​ກະຊວງປ້ອງ​ກັນ​ຄວາມ​ສະຫງົບ (ປກສ) ໄດ້​ໃຫ້​ຮູ້ເມື່ອ​ບໍ່​ດົນ​ຜ່ານ​ມາວ່າ: ງານ​ມະ​ຫະ​ກຳ​ກິ ລາ​ແຫ່ງ​ຊາດ ຄັ້ງ​ທີ XI (ຊຽງ​ຂວາງ ເກມ) ວັນ​ທີ 22 ມີ​ນາ-1 ເມສາ 2020 ກະຊວງ ປກສ ຈະ​ສົ່ງ​ຄະນະ​ນຳ ຄູ​ຝຶກ ແລະ ນັກ​ກິລາ ເຂົ້າ​ຮ່ວມ 148 ຄົນ ຍິງ 35 ຄົນ ໃນ 11 ປະເພດຄື: ເຕະບານ, ກະຕໍ້, ປັນ​ຈັກ​ສີ​ລັດ, ມວຍ​ລາວ, ມວຍ​ສາກົນ, ມວຍ​ປ້ຳ, ຍິງ​ປືນ, ແລ່ນ​-​ລານ, ເປ​ຕັງ, ຍິງ​ທະນູ ແລະ ເທ​ຄວັນ​ໂດ.
   ຄວາມ​ຫວັງ ແມ່ນ​ຈະ​ໃຫ້​ຍາດ​ໄດ້​ຫຼຽນ​ຄຳ​ທຸກ​ປະເພດ​ກິລາ​ທີ່​ສົ່ງ​ລົງ​ແຂ່ງຂັນ ຊຶ່ງ​ນັກ​ກິລາ​ທັງ 11 ປະເພດ ໄດ້​ເລີ່ມ​ເຂົ້າ​ສູນ​ເກັບ​ຕົວ​ຝຶກຊ້ອມ ແຕ່​ວັນ​ທີ 21 ທັນວາ 2019 ເປັນຕົ້ນ​ມາ ແລະ ມີ​ການ​ເຄື່ອນ ໄຫວ​ແຂ່ງຂັນ​ທົດ​ສອບ​ເປັນ​ປະຈຳ ປັດຈຸບັນ​ມີ​ຄວາມ​ພ້ອມ​ແລ້ວ​ໃນ​ລະດັບ​ສູງ.
   ສຳລັບ​ການ​ຝຶກຊ້ອມ​ແມ່ນ​ພົບ​ຂໍ້​ຫຍຸ້ງຍາກ​ສົມຄວນ ເປັນຕົ້ນ​ສະໜາມ​ຝຶກຊ້ອມ​ບໍ່​ໄດ້​ມາດຕະຖານ ແລະ ຢູ່​ຫ່າງ​ໄກ ອຸປະກອນ​ຝຶກຊ້ອມ ແລະ ພາຫະນະ​ຮັບ​ສົ່ງ​ນັກ​ກິລາ​ບໍ່​ພຽງພໍ ແຕ່​ຄະນະ​ຮັບຜິດຊອບ ກະຊວງ ປກສ ໄດ້​ເອົາໃຈໃສ່ແກ້​ໄຂ ແລະ ນຳພາ​ນັກ​ກິ ລາ​ຝຶກຊ້ອມ​ຢ່າງ​ຕໍ່​ເນື່ອງ ເພື່ອ​ຫວັງ​ຊີງ​ເອົາ​ຫຼຽນ​ໃຫ້​ໄດ້​ຕາມ​ເປົ້າ​ໝາຍ​ທີ່​ວາງ​ໄວ້.      (ຂ່າວ: ວົງ​ຈອນ​ກິລາ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110