ຫົວ​ຂໍ້ : ມູນຄ່າການຄ້າລາວ-ຈີນ ບັນລຸ 3,5 ຕື້ກວ່າໂດລາ

ເຜີຍ​ແຜ່​ໂດຍ​: siththiphone rasphone ເວ​ລາ: 24/02/2020 09:18:53 ຈຳ​ນວນ​ຜູ້​ເຂົ້າ​ຢ້ຽມ​ຊົມ 600 ຄັ້ງ

   ປີ 2019 ມູນ​ຄ່າ​ການ​ຄ້າ​ລະຫວ່າງ​ ລາວ ​- ​ຈີນ​ ບັນລຸ 3,5 ​ຕື້​ກວ່າໂດ​ລາ, ໃນ​ຂະນະ​ທີ່​ການ​ລົງທຶນ​ຂອງ ສປ ຈີນ ຢູ່ ສປປ ລາວ ມີ 785 ໂຄງການ, ມູນ​ຄ່າ 12 ຕື້​ໂດ​ລາ, ສ່ວນ​ໂຄງການ​ກໍ່ສ້າງ​ທາງ​ລົດໄຟ​ລາວ​-​ຈີນ ແລະ ໂຄງການ​ທາງ​ດ່ວນ​ວຽງ​ຈັນ​-​ວັງ​ວຽງ ກໍ​ມີ​ຄວາມ​ຄືບ​ໜ້າ​ເປັນ​ທີ່​ໜ້າ​ພໍ​ໃຈ.
   ໃນ​ວັນ​ທີ 20 ກຸມພາ​ຜ່ານ​ມາ ທີ່​ໂຮງແຮມ​ດອນ​ຈັນ​ພາ​ເລດ, ສະຫາຍ ສະເຫຼີມ​ໄຊ ກົມ​ມະ​ສິດລັດຖະມົນຕີ​ກະຊວງ​ການ​ຕ່າງປະເທດ ແຫ່ງ ສປປ ລາວ ພ້ອມ​ຄະນະ ໄດ້​ພົບ​ປະ​ກັບ ສະຫາຍ ຫວາງ ອີ້ ທີ່​ປຶກສາ​ແຫ່ງ​ລັດ ລັດຖະມົນຕີ​ກະຊວງ​ການ​ຕ່າງປະເທດ ແຫ່ງ ສປ ຈີນ ພ້ອມ​ດ້ວຍ​ຄະນະ ໃນ​ໂອກາດ​ທີ່​ຄະນະ​ຜູ້​ແທນ​ດັ່ງກ່າວ​ເດີນທາງ​ມາ​ຢ້ຽມຢາມ ສປປ ລາວ ຢ່າງ​ເປັນ​ທາງ​ການ ແລະ ເຂົ້າ​ຮ່ວມ ກອງ​ປະຊຸມ​ລັດຖະມົນຕີ​ຕ່າງປະເທດ ຂອບ​ການ​ຮ່ວມ​ມື​ແມ່ນຳ້​ຂອງ​-​ແມ່ນຳ້​ລ້ານ​ຊ້າງ ຄັ້ງ​ທີ 5 ແລະ ກອງ​ປະຊຸມ​ລັດຖະມົນຕີ​ຕ່າງປະເທດ ອາ​ຊຽ​ນ-​ຈີນ ສະໄໝ​ພິເສດ ກ່ຽວ​ກັບ ການ​ລະບາດ​ຂອງ​ພະຍາດ​ອັກເສບ​ປອດ​ຈາກ​ເຊື້ອ​ຈຸ​ລະ​ໂ​ຣກ​ໂຄ​ໂຣ​ນາ​ສາຍ​ພັນ​ໃໝ່ (COVID-19), ໃນ​ລະຫວ່າງ​ວັນ​ທີ 19-21 ກຸມພາ 2020, ທີ່ ນະຄອນຫຼວງ​ວຽງ​ຈັນ.
   ການ​ພົບ​ປະ​ສອງ​ຝ່າຍ​ຄັ້ງ​ນີ້ ສອງ​ຝ່າຍ ໄດ້​ຕີ​ລາຄາ​ສູງ ຕໍ່​ການ​ພົວພັນ​ແບບ​ຄູ່​ຮ່ວມ​ມື​ຍຸດທະສາດ​ຮອບດ້ານ​ໝັ້ນຄົງ​ຍາວ​ນານ ຕາມ​ທິດ 4 ດີ ແລະ ການ​ເປັນ​ຄູ່​ຮ່ວມ​ຊາຕາ​ກຳ ລາວ​-​ຈີນ ແລະ ຈີນ​-​ລາວ ລະຫວ່າງ ສອງ​ພັກ  ແລະ  ສອງ​ລັດຖະບານ ກໍ​ຄື​ປະຊາຊົນ​ສອງ​ຊາດ​ລາວ​-​ຈີນ, ຊຶ່ງ​ນັບ​ມື້​ນັບ​ໄດ້​ຮັບ​ການ​ເສີມ​ຂະຫຍາຍ​ດ້ວຍ​ຄຸນ​ນະ​ພາບ​ໃໝ່​ຢ່າງ​ບໍ່​ຢຸດ​ຢັ້ງ ໂດຍ​ໄດ້​ສະແດງ​ອອກ​ໃນ​ການ​ແລກປ່ຽນ​ການ​ຢ້ຽມຢາມ​ຂອງ​ຄະນະ​ຜູ້​ແທນ​ຂັ້ນ​ສູງ​ຂອງ​ສອງ​ປະເທດ ຢ່າງ​ເປັນ​ປົກກະຕິ ແລະ ໄດ້​ມີ​ການ​ຮ່ວມ​ມື​ກັນ​ຢ່າງ​ໃກ້ຊິດ​ຮອບດ້ານ​ໃນ​ຂະແໜງການ​ຕ່າງໆ, ໄດ້​ຈັດ​ຕັ້ງ​ຜັນ​ຂະຫຍາຍ​ແຜນ​ແມ່​ບົດ ວ່າ​ດ້ວຍ ຄູ່​ຮ່ວມ​ຊາຕາກຳ ລາວ​-​ຈີນ ທີ່ສອງ​ສະຫາຍ​ປະທານ​ປະເທດ ໄດ້​ຮ່ວມ​ກັນ​ລົງ​ນາມ​ໃນ​ເດືອນ ເມສາ 2019 ຜ່ານ​ມາ. 
   ມູນ​ຄ່າ​ການ​ຄ້າ​ສອງ​ຝ່າຍ ໃນ​ປີ 2019 ບັນລຸ 3.540 ລ້ານ​ໂດ​ລາ​ (ເພີ່ມ​ຂຶ້ນ 17,4%), ມູນ​ຄ່າ​ການ​ນໍາ​ເຂົ້າ ບັນລຸ 1.600 ລ້ານ​ໂດ​ລາ (ເພີ່ມ​ຂຶ້ນ 29,6%) ແລະ ມູນ​ຄ່າ​ການ​ສົ່ງ​ອອກ​ມີ 1.940 ລ້ານ​ໂດ​ລາ​ (ເພີ່ມ​ຂຶ້ນ 8,9%) ເມື່ອ​ທຽບໃສ່​ປີຜ່ານມາ, ການ​ລົງທຶນ​ຂອງ ຈີນ ຢູ່ ລາວ ໄດ້​ຖືກ​ຈັດ​ຢູ່​ໃນ​ອັນ​ດັບ 1 ຂອງ​ນັກ​ລົງທຶນ​ຕ່າງປະເທດ​ຢູ່ ສປປ ລາວ ຈຳນວນ 785 ໂຄງການ ລວມ​ມູນ​ຄ່າ 12 ຕື້​ໂດ​ລາ​ ຊຶ່ງ​ສ່ວນ​ໃຫຍ່​ແມ່ນ​ການ​ລົງທຶນ​ໃນ​ຂະແໜງການ​ບໍ່​ແຮ່, ການ​ກໍ່ສ້າງ, ການ​ບໍລິການ, ພະລັງງານ​ໄຟຟ້າ ແລະ ກະ​ສິ​ກຳ. ລັດຖະບານ​ລາວ ໄດ້​ຖື​ ສໍາ​ຄັນ​ບັນດາ​ໂຄງການ​ພັດທະ ນາ​ພື້ນຖານ​ໂຄງ​ລ່າງ ໂດຍ​ສະເພາະໂຄງການ​ກໍ່ສ້າງ​ທາງ​ລົດໄຟ ລາວ​-​ຈີນ ທີ່​ໄດ້​ສໍາ ເລັດແລ້ວ​ຫຼາຍ​ກວ່າ 83%, ໂຄງການ​ທາງ​ດ່ວນ ລາວ​-​ຈີນ ນະຄອນຫຼວງ​ວຽງ​ຈັນ​-​ວັງ​ວຽງ ມີ​ຄວາມ​ຄືບ​ໜ້າ​ແລ້ວ​ຫຼາຍ​ກວ່າ 50% ແລະ ແລວ​ທາງ​ເສດຖະກິດ ລາວ​-​ຈີນ ກໍ​ໄດ້​ມີ​ຄວາມ​ຄືບ​ໜ້າ​ເປັນ​ກ້າວໆ, ຫຼາຍ​ໂຄງການ​ຊ່ວຍເຫຼືອ​ ​ຈາກ ສປ ຈີນ ໃຫ້​ແກ່ ສປປ ລາວ ແມ່ນ​ໄດ້​ຮັບ​ການ​ຊຸກຍູ້​ໃຫ້​ມີ​ຄວາມ​ຄືບ​ໜ້າ​ດີ​ຂຶ້ນ. ພ້ອມ​ດຽວ​ກັນ​ນີ້, ສອງ​ຝ່າຍ ໄດ້​ສະແດງ​ຄວາມ​ເຫັນ​ດີ​ທີ່​ຈະ​ຊຸກຍູ້​ໃຫ້​ພາກສ່ວນ​ກ່ຽວຂ້ອງ​ຂອງ​ຕົນ​ໃນ​ການ​ກະກຽມ​ພິທີ​ສະເຫຼີມສະຫຼອງ​ວັນ​ສ້າງຕັ້ງ​ສາຍ​ພົວພັນ​ການ​ທູດ ລາວ​-​ຈີນ ຄົບຮອບ 60 ໃນ​ປີ 2021 ທີ່​ຈະ​ມາ​ເຖິງ​ນີ້, ປະສານ​ສົມທົບ​ກັນ​ຢ່າງ​ໃກ້ຊິດ ເພື່ອ​ກະກຽມ​ໃຫ້​ແກ່​ການ​ເດີນທາງ​ມາ​ຢ້ຽມຢາມ ແລະ ເຂົ້າ​ຮ່ວມ​ກອງ​ປະຊຸມ​ສຸດ​ຍອດ​ແມ່ນ້ຳ​ຂອງ​-​ແມ່ນ້ຳ​ລ້ານ​ຊ້າງ ຢູ່ ສປປ ລາວ ຂອງ ນາຍົກລັດຖະມົນຕີ ສປ ຈີນ ໃນ​ທ້າຍ​ເດືອນ​ມີນາ 2020 ໃຫ້​ປະສົບ​ຜົນສຳເລັດ​ຕາມ​ຄາດໝາຍ, ສືບຕໍ່​ກົນ​ໄກ​ການ​ແລກປ່ຽນ​ບົດຮຽນ, ການ​ໃຫ້​ທຶນ​ຝຶກ​ອົບຮົມ​ໃນ​ຂະແໜງການ​ຕ່າງໆ, ສືບຕໍ່​ໃຫ້ການ​ຊ່ວຍເຫຼືອ​ຊຶ່ງ​ກັນ ແລະ ກັນ ໃນ​ຂອບ​ການ​ຮ່ວມ​ມື​ພາກ​ພື້ນ ແລະ ອະນຸ​ພາກ​ພື້ນ​ຕ່າງໆ ເປັນຕົ້ນ​ແມ່ນ ການ​ຮ່ວມ​ມື​ຂອບ​ແມ່​ນໍ້າ​ຂອງ​-​ແມ່ນ້ຳ​ລ້ານ​ຊ້າງ, ການ​ຮ່ວມ​ມື​ອາ​ຊຽ​ນ-​ຈີນ ແລະ ການ​ຮ່ວມ​ມື​ໃນ​ຂອບ​ການ​ຮ່ວມ​ມື​ສາ​ກົນ. 
   ໃນ​ໂອກາດ​ນີ້, ສະຫາຍ ສະເຫຼີມ​ໄຊ ກົມ​ມະ​ສິດ ໄດ້​ສະແດງ​ຄວາມ​ຂອບໃຈ​ຢ່າງ​ສູງ​ມາ​ຍັງ ພັກ​-​ລັດຖະບານ ແລະ ປະຊາຊົນ​ຈີນ ອ້າຍ​ນ້ອງ ທີ່​ໄດ້​ໃຫ້ການ​ຊ່ວຍເຫຼືອ​ສະໜັບສະໜູນ ສປປ ລາວ ຕະຫຼອດ​ມາ  ພ້ອມ​ນີ້ ກໍສະແດງ​ຄວາມ​ເຫັນໃຈ ແລະ ເສົ້າ​ສະຫຼົດ​ໃຈ​ຕໍ່​ຄອບຄົວ, ຍາດ​ພີ່ນ້ອງ ແລະ ປະຊາຊົນ​ຈີນ ຜູ້​ໄດ້​ຮັບ​ເຄາະ​ຮ້າຍ​ຈາກການ​ແຜ່​ລະບາດ​ຂອງ​ເຊື້ອ​ພະຍາດ​ອັກເສບ​ປອດ​ຈາກ​ເຊື້ອ​ຈຸ​ລະ​ໂຣກ​ໂຄ​ໂ​ຣ​ນາ​ສາຍ​ພັນ​ໃໝ່ (COVID-19) ແລະ ສະແດງ​ຄວາມ​ເຊື່ອ​ໝັ້ນ​ວ່າ ສປ ຈີນ ຈະ​ສາມາດ​ຄວບ​ຄຸມ​ການ​ລະບາດ​ຂອງ​ເຊື້ອ​ພະຍາດ​ດັ່ງກ່າວ ໃຫ້​ໄດ້​ທັນ​ເວລາ ແລະ ກັບ​ຄືນ​ສູ່​ສະພາບ​ປົກກະຕິ​ໂດຍ​ໄວ.
   ໃນ​ໂອກາດ​ດຽວ​ກັນ, ສະຫາຍ ລັດຖະມົນຕີ ຫວາງ ອີ້ ກໍ​ໄດ້​ສະແດງ​ຄວາມ​ຂອບໃຈ​ຕໍ່ ພັກ, ລັດຖະບານ ແຫ່ງ ສປປ ລາວ ທີ່​ໄດ້​ໃຫ້​ກຽດ​ຕ້ອນຮັບ​ອັນ​ອົບ​ອຸ່ນ​ໃນ​ການ​ມາ​ຢ້ຽມຢາມ​ທາງ​ການ ສປປ ລາວ ໃນ​ຄັ້ງ ​ນີ້ ແລະ ສະແດງ​ຄວາມ​ຍິນດີ​ ຈະ​ສືບຕໍ່​ຮັດ​ແໜ້ນ ແລະ ເສີມ​ ຂະຫຍາຍ​ສາຍ​ພົວພັນ​ມິດຕະ ພາບ, ການ​ພົວພັນ​ແບບ​ຄູ່​ຮ່ວມ ​ຍຸດທະສາດ​ຮອບດ້ານໝັ້ນຄົງ​ຍາວ​ນານ ຕາມ​ທິດ 4 ດີ ລະ ຫວ່າງ ສອງ​ພັກ​-​ສອງ​ລັດຖະ ບານ ກໍ​ຄື ປະຊາຊົນ​ສອງ​ຊາດ ລາວ ແລະ ຈີນ ໃຫ້​ນັບ​ມື້​ນັບ​ໄດ້​ ຮັບ​ການ​ເສີມ​ຂະຫຍາຍ ທັງ​ ທາງ​ກວ້າງ, ທາງ​ເລິກ ແລະ ໃຫ້​ມີ​ປະສິດ​ທິ​ຜົນ, ນໍາ​ເອົາ​ຜົນ​ປະໂຫຍດ​ຕົວ​ຈິງ​ມາ​ໃຫ້​ແກ່​ປະ ຊາຊົນ​ສອງ​ຊາດ ລາວ ແລະ ຈີນ.
(ຂ່າວ: ກະຊວງ​ການ​ຕ່າງປະເທດ)
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110