ຫົວ​ຂໍ້ : ທູດຣັດເຊຍ ລະນຶກວັນປ້ອງກັນ ປິຕຸພູມ

ເຜີຍ​ແຜ່​ໂດຍ​: siththiphone rasphone ເວ​ລາ: 24/02/2020 09:29:09 ຈຳ​ນວນ​ຜູ້​ເຂົ້າ​ຢ້ຽມ​ຊົມ 592 ຄັ້ງ

   ເນື່ອງ​ໃນ​ໂອກາດ​ວັນປ້ອງ​ ກັນ​ປິຕຸ​ພູມ​ຂອງ ​ສ.ຣັດເຊຍ ໃນວັນ​ທີ 20 ກຸມພາ​ຜ່ານ​ມາ, ຫ້ອງການ​ທີ່​ປຶກສາ​ທູດ​ປ້ອງ​ກັນ​ຊາດ​ສະຫະພັນ​ຣັດ​ເຊຍ ​ປະ​ຈຳ ​ສປປ​ ລາວ ​ໄດ້​ຈັດ​ງານ​ລ້ຽງ​ສະຫຼອງ​ຂຶ້ນ​ຢ່າງ​ເປັນ​ທາງ​ການ ໂດຍ​ມີ​ທ່ານ ​ພົນ​ເອກ ​ຈັນ​ສະໝອນ​ ຈັນ​ຍາ​ລາດ​  ກຳມະການ​ກົມ​ການ ເມືອງ​ສູນ​ກາງ​ພັກ   ລັດຖະມົນຕີ​ກະຊວງ​ປ້ອງ​ກັນ​ປະເທດ​, ມີ​ທ່ານ​ ວອ. ກາລີ​ນິນ ​ເອກ​ອັກ​ຄະລັດຖະ​ທູດ​ວິສາມັນ​ຜູ້​ມີ​ອຳນາດ​ເຕັມ​ແຫ່ງ ​ສ.ຣັດ​ເຊຍ​ປະຈຳ​ ລາວ, ມີ​ລັດຖະມົນຕີ, ຮອງ​ລັດຖະມົນຕີ, ນາຍທະ​ຫານ​-​ຕຳຫຼວດ​ຂັ້ນ​ສູງ​ບັນດາ​ທູດ​ທະຫານ​ຕ່າງປະເທດ​ປະຈຳ​ລາວ​ ແລະ ​ແຂກ​ຖືກ​ເຊີນ​ຫຼາຍ​ພາກສ່ວນ​ທັງ​ຝ່າຍ​ລາວ​ ແລະ​ຣັດ​ເຊຍ​ເຂົ້າ​ຮ່ວມ.
   ທ່ານ ພັນ​ເອກ​ ອານ​ເດ​ຼປ. ລີ​ຄາ​ເຊັບ  ​ຫົວໜ້າ​ຫ້ອງການ​ທີ່​ປຶກສາ​ທູດ​ຝ່າຍ​ປ້ອງ​ກັນ​ຊາດ ​ສ.ຣັດ​ເຊຍ ​ປະຈຳ​ ລາວ ​ໄດ້​ກ່າວ​ວ່າ: ວັນ​ປ້ອງ​ກັນ​ປິຕຸ​ພູມ​ເປັນ​ວັນ​ບຸນ​ທາງ​ລັດ​ຖະ​ການ​ຂອງ​ຣັດ​ເຊຍ, ເປັນ​ວັນ​ຕົ້ນ​ກຳເນີດ​ມາ​ຈາກ​ວັນ​ສ້າງຕັ້ງ​ກອງທັບ​ແດງ​  ກໍ​ຄື​ກອງທັບ​ແຫ່ງ​ສະຫະພາບ​ໂຊ​ວຽດ, ເປັນ​ສັນຍາ​ລັກ​ແຫ່ງ​ຄວາມ​ນັບຖື​  ແລະ​ ພາກພູມ​ໃຈ​ຕໍ່​ປະຫວັດສາດ​ແຫ່ງ​ການ​ສ້າງ​ວິລະ​ກຳ​ອັນ​ຍິ່ງ​ໃຫຍ່​ຂອງ​ຊາວ​ຣັດ​ເຊຍ, ທັງ​ສະແດງ​ໃຫ້​ເຫັນ​ເຖິງ​ຄວາມ​ຜູກ​ພັນ​ອັນ​ແໜ້ນ​ແຟ້ນ​ລະຫວ່າງ​ຄົນ​ຮຸ່ນ​ເກົ່າ​ ແລະ​ ຮຸ່ນ​ໜຸ່ມ​ຜູ້​ສືບ​ທອດ​ນໍ້າ​ໃຈ​ສູ້​ຮົບ​ອັນ​ພິລາດ​ອາດ​ຫານ​ຂອງ​ກອງທັບ​ຣັດ​ເຊຍ. ປັດຈຸບັນ​ການ​ນຳ​ຣັດ​ເຊຍ​ໄດ້​ເອົາໃຈໃສ່​ເປັນ​ພິເສດ​ໃນ​ການ​ປັບປຸງ​ກຳລັງ​ປະກອບ​ອາວຸດ​ໃຫ້​ທັນ​ສະໄໝ​ຕອບ​ສະໜອງ​ກັບ​ຄວາມ​ຮຽກຮ້ອງ​ຕ້ອງການ​ຂອງ​ສະພາບ​ການ​ເມືອງ​-​ການ​ທະຫານ​ໃນ​ໄລຍະ​ໃໝ່, ເພື່ອ​ປ້ອງ​ກັນ ​ແລະ ​ຕອບ​ໂຕ້​ກັບ​ໄພ​ຂົ່ມຂູ່​ຈາກ​ພາຍ​ນອກ.
   ທູດ​ທະຫານ​ຣັດເຊຍ​ຍັງ​ໄດ້​ກ່າວ​ເຖິງ​ການ​ພົວພັນ​ຮ່ວມ​ມື​ຂອງ​ກຳລັງ​ປະກອບ​ອາວຸດ​ກໍ​ຄື​ການ​ພົວພັນ​ຂົງເຂດ​ອື່ນໆ​ລະຫວ່າງ​ຣັດ​ເຊຍ​-​ລາວ​ໄລຍະ​ຜ່ານ​ມາ​ແມ່ນ​ການ​ພົວພັນ​ຮ່ວມ​ມື​ບົນ​ພື້ນຖານ​ມິດ​ສະຫາຍ​ເກົ່າ​ແກ່ຍາວ​ນານ  ຊຶ່ງ​ໄດ້​ຊ່ວຍເຫຼືອ​ກັນ​ເສີມ​ສ້າງ​ ແລະ​ ຂະຫຍາຍ​ການ​ຮ່ວມ​ມື​ທີ່​ດີ​ໃນ​ທຸກ​ດ້ານ​ແລະ ​ມີ​ປະສິດ​ທິ​ຜົນ, ໃນ​ນັ້ນ​ລວມ​ທັງ​ຂົງເຂດ​ວຽກ​ງານ​ເກັບ​ກູ້​ລະເບີດ​ໃນ​ນາມ​ເປັນ​ປະທານ​ຮ່ວມ​ຂອງ​ໜ່ວຍ​ງານ​ຊ່ຽວຊານ​ດ້ານ​ເກັບ​ກູ້​ລະເບີດ​ບໍ່​ທັນ​ແຕກ​ເພື່ອ​ມະນຸດສະທຳ​ທີ່​ເປັນ​ກົນ​ໄກ​ການ​ຮ່ວມ​ມື​ໃນ​ຂອບ​ກອງ​ປະຊຸມ​ລັດຖະມົນຕີ​ປ້ອງ​ກັນ​ປະເທດ​ສະມາຊິກ​ອາ​ຊຽນ ​ແລະ​ຄູ່​ຮ່ວມ​ມື​ ແລະ​ ດ້ານ​ອື່ນໆ.
(ຂ່າວ: ກອງ​ທັບ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110