ຫົວ​ຂໍ້ : ເພື່ອເພີ່ມມູນຄ່າ GDP ລັດຖະບານເນັ້ນພາກເສດຖະກິດ ICT

ເຜີຍ​ແຜ່​ໂດຍ​: siththiphone rasphone ເວ​ລາ: 24/02/2020 09:46:53 ຈຳ​ນວນ​ຜູ້​ເຂົ້າ​ຢ້ຽມ​ຊົມ 241 ຄັ້ງ

 (ເນື່ອງ​ໃນ​ໂອກາດ​ວັນຊາດ ບຣູ​ໄນ 23/2/1984-23/2/2020)

ຮຽບຮຽງ: ລຸ້ງ​ດາວ ບຸນ​ມີ

    ບຣູ​ໄນ ເປັນ​ປະເທດ​ທີ່​ຕັ້ງ​ຢູ່ ເກາະ​ບໍ​ນຽວ ໃນ​ພາກ​ພື້ນ​ອາຊີ​ຕາເວັນ​ອອກ​ສ່ຽງ​ໃຕ້, ມີ​ເນື້ອທີ່​ທັງ​ໝົດ 5.765 ກິໂລແມັດ​ມົນທົນ, ມີ​ຊາຍ​ຝັ່ງ​ທາງ​ດ້ານ​ເໜືອ​ຕິດ​ກັບ​ທະເລ​ຈີນ​ໃຕ້, ຊາຍ​ແດນ​ທາງບົກ​ທີ່​ເຫຼືອ​ແມ່ນ​ຕິດ​ກັບ ລັດ​ຊາ​ລາ​ວັກ​ຂອງ​ມາ​ເລ​ເຊຍ. ຄວາມ​ຈິງ​ແລ້ວ​ປະເທດ​ນີ້ ແມ່ນ​ມີ​ສອງ​ສ່ວນ​ທີ່​ບໍ່​ຕິດ​ຈອດ​ກັນ​ຄື: ດ້ານ​ຕາເວັນຕົກ ແລະ ດ້ານ​ຕາເວັນ​ອອກ, ມີ​ພົນລະເມືອງ​ທັງ​ໝົດ 422.678 ຄົນ (ຂໍ້​ມູນ​ປີ 2017), ນະຄອນຫຼວງ​ແມ່ນ ບັນດາ​ເສ​ຣີ ເບ​ກາ​ວັນ.
   ປັດຈຸບັນ ບຣູ​ໄນ ກຳລັງພະ ຍາຍາມ​ປ່ຽນແປງ​ເສດຖະກິດ ​ທີ່​ອາ​ໄສ​ນໍ້າ​ມັນ​ເປັນ​ຫຼັກ ຫັນ​ໄປ​ສູ່​ໂຄງ​ສ້າງ​ເສດຖະກິດ​ທີ່​ຫຼາກ​ຫຼາຍ​ຂຶ້ນ. ສະນັ້ນ, ລັດຖະບານ ຈຶ່ງ​ໄດ້​ສົ່ງເສີມ​ພາກ​ທຸລະ​ກິດ ແລະ ອຸດສາຫະກຳ ໂດຍ​ການ​ເປີດ​ເສລີ​ທາງ​ການ​ຄ້າ​ກັບ​ຕ່າງປະເທດ​ຫຼາຍ​ຂຶ້ນ. ນອກຈາກ​ນີ້, ລັດຖະບານ ຍັງ​ໃຫ້​ຄວາມ​ສຳຄັນ​ໃນ​ການ​ປັບປຸງ​ແກ້​ໄຂ​ບັນຍາກາດ​ການ​ລົງທຶນ ແລະ ການ​ປະກອບ​ທຸລະ​ກິດ​ໃນ​ປະເທດ ເພື່ອ​ອຳນວຍ​ຄວາມ​ສະດວກ​ໃນ​ການ​ປະກອບ​ທຸລະ​ກິດ ດ້ວຍ​ການ​ຊ່ວຍເຫຼືອ​ທຸລະ​ກິດ​ຂະໜາດ​ກາງ ແລະ ຂະໜາດ​ນ້ອຍ. 
ການ​ດຶງ​ດູດ​ດ້ານ​ການ​ລົງ ທຶນ​ຈາກ​ຕ່າງປະເທດ​ເຂົ້າ​ມາ ເພື່ອ​ໃຫ້​ເປັນ​ໂອກາດ​ໃນ​ການ​ສ້າງ​ວຽກ​ເຮັດ​ງານ​ທຳ ແລະ ການ​ສ້າງ​ລາຍ​ໄດ້​ໃຫ້​ກັບ​ຄົນ​ໃນ​ທ້ອງຖິ່ນ ໂດຍ​ສະເພາະ​ພາກ​ການທ່ອງທ່ຽວ​ຂອງ​ບຣູ​ໄນ ທີ່​ກຳລັງ​ມີ​ການ​ຂະຫຍາຍຕົວ ແລະ ເປັນ​ຈຸດໝາຍ​ປາຍທາງ​ໜຶ່ງ​ຂອງ​ນັກ​ທ່ອງ​ທ່ຽວ​ທີ່​ຈະ​ເຂົ້າ​ມາ​ທ່ຽວ​ໃນ​ພາກ​ພື້ນ​ອາຊີ​ຕາເວັນ​ອອກສ່ຽງ​ໃຕ້.
ບຣູ​ໄນ ມີ​ອຸດສາຫະກຳ​ການ​ຜະລິດ​ອາຫານ, ເຄື່ອງມື​ໃຊ້​ສອຍ, ການ​ຜະລິດ​ເສື້ອ​ຜ້າ​ເພື່ອ​ສົ່ງ​ອອກ​ໄປ​ຕ່າງ​ປະ​ເທດ. ນອກ​ນັ້ນ, ລັດຖະບານ ຍັງ​ພັດທະນາ​ອຸດສາຫະກຳ​ແປ​ຮູບ​ອາຫານ ໂດຍ​ສະເພາະ​ອາຫານ​ຮາ​ລານ ຂອງ​ຊາວ​ມຸ​ສ​ລິ​ມ. ພ້ອມ​ກັນ​ນັ້ນ, ຍັງ​ຜະລິດ​ເຄື່ອງ​ດື່ມ, ວັດ​ສະ​ດຸ​ກໍ່ສ້າງ​ທີ່​ບໍ່​ແມ່ນ​ໂລຫະ, ການ​ຜະລິດ​ແວ່ນ​ລົດ. ສິນ​ຄ້າ​ນໍາ​ເຂົ້າ​ທີ່​ສໍາ​ຄັນ​ແມ່ນ ເຄື່ອງ​ຈັກ​ອຸດ​ສາ​ຫະ​ກໍາ, ລົດ, ເຄື່ອງໃຊ້​ໄຟຟ້າ ແລະ ສິນຄ້າ​ກະ​ສິ​ກໍາ. ສິນຄ້າ​ສົ່ງ​ອອກ​ຕົ້ນຕໍ​ແມ່ນ ນໍ້າ​ມັນ​ດິບ ແລະ ແກັສ​ທຳ​ມະ​ຊາດ, ສັດ​ນໍ້າ, ປ່າ​ໄມ້. ຕະຫຼາດ​ນຳ​ເຂົ້າ​ທີ່​ສຳຄັນ ແມ່ນ​ນຳ​ເຂົ້າ​ຈາກ ຍີ່ປຸ່ນ, ອາ​ຊຽນ, ສ.ເກົາຫຼີ ແລະ ອົສ​ຕຣາ​ລີ. ຕະຫຼາດ​ສົ່ງ​ອອກ​ທີ່​ສຳຄັນ ແມ່ນ​ສົ່ງ​ໄປ​ບັນດາ​ປະເທດ​ອາ​ຊຽນ, ສະຫະພາບ​ເອີ​ຣົບ, ຍີ່ປຸ່ນ ແລະ ສະຫະລັດ​ອາ​ເມ​ຣິ​ກາ. ລວມ​ຍອດ​ຜະລິດ​ຕະ​ພັນ​ພາຍ​ໃນ​ປະເທດ ຫຼື GDP ບັນລຸ 12,13 ຕື້​ໂດ​ລາ (ຂໍ້​ມູນ​ປີ 2017), ອັດຕາ​ການ​ເຕີບ​ໂຕ​ຂອງ​ພົນລະເມືອງ 1,3%, ລາຍ​ໄດ້​ສະເລ່ຍ​ໃສ່​ຫົວ​ຄົນ​ບັນລຸ 28.290 ໂດ​ລາ.  
   ວັນ​ທີ 15 ຕຸລາ 2018, ຄະນະ​ລັດຖະບານ​ບຣູ​ໄນ ສົມ ເດັດ​ພຣະ​ຣາ​ຊາ​ທິ​ບໍດີ ຮັສ​ຊາ​ນັນ ໂບ​ລ​ເກຍ ຊົງ​ຖະແຫຼງ​ເຖິງ​ສາເຫດ​ການ​ປັບ​ຄະນະ​ລັດຖະມົນຕີ ເພື່ອ​ປັບ​ໂຄງ​ສ້າງ​ການ​ເຮັດ​ວຽກ​ສຳລັບ​ການ​ຮັບ​ມື​ກັບ​ສະພາບ​ທາງ​ເສດຖະກິດ​ຂອງ​ປະເທດ ເນື່ອງ​ຈາກ​ວ່າ: ຄ່າ​ພະລັງງານ​ຕົກ​ຕໍ່າ​ໃນ​ໄລຍະ 2-3 ປີ​ທີ່​ຜ່ານ​ມາ ໂດຍ​ການ​ປັບ​ຄະນະ​ລັດຖະມົນຕີ​ຂອງ ບຣູ​ໄນ ແມ່ນ​ມີ​ຂຶ້ນ​ໃນ​ທຸກໆ 5 ປີ ຊຶ່ງ​ຄັ້ງ​ຫຼ້າ​ສຸດ ແມ່ນ​ໃນ​ເດືອນ​ຕຸລາ ປີ 2015. ຫຼັງ​ການ​ປັບ​ຄະນະ​ລັດຖະມົນຕີ, ລັດຖະບານ ກໍໄດ້​ສະເໜີ​ຮ່າງ​ງົບປະມານ​ປະຈຳ​ປີ 2018-2019 ຕໍ່​ລັດ​ຖະ​ສະ​ພາ. ຮ່າງ​ງົບປະມານ​ດັ່ງກ່າວ ໄດ້​ເພີ່ມ​ເງິນ​ໃນ​ພາກ​ເສດຖະກິດ​ທີ່​ບໍ່​ແມ່ນ​ພະລັງງານ ໂດຍ​ສະເພາະ​ການ​ເນັ້ນ​ພາກ​ເສດຖະກິດ ICT, ກະສິກຳ ແລະ ການທ່ອງທ່ຽວ ເພື່ອ​ເປັນ​ການ​ເພີ່ມ​ມູນ​ຄ່າ​ຂອງ​ລວມ​ຍອດ​ລາຍ​ຮັບ​ພາຍ​ໃນ​ປະເທດ (GDP). ພ້ອມ​ກັນ​ນັ້ນ, ລັດຖະບານ ຍັງ​ມຸ່ງ​ໝັ້ນ​ໃນ​ການ​ປະສານ ແລະ ເຮັດ​ວຽກ​ຮ່ວມ​ກັບ​ພາກ​ເອກະ​ຊົນ ເພື່ອ​ໄປ​ສູູ່​ເປົ້າ​ໝາຍ​ວິໄສ​ທັດ ບຣູ​ໄນ 2035. ຮ່າງ​ງົບປະມານ​ສະໜັບສະໜູນ​ໂຄງການ​ທີ່​ກ່ຽວຂ້ອງ​ກັບ​ເຕັກ​ໂນ​ໂລ​ຊີ​ສະໄໝ​ໃໝ່​ຕ່າງໆ​ເຊັ່ນ: ລະບົບ e-invoice, ລະບົບ Smart-Q ເປັນຕົ້ນ ລວມ​ໄປ​ເຖິງ​ການ​ສົ່ງເສີມ​ກິດ​ຈະ​ກໍາ​ການ​ກະ​ສິ​ກໍາ ແລະ ການ​ທ່ອງ ທ່ຽວ ຊຶ່ງ​ຈະ​ເປັນ​ພາກ​ເສດຖະກິດ​ທີ່​ສາມາດ​ສ້າງ​ເງິນ​ໄດ້​ຫຼາຍ.
ສປປ ລາວ ແລະ ບຣູ​ໄນ ດາ​ຣູ​ຊາ​ລາມ ສ້າງຕັ້ງ​ສາຍ​ພົວ ພັນ​ທາງ​ການ​ທູດ​ນຳ​ກັນ ໃນ​ວັນ​ທີ 27 ກໍລະກົດ ປີ 1993. 
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110