ໃນວັນທີ 30 ທັນວາ ຜ່ານ​ມາ ທີ່ສະໂມສອນຂອງເມືອງໂຂງໄດ້ຈັດພິທີປະກາດບ້ານຢຸດຕິການຖ່າຍຊະຊາຍ ,ໂດຍການເປັນປະທານຂອງທ່ານ ໂສມ ບຸດຕະກຸນ ຄະນະປະຈຳພັກແຂວງ ຮອງເຈົ້າແຂວງຈຳປາສັກ ຜູ້ຊີ້ນໍາວຽກງານ ຂົງເຂດວັດທະນະທຳ-ສັງຄົມ, ທ່ານ ນາງ ຄຳພູ ລິດທິສັກ ກຳມະການພັກແຂວງ ເລຂາພັກເມືອງ ເຈົ້າເມືອງໂຂງ ມີບັນດາທ່ານໃນຄະນະບໍລິຫານງານພັກເມືອງ ,ຕາງໜ້າພະແນກສາທາລະນະສຸກ, ຫ້ອງການສາທາລະນະສຸກເມືອງ ເລຂາຮາກຖານ 9 ກຸ່ມບ້ານ ແລະ ປະຊາຊົນເຂົ້າຮ່ວມ.

 ບັນດາບ້ານທີ່ປະກາດເປັນບ້ານຢຸດຕິການຖ່າຍຊະຊາຍ, ບ້ານທີີເອົາໃຈໃສ່ຈັດຕັ້ງປະຕິບັດວຽກງານຊຸມຊົນເປັນເຈົ້າການດ້ານສຸຂະອະນາໄມ ໃນໄລຍະຜ່ານມາ ໂດຍແມ່ນຊຸມຊົນເອງເປັນເຈົ້າການ ແລະ ຜ່ານການກວດກາປະເມີນຜົນຂອງຄະນະກຳມະການທຸກພາກສ່ວນ ຂັ້ນເມືອງ ແລະ ບ້ານ ທັງ 54 ບ້ານ ໂດຍເຫັນວ່າມີຜົນສຳເລັດຈິ່ງສາມາດປະກາດຢຸດຕິການຖ່າຍຊະຊາຍດັ່ງນີ້: ບ້ານດອນເດດຕາເວັນຕົກ, ບ້ານດອນຕາຍຕາເວັນຕົກ, ບ້ານດອນຕານຕາເວັນອອກ, ບ້ານດອນແອນ, ບ້ານດອນຊົມ, ບ້ານຫາງຄອນ, ​ບ້ານທໍລະທີ, ບ້ານດອນເປືອຍ, ບ້ານນາງຄັວດ, ບ້ານທ່າໂພໃຕ້, ບ້ານສາລາ, ບ້ານມ່ວງ, ບ້ານທ່າຂາມ, ບ້ານແກ້ງກຸ່ມ, ບ້ານທ່າພ້າວ, ບ້ານຫົວລົບປາກດີ, ບ້ານໂພນທັນ, ບ້ານລົບປາກດີກາງ, ບ້ານຄອນນ້ອຍ, ບ້ານນາຄອນ, ບ້ານຈົ໋ກ, ບ້ານໂພຕາກ, ບ້ານດອນໂຈນ, ບ້ານດອນສຳໂຮງ, ບ້ານຫົວຈະເໝົາ, ບ້ານພູແມວ, ບ້ານກ້ວຍວາງ, ບ້ານຫາງຂະເໝົາ, ບ້ານຈະເໝົາກາງ, ບ້ານຈະເໝົາປາກເຊ, ບ້ານດົງ, ບ້ານໂຂງເໜືອ, ບ້ານໂຂງໃຕ້, ບ້ານດອນເດັກໄຟ, ບ້ານຫາງຮີ, ບ້ານຮີເວີນ, ບ້ານຫາງດອນກອຍ, ບ້ານຮີນາຄອນ, ບ້ານສົງເປືອຍ, ບ້ານນາໜອງເຫ້ຍ, ບ້ານດອນຫວດ, ບ້ານຫີນຮອງ, ບ້ານນາລານ, ບ້ານຫົວສັນ, ບ້ານສັນບ້ານໂພ, ບ້ານໂພສີ, ບ້ານຫົວພິມານ, ບ້ານ0ພິມານໂພນ, ບ້ານເພື່ອເໜືອ, ບ້ານເພື່ອໃຕ້, ບ້ານອາຍເໜືອ, ບ້ານແສນໃຕ້, ບ້ານຫາດຊາຍຄູນ ແລະ ບ້ານນາກະສັງ ແລະ ບ້ານແບບຢ່າງທາງດ້ານສາທາລະນະສຸກຄື: ບ້ານນາລານ ແລະ ບ້ານດອນສຳໂຮງ.

ທ່ານ   ພົງສະຫວັດ ສີພົງສັກ ຮອງຫົວໜ້າຫ້ອງການສາທາລະນະສູກເມືອງ ຍົກໃຫ້ເຫັນຜົນງານດ້ານດີ.ຂໍ້ຄົງຄ້າງ. ພ້ອມທິດທາງແຜນການທີ່ຈະໄດ້ສູ້ຊົນສຸມໃສ່ຈັດຕັ້ງປະຕິບັດໃນຕໍ່ໜ້າ. ຈາກນັ້ນ, ກໍ່ໄດ້ມອບໃບຢັ້ງຢືນໃຫ້ 54 ບ້ານ ແລະ ທ່ານຮອງເຈົ້າແຂວງ ໄດ້ໂອລົມເພື່ອເປັນການຊີ້ທິດເຍືອງທາງໃນການນຳພາວຽກງານສາທາລະນະສຸກ ພາຍໃນເມືອງໃຫ້ມີຄວາມກ້າວໜ້າ ຂະຫຍາຍຕົວ ສ້າງບ້ານແບບຢ່າງສາທາລະນະສຸກ ໃຫ້ເພີ່ມຂຶ້ນທາງດ້ານປະລິມານ ແລະ ຄຸນນະພາບ ເນັ້ນໃຫ້ນຳພາປະຊາຊົນເຫັນໄດ້ຄວາມສຳຄັນເຂົ້າຮ່ວມວຽກງານຮັກສາ ແລະ ສົ່ງເສີມສຸຂະພາບ ຢ່າງເປັນເຈົ້າການສູງຂຶ້ນ ຫັນປຽ່ນວິຖີຊີວິດແບບໃໝ່ ປ້ອງກັນໃຫ້ໄດ້ພະຍາດຕາມລະດູການ ແລະ ພະຍາດໂຄວິດ-19 ທັງນີ້ກໍ່ເພື່ອເຮັດໃຫ້ປະຊາຊົນ ມີສຸຂະພາບເຂັ້ມແຂງ-ແຂງແຮງທາງດ້ານຮ່າງກາຍ, ຈິດໃຈ ແລະ ມີຄວາມຜາສຸກ.

      ຈາກ​ນັ້ນ, ທ່ານຮອງເຈົ້າແຂວງພ້ອມແຂກທຸກພາກສ່ວນກໍ່ໄດ້ໃຫ້ກຽດຕັດແຖບຜ້າ ລັ່ນຕ້ອງ 9 ບາດ ເພື່ອເປັນສີລິມຸງຄຸນ ອີກດ້ວຍ.

ຂ່າວ:ເມືອງໂຂງ