​                                 ໂ​ດຍ: ບຸນ​ຕອມ

ປັດຈຸບັນຫຼາຍສະຖານທີ່ທ່ອງທ່ຽວ​ຢູ່​ບັນ​ດາ​ແຂວງ​ພາກ​ເໜືອ​ຂອງ​ລາວ ໄດ້ກະກຽມຄວາມພ້ອມຮອບດ້ານ ເພື່ອຕ້ອນຮັບນັກທ່ອງທ່ຽວພາຍ​ໃນ ແລະ ຕ່າງປະເທດ ພາຍຫຼັງທີ່ລັດຖະບານໄດ້ມີມາດຕະການຜ່ອນຜັນ ມາດຕະການປ້ອງກັນໂຄວິດ-19 ແລະ ເປີດຕ້ອນຮັບນັກທ່ອງທ່ຽວຕ່າງປະເທດເຂົ້າມາທ່ອງທ່ຽວ ສປປ ລາວ ໃນເຂດທ່ອງທ່ຽວສີຂຽວ ແລະ ເສັ້ນ​ທາງ​ທ່ອງ​ທ່ຽວ​ສີ​ຂຽວ.

ທ່ານ ໝອກສະຫັວນ ຈິດຕະວົງ ເຈົ້າຂອງສະຖານທີ່ທ່ອງທ່ຽວຖໍ້າອ່າງຫຼວງ ເມືອງວັງວຽງ ແຂວງວຽງຈັນ ໃຫ້ສຳພາດວ່າ: ສະຖານທີ່ທ່ອງທ່ຽວຖໍ້າອ່າງຫຼວງເປັນສະຖານທີ່ທ່ອງທ່ຽວທຳມະຊາດທີ່ສວຍງາມ ແລະ ໄດ້ຮັບຄວາມນິຍົມຈາກນັກທ່ອງທ່ຽວທັງພາຍໃນ ແລະ ຕ່າງປະເທດ ​ໄດ້​ເປັນ​ຢ່າງ​ດີພາຍຫຼັງມີການລະບາດຂອງພະຍາດໂຄວິດ-19 ໃນປີ 2021 ນີ້ ຊຶ່ງເປັນຮອບທີ່ໜັກໜ່ວງກວ່າຮອບທີ່ຜ່ານມາ ສະນັ້ນ, ຈຶ່ງໄດ້ປິດກິດຈະການຊົ່ວຄາວເປັນເວລາດົນພໍສົມຄວນ ໃນໄລຍະທີ່ປິດກິດຈະການຊົ່ວຄາວກໍໄດ້ມີການປັບປຸງຫຼາຍຢ່າງເຊັ່ນ ປັບປຸງຂົວ ຮັກສາພື້ນທີ່ໃຫ້ເປັນພື້ນທີ່ສີຂຽວ ຮັກສາຄວາມສະອາດຂອງສາຍນໍ້າ ລວມທັງກິດຈະກຳການທ່ອງທ່ຽວ.

ພາຍຫຼັງລັດຖະບານໄດ້ມີມາດຕະການຜ່ອນຜັນ ມາດຕະການປ້ອງກັນໂຄວິດ-19 ແລະ ເປີດຕ້ອນຮັບນັກທ່ອງທ່ຽວຕ່າງປະເທດ ກໍເປັນຂ່າວດີສຳລັບຜູ້ປະກອບການດ້ານບໍລິການເປັນຕົ້ນແມ່ນ ກິດຈະການທ່ອງທ່ຽວ ພ້ອມດຽວກັນນັ້ນ ກໍໄດ້ກະກຽມຄວາມພ້ອມຮອບດ້ານໃນການຕ້ອນນັກທ່ອງທ່ຽວທັງພາຍ​ໃນ ແລະ ຕ່າງປະເທດ ປັດຈຸບັນພ້ອມເປີດໃຫ້ບໍລິການທ່ອງທ່ຽວແລ້ວ ສຳລັບກິດຈະກຳທີ່ນັກທ່ອງທ່ຽວໃຫ້ຄວາມສົນໃຈຫຼາຍແມ່ນການລົງຫຼິ້ນນໍ້າ ເນື່ອງຈາກວ່າເປັນນໍ້າທີ່ສະອາດສີຂຽວ ແລະ ຂີ່ສະລິ່ງ ພ້ອມກັນນັ້ນຍັງສະໜອງສະຖານທີ່ໃຫ້ແກ່ນັກທ່ອງທ່ຽວຈັດກິດຈະກຳຕ່າງໆຕື່ມອີກ ແລະ ສາມາດນຳອາຫານເຂົ້າມາໄດ້.

      ໂອກາດນີ້ເຊີນຊວນນັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າມາທ່ອງທ່ຽວໃນຖໍ້າອ່າງຫຼວງ ເພື່ອຜ່ອນຄາຍໄປກັບທຳມະຊາດທີ່ງົດງາມ ອາກາດທີ່ເຢັນສົດຊື່ນ ສະຖານທີ່ແຫ່ງນີ້ຢູ່ຫ່າງຈາກຕົວເມືອງວັງວຽງປະມານ 8 ກິໂລແມັດ ເຖິງແມ່ນຈະເປີດໃຫ້ບໍລິການນັກທ່ອງທ່ຽວແລ້ວ ແຕ່ພວກເຮົາກໍມີມາດຕະການເພື່ອປ້ອງກັນພະຍາດໂຄວິດ-19 ຢ່າງເຂັ້ມງວດຄື ກ່ອນຈະເຂົ້າສະຖານທ່ອງທ່ອງ​ນັກ​ທ່ອງທ່ຽວຕ້ອງ​ມີ​ໃບ​ຢັ້ງ​ຢືນໄດ້ສັກວັກຊິນຄົບ, ວັດແທກອຸນຫະພູມ, ລ້າງມືໃສ່​ເຈວ ແລະ ໃສ່ຜ້າປິດປາກ-ດັງ ທັງນີ້ກໍເພື່ອຄວາມປອດໄພຂອງຜູ້ໃຫ້ບໍລິການ ແລະ ຜູ້​ມາໃຊ້ບໍລິການ​ອື່ນໆ.