ຫວ່າງ​ແລ້ວນີ້, ຄະນະນຳພະແນກສຶກສາທິການ ແລະ ກິລາແຂວງຫຼວງພະບາງ ນຳໂດຍ ທ່ານ ນາງ ບົວລອຍ ອິດທິພອນ ຮອງຫົວໜ້າພະແນກ ສຶກສາທິການ ແລະ ກິລາແຂວງ ໄດ້ລົງຕິດຕາມຊຸກຍູ້ວຽກງານການກະກຽມຄວາມພ້ອມ ໃນການເປີດການຮຽນ-ການສອນຄືນໃໝ່ ປະຈຳສົກຮຽນ 2021-2022 ທົ່ວເມືອງ ຊຶ່ງມີຄະນະຫ້ອງການສຶກສາທິການ ແລະ ກິລາເມືອງ ພ້ອມດ້ວຍຜູ້ອຳນວຍການໂຮງຮຽນປະຖົມ, ມັດທະຍົມຕົ້ນ, ມັດທະຍົມປາຍເຂົ້າຮ່ວມ.

 ທ່ານ ນາງ ຈັນສະໝຸດ ສຸກຂະເສີມ ຫົວໜ້າຫ້ອງການສຶກສາທິການ ແລະ ກິລາເມືອງ ໄດ້ລາຍງານໃຫ້ຮູ້ວ່າ: ສົກຮຽນ 2021-2022 ທົ່ວເມືອງມີໂຮງຮຽນທັງໝົດ 88 ແຫ່ງ. ໃນນີ້, ຫ້ອງລ້ຽງເດັກ 1 ຫ້ອງ, ອະນຸບານ 10 ແຫ່ງ, ຫ້ອງກຽມປະຖົມ 26 ແຫ່ງ, ມູນລະປະຖົມ 11 ແຫ່ງ, ປະຖົມສົມບູນ 60 ແຫ່ງ, ມັດທະຍົມຕົ້ນ 4 ແຫ່ງ ແລະ ມັດທະຍົມສົມບູນ 3 ແຫ່ງ, ໄລຍະຜ່ານມາຫຼາຍໂຮງຮຽນໄດ້ເປັນສູນກັກຕົວ ແລະ ປິ່ນປົວຜູ້ຕິດເຊື້ອພະຍາດໂຄວິດ-19 ມີ 3 ແຫ່ງ, ມາເຖິງປັດຈຸບັນໄດ້ຮັບການອະນາໄມຊີດຢາຂ້າເຊື້ອເພື່ອນຳໃຊ້ເຂົ້າໃນການຮຽນ-ການສອນແບບ​ເຊິ່ງ​ໜ້າ. ສຳລັບພະນັກງານຄູມີ 340 ຄົນ ຍິງ 196 ຄົນ, ໄດ້ຮັບການສັກວັກຊິນຄົບໂດສທຸກຄົນ ແລະ ໄດ້ຮັບເຂັມກະຕຸ້ນເຂັມທີ 3 ແລ້ວຈຳນວນ 193 ຄົນ ຍິງ 81 ຄົນ, ມີນັກຮຽນທັງໝົດ 6.354 ຄົນ ຍິງ 2.969 ຄົນ, ສະເພາະນັກຮຽນໃນເກນອາຍຸ 12-17 ປີ ໄດ້ຮັບວັກຊິນແລ້ວຈຳນວນ 1.754 ຄົນ ຍິງ 845 ຄົນ, ຕະຫຼອດໄລຍະຜ່ານມາ ຄະນະນຳຂອງເມືອງ ກໍຄືຄະນະສະເພາະກິດຂັ້ນເມືອງ ໄດ້ລົງປະເມີນຕາມຮ່າງ 10 ມາດຕະການ ແລະ 40 ຂໍ້ແນະນໍາ ຂອງກະຊວງສາທາລະນະສຸກວາງອອກ ເພື່ອໃຫ້ສາມາດບັນລຸໄດ້ຕາມເປົ້າໝາຍ ພ້ອມທັງມີຄວາມພ້ອມຮອບດ້ານ ໃນການທີ່ຈະຈັດການຮຽນ-ການສອນຄືນໃໝ່ໃນທຸກຊັ້ນຮຽນໄດ້.

ໂອກາດນີ້, ທ່ານ ນາງ ບົວລອຍ ອິດທິພອນ ໄດ້ນຳເອົາອຸປະກອນການແພດ ເພື່ອປ້ອງກັນພະຍາດໂຄວິດ-19 ຈໍານວນໜຶ່ງ ມອບໃຫ້ຫ້ອງການສຶກສາທິການ ແລະ ກິລາເມືອງ ເພື່ອມອບຕໍ່ໃຫ້ໂຮງຮຽນໃນທົ່ວເມືອງ ຊຶ່ງປະກອບມີ ສະບູ່, ເຈວລ້າງມື ແລະ ເຄື່ອງວັດແທກອຸນຫະພູມ. ພ້ອມດຽວກັນນີ້, ທ່ານຍັງໄດ້ຮຽກຮ້ອງໃຫ້ພະນັກງານຄູ ຈົ່ງພ້ອມກັນສືບຕໍ່ຈັດຕັ້ງປະຕິບັດການຮຽນ-ການສອນໃຫ້ສຳເລັດ ໂດຍຄຽງຄູ່ກັບການປະຕິບັດມາດຕະການປ້ອງກັນ ແລະ ຄວບຄຸມການແຜ່ລະບາດພະຍາດໂຄວິດ-19 ເພື່ອໃຫ້ການດໍາເນີນການຮຽນ-ການສອນ ແບບເຊິ່ງໜ້າໃຫ້ໄດ້ເປັນປົກກະຕິ ແລະ ມີຄວາມປອດໄພ ຈາກພະຍາດໂຄວິດ-19.

(ຂ່າວ-ພາບ: ສອນອາຄົມ ແກ້ວຄຳເພັດ)