ສະຫະພັນແມ່ຍິງຮາກຖານ ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແຂວງເຊກອງ ໄດ້​ຈັດ​ພິ​ທີ​ຮັບ​ຮອງ​ເອົາ ສະຫະພັນແມ່ຍິງພະແນກ ເປັນສະຫະພັນແມ່ຍິງ 3 ດີ ໄລຍະປີ 2020-2021 ແລະ ເປີດບັ້ນແຂ່ງຂັນ 3 ດີ ໄລຍະປີ 2022-2023 ຂຶ້ນ​ເມື່ອບໍ່​ດົນ​ມານີ້ ທີ່​ພະ​ແນກ​ດັ່ງ​ກ່າວ ໂດຍການເຂົ້າຮ່ວມຂອງທ່ານ ນາງ ມະນີວອນ ສາຍນໍ້າລິນ ຮອງປະທານສະຫະພັນແມ່ຍິງແຂວງ, ມີທ່ານ ນາງ ວຽງສະໄໝ ວົງວິຈິດ ຄະນະພັກຮາກຖານ ຮອງຫົວໜ້າພະແນກ ຖວທ ແຂວງ, ມີຂະແໜງການກ່ຽວຂ້ອງເຂົ້າຮ່ວມ.

    ທ່ານ ນາງ ພອນດາແກ້ວ ບຸນທະວີ ປະທານແມ່ຍິງຮາກຖານພະນແນກ ຖວທ ໄດ້ສະຫຼຸບຕີລາຄາການຈັດຕັ້ງປະຕິບັດວຽກງານ 3 ດີ ໄລຍະປີ 2020-2021 ໃຫ້ຮູ້ວ່າ: ສະຫະພັນແມ່ຍິງຮາກຖານພະແນກ ຖວທ ມີສະມາຊິກທັງໝົດ 29 ຄົນ, ໄດ້ແບ່ງອອກເປັນ 3 ຈຸ ໃນການສໍາຫຼວດກວດກາ ຊຶ່ງໃນໄລຍະຜ່ານມາຄະນະສະຫະພັນແມ່ຍິງຮາກຖານໄດ້ເອົາໃຈໃສ່ສຶກສາອົບຮົມການເມືອງແນວຄິດໃຫ້ເອື້ອຍນ້ອງແມ່ຍິງຢ່າງເປັນປົກກະຕິ, ຄົ້ນຄວ້າສ້າງແຜນເຄື່ອນໄຫວໃນການສ້າງຂະບວນການແຂ່ງຂັນ 3 ດີຂັ້ນຂອງຕົນຢ່າງເປັນລະບົບໃນແຕ່ລະໄລຍະ ໂດຍໄດ້ຈັດຕັ້ງເຜີຍແຜ່ເນື້ອໃນຄໍາຂວັນ, ຂໍ້ແຂ່ງຂັນ 3 ດີ, ມາດຖານຄັດເລືອກສະມາຊິກ, ຄັດເລືອກໜ່ວຍພາຍໃນຮາກຖານ ຊຶ່ງມີຜູ້ເຂົ້າຮ່ວມ 55 ຄົນ ຍິງ 29 ຄົນ, ເຂົ້າຮ່ວມເຊື່ອມຊຶມເອກະສານສໍາຄັນຂອງພັກ-ຂອງຊາດ ມີ 5 ຄັ້ງ ມີຜູ້ເຂົ້າຮ່ວມທັງໝົດ 268 ເທື່ອຄົນ ຍິງ 212 ເທື່ອຄົນ. ນອກນີ້, ຍັງໄດ້ສ້າງກຸ່ມທ້ອນເງິນ, ມີສະມາຊິກ 31 ຄົນ, ມີເງິນຝາກທັງໝົດ 10 ລ້ານກວ່າກີບ. ຜ່ານການຈັດຕັ້ງປະຕິບັດຂະບວນການແຂ່ງຂັນ 3 ດີ ໃນໄລຍະ 2 ປີຜ່ານມາສາມາດເລືອກໄດ້ສະມາຊິກ 3 ດີ ປະເພດ I ມີ 27 ຄົນ, ປະເພດ II ມີ 2 ຄົນ; ພ້ອມດຽວກັນກໍໄດ້ເປີດບັ້ນເຊື່ອມຊຶມ, ແຂ່ງຂັນ  3 ດີ ໄລຍະປີ 2022-2023 ຕື່ມອີກ.

      ໂອກາດນີ້, ທ່ານ ນາງ ມະນີວອນ ສາຍນໍ້າລິນ ໄດ້ໂອ້ລົມໃຫ້ທິດຊີ້ນໍາຕໍ່ຄະນະຮາກຖານ ຕ້ອງໄດ້ເອົາໃຈໃສ່ສຶກສາອົບຮົມດ້ານການເມືອງ-ແນວຄິດໃຫ້ແກ່ສະມາຊິກ, ປຸກລະດົມສະມາຊິກເຂົ້າຮ່ວມຂະບວນການຕ່າງໆ ເພື່ອເຮັດໃຫ້ສະມາຊິກມີຄວາມຮັບຮູ້, ເຊື່ອມຊຶມ, ມີຄຸນທາດການເມືອງທີ່ໜັກແໜ້ນ, ມີຄວາມເຊື່ອໝັ້ນຕໍ່ການນໍາພາຂອງພັກ-ລັດ, ຕ້ອງເພີ່ມທະວີຄວາມສາມັກຄີເປັນເອກະພາບພາຍໃນໃຫ້ໜັກແໜ້ນ, ພາຍນອກໃຫ້ກວ້າງຂວາງ, ເອົາໃຈໃສ່ປະຕິບັດລະບຽບຂອງສະຫະພັນແມ່ຍິງວາງອອກໃຫ້ເຂັ້ມງວດ, ຕັ້ງໜ້າເຮັດໜ້າທີ່ວິຊາສະເພາະດ້ວຍຄວາມຮັບຜິດຊອບ ແລະ ມີຜົນສໍາເລັດສູງ, ສະມາຊິກທຸກສະຫາຍຕ້ອງໄດ້ເພີ່ມທະວີຄວາມເປັນເຈົ້າການໃນການປະຕິບັດຂໍ້ແຂ່ງຂັນ 3 ດີ ຄຽງຄູ່ກັບການປະຕິບັດໜ້າທີ່ວິຊາສະເພາະ.

(ຂ່າວ-ພາບ: ພຸດທະສອນ)