ທ່ານ ໂພໄຊ ໄຊຍະສອນ ກຳມະການສູນກາງພັກ ເລຂາພັກແຂວງ ເຈົ້າແຂວງສາລະວັນ, ທ່ານ ຂັນໄຊ ລັດຖະເຮົ້າ ຄະນະປະຈຳພັກແຂວງ ປະທານສະມາຄົມມິດຕະພາບ ລາວ-ຫວຽດນາມ ແຂວງສາລະວັນ ພ້ອມຄະນະ ໄດ້ຕ້ອນຮັບ ທ່ານ ຫງວຽນວັນຈຸງ ທີ່ໄດ້ຮັບການແຕ່ງຕັ້ງເປັນກົງສູນໃຫຍ່ ແຫ່ງສາທາລະນະລັດ ສັງຄົມນິຍົມ ຫວຽດນາມ ປະຈຳນະຄອນປາກເຊ ແຂວງຈຳປາສັກ ພ້ອມຄະນະ ທີ່ຫ້ອງຮັບຮອງຂອງແຂວງສາລະວັນ ຫວ່າງບໍ່ດົນຜ່ານມານີ້ ໂດຍມີພາກສ່ວນທີ່ກ່ຽວຂ້ອງເຂົ້າຮ່ວມ.

ການມາຢ້ຽມຢາມຄັ້ງນີ້ ກໍເພື່ອເປັນການອວຍພອນຊຶ່ງກັນ ແລະ ກັນ ເນື່ອງໃນໂອກາດປີ          ໃໝ່ສາກົນ ຄ.ສ 2022 ແລະ ເສີມສ້າງສາຍພົວພັນມິດຕະພາບ ແລະ ຮັດແໜ້ນຄວາມສາມັກຄີແບບພິເສດທີ່ເຄີຍມີມາແຕ່ດົນນານ ສອງຊາດລາວ-ຫວຽດນາມ ອີກດ້ວຍ. ພ້ອມທັງໄດ້ມີການລາຍງານສະພາບລວມໂດຍຫຍໍ້ຂອງແຂວງສາລະວັນ ຕໍ່ກັບການພັດທະນາເສດຖະກິດ-ສັງຄົມ, ບັນດາພື້ນຖານການຜະລິດຕ່າງໆ ເປັນຕົ້ນການຜະລິດກະສິກຳຂອງປະຊາຊົນ ທີ່ເປັນທ່າແຮງສຳຄັນຂອງແຂວງ ຕິດພັນກັບການແກ້ໄຂຄວາມທຸກຍາກຂອງປະຊາຊົນ ແລະ ການພົວພັນຮ່ວມມືຢ່າງກົມກຽວລະຫວ່າງ ລາວ-ຫວຽດນາມ ກໍຄືແຂວງສາລະວັນ ກັບບັນດາແຂວງຕ່າງໆຂອງ ສສ ຫວຽດນາມ ໃຫ້ແໜ້ນແຟ້ນຂຶ້ນເລື້ອຍໆ ແລະ ການປະຕິບັດວຽກງານປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19. ໃນໄລຍະຜ່ານມານີ້ກໍມີຫຼາຍໂຄງການທີ່ນັກລົງທຶນຫວຽດນາມ ເຂົ້າມາລົງທຶນຢູ່ພາຍໃນແຂວງສາລະວັນ ມີປະມານຫຼາຍກວ່າ 10 ໂຄງການ ໂດຍສະເພາະແມ່ນເນັ້ນໃສ່ດ້ານກະສິ ກຳເປັນຫຼັກ ເຊັ່ນ: ການປູກ, ການປຸງແຕ່ງ, ການບໍລິການ ແລະ ອື່ນໆ.

ໂອກາດດຽວກັນນັ້ນ, ທ່ານ ໂພໄຊ ໄຊຍະສອນ ກໍໄດ້ສະເໜີຕໍ່ກົງສູນໃຫຍ່ ແຫ່ງ ສສຫວຽດນາມ ປະຈຳນະຄອນປາກເຊ ຊ່ວຍຊຸກຍູ້ບັນດານັກທຸລະກິດຈາກ ສສ ຫວຽດນາມ ເຂົ້າມາລົງທຶນໃນແຂວງສາລະວັນຫຼາຍຂຶ້ນ ໂດຍເລັ່ງໃສ່ການສົ່ງເສີມດ້ານການປູກ-ການລ້ຽງ, ການສ້າງຜະລິດຕະພັນອຸດສາຫະກຳປຸງແຕ່ງຂອງສອງແຂວງ ກໍຄືຂອງສອງຊາດລາວ-ຫວຽດນາມ ແລະ ການບໍລິການ-ການທ່ອງທ່ຽວ ໃຫ້ນັບມື້ນັບຫຼາຍຂຶ້ນເລື້ອຍໆ ເພື່ອເຮັດໃຫ້ບັນຍາກາດການລົງທຶນ, ການຮ່ວມມືມີຄວາມຟົດຟື້ນ ແລະ ກາຍເປັນທ່າແຮງຊຸກຍູ້ການພັດທະນາເສດຖະກິດ-ສັງຄົມ ຮ່ວມກັນ.

(ຂ່າວ-ພາບ: ສິດຕາ ເພັດວົງສາ)