ກົມພາສີ ກະຊວງການເງິນ ໄດ້​ຈັດກອງ​ປະ​ຊຸມສະຫຼຸບຕີລາຄາການຈັດຕັ້ງປະຕິບັດວຽກງານວິຊາສະເພາະໃນການຄຸ້ມຄອງ ແລະ ຕ້ານການຮົ່ວໄຫຼຂອງລາຍຮັບງົບປະມານແຫ່ງລັດ ປະຈໍາປີ 2021,  ກໍານົດທິດທາງແຜນການ ແລະ ມາດຕະການ ປະຈໍາປີ 2022 ຂອງຂະແໜງພາສີ ຂຶ້ນໃນ​ວັນ​ທີ 13 ມັງກອນ ນີ້ ໂດຍ​ການ​ເປັນ​ປະ​ທານ​ຂອງ ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ, ມີທ່ານ ພູເຂົາຄໍາ ວັນນະວົງໄຊ ຫົວໜ້າກົມພາສີ ແລະ ພາກ​ສ່ວນ​ກ່ຽວ​ຂ້ອງຮ່ວມ.

ໃນກອງປະຊຸມໄດ້ຜ່ານບົດສະຫຼຸບຕີລາຄາການຈັດຕັ້ງປະຕິບັດວຽກງານວິຊາສະເພາະປະຈໍາປີ 2021, ໃນການຈັດຕັ້ງປະຕິບັດວາລະແຫ່ງຊາດໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ກໍານົດທິດທາງແຜນການ ແລະ ມາດຕະການປະຈໍາປີ 2022 ຂອງຂະແໜງພາສີ ຊຶ່ງທ່ານ ພູເຂົາຄໍາ ວັນນະວົງໄຊ ໄດ້ລາຍງານໂດຍສັງເຂບ ຄວາມຄືບໜ້າໃນການຈັດຕັ້ງປະຕິບັດວາລະແຫ່ງຊາດ ໂດຍສະເພາະການຈັດຕັ້ງປະຕິບັດຄໍາສັ່ງນາຍົກລັດຖະມົນຕີ ສະບັບເລກທີ 18/ນຍ, ລົງວັນທີ 16 ກັນຍາ 2021 ວ່າດ້ວຍການເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼຂອງລາຍຮັບງົບປະມານແຫ່ງລັດ ແລະ ຄໍາສັ່ງນາຍົກລັດຖະມົນຕີ ສະບັບເລກທີ 20/ນຍ, ລົງວັນທີ 8 ຕຸລາ 2021 ວ່າດ້ວຍການກວດກາ ແລະ ປະຕິບັດມາດຕະການຕໍ່ຜູ້ທີ່ນໍາເຂົ້າ ແລະ ນໍາໃຊ້ຍານພາຫະນະທຸກປະເພດແບບບໍ່ຖືກຕ້ອງ ແລະ ບັນດານິຕິກໍາຂອງກະຊວງການເງິນທີ່ຕິດພັນກັບວາລະແຫ່ງຊາດ.

ນອກຈາກນັ້ນ, ດ້ານການຈັດເກັບລາຍຮັບປີ 2021 ກົມພາສີໄດ້ຮັບແຜນຈັດເກັບລາຍຮັບ 8.200 ຕື້​ກີບ, ປະຕິບັດໄດ້ 6.982 ຕື້​ກີບ ​ເທົ່າ​ກັບ 85,15% ຂອງແຜນການປີສົມທຽບໄລຍະດຽວເພີ່ມຂຶ້ນ 7,66% ເທົ່າກັບ 486 ຕື້ກີບ. ໃນນັ້ນ, ແຂວງທີ່ປະຕິບັດໄດ້ລື່ນແຜນມີແຂວງສະຫວັນນະເຂດປະຕິບັດໄດ້ລື່ນແຜນການປີ 92,01 ຕື້ກີບ, ແຂວງຫຼວງນໍ້າທາ ລື່ນແຜນການ 62,82 ຕື້ກີບ, ແຂວງອັດຕະປື ປະຕິບັດໄດ້ລື່ນແຜນການ 9,13 ຕື້ກີບ ແລະ ແຂວງຫົວພັນ ປະຕິບັດໄດ້ລື່ນແຜນການ 0,81 ຕື້ກີບ.

ກອງປະຊຸມໄດ້ຮັບຟັງການໂອ້ລົມ ຂອງທ່ານລັດຖະມົນຕີກະຊວງການເງິນ ຊຶ່ງທ່ານໄດ້ຊີ້ນຳບາງບັນຫາທີ່ຂະແໜງພາສີຄວນເອົາໃຈໃສ່ໃນການຈັດຕັ້ງປະຕິບັດໃຫ້ສຳເລັດເປັນຕົ້ນ ໃຫ້ເພີ່ມທະວີການເຊື່ອມຊຶມ ແລະ ເປັນເຈົ້າການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການຈັດຕັ້ງປະຕິບັດ ຄໍາສັ່ງເລກທີ 18/ນຍ ເພື່ອສ້າງທ່າຫັນປ່ຽນໃໝ່ໃນການຈັດຕັ້ງປະຕິບັດວຽກງານພາສີ ໃຫ້ເລິກເຊິ່ງ ແຂງແຮງຮອບດ້ານ, ເອົາໃຈໃສ່ຄຸ້ມຄອງການນໍາເຂົ້ານໍ້າມັນເຊື້ອໄຟ ເພື່ອຕ້ານປະກົດການຫຍໍ້ທໍ້ໃນການລັກລອບນໍາເຂົ້າ ແລະ ຫັນເອົາຫົວໜ່ວຍທຸລະກິດທີ່ນໍາເຂົ້ານໍ້າມັນເຊື້ອໄຟໃຫ້ປະຕິບັດຖືກຕ້ອງຕາມແຈ້ງການເລກທີ 4491/ກງ, ສູ້ຊົນຫັນເອົາບັນດາຫົວໜ່ວຍທຸລະກິດນໍາເຂົ້າ-ສົ່ງອອກໃຫ້ເຂົ້າສູ່ລະບຽບການ ແລະ ສົ່ງເສີມໃຫ້ມີການແຂ່ງຂັນຂອງບັນດາຫົວໜ້າທຸລະກິດທີ່ປະຕິບັດຖືກຕ້ອງຕາມກົດໜາຍ ໂດຍໄດ້ຮັບນະໂຍບາຍອໍານວຍຄວາມສະດວກໃນການນໍາເຂົ້າ-ສົ່ງອອກ ສິນຄ້າຕາມຄໍາແນະນໍາກະຊວງການເງິນ ເລກທີ 4490/ກງ  ແລະ ເລກທີ 5916/ກງ, ສືບຕໍ່ປັງປຸງໂຄງຮ່າງການຈັດຕັ້ງໃຫ້ສໍາເລັດ ແນໃສ່ເພື່ອສ້າງກົນໄກໃໝ່ໃນການບັນຊາຊີ້ນໍາລັດຖະການພາສີໃຫ້ກະທັດຮັດ, ໂລ່ງລ່ຽນ, ແທດເຖິງ ຕາມຄໍາສັ່ງຂອງຄະນະເລຂາທິການສູນກາງພັກ ເລກທີ 190/ຄລສພ, 29 ກັນຍາ 2021, ປະຕິຮູບຄຸນນະພາບຂອງພະນັກງານ, ຂອງຂະແໜງພາສີ ໃຫ້ໄດ້ມາດຖານເງື່ອນໄຂ ເພື່ອຮອງຮັບການຂະຫຍາຍຕົວທາງດ້ານເສດຖະກິດ-ສັງຄົມ ເປັນຕົ້ນການຂົນສົ່ງເຄື່ອນຍ້າຍສິນຄ້າທາງລົດໄຟ ແລະ ການເປີດບໍລິການນໍາໃຊ້ທາງບົກ, ຍົກສູງວຽກງານຝຶກອົບຮົມ-ຍົກລະດັບວິຊາສະເພາະ ເພື່ອປັບປຸງບຸກຄະລາກອນຂອງຂະແໜງພາສີໃຫ້ມີຄວາມເຂັ້ມແຂງ.

(ຂ່າວ-ພາບ: ກະ​ຊວງ​ການ​ເງິນ)