ຜູ້ໂດຍສານທີ່ມີຈຸດປະສົງໃຊ້ບໍລິການລົດໄຟທຸກທ່ານເພື່ອຄວາມສະດວກໃຫ້ຜູ້ໂດຍສານ,ທາງບໍລິສັດ ຈຶ່ງໄດ້ມີການປັບປຸງການບໍລິການຂົນສົ່ງຜູ້ໂດຍສານໃຫ້ດີຂຶ້ນ,  ບໍລິສັດ ທາງລົດໄຟລາວ-ຈີນ ໄດ້ພິຈາລະນາປັບປຸງໄລຍະເວລາການຊື້ປີ້ລ່ວງໜ້ານັບແຕ່ວັນທີ 14 ມັງກອນ 2022 ເປັນຕົ້ນໄປ, ຈາກໄລຍະການຊື້ລ່ວງໜ້າ 2 ມື້ (ໝາຍເຖິງຊື້ກ່ອນ 1 ມື້ ລວມທັງມື້ເດີນທາງ) ມາເປັນ 3 ມື້ (ໝາຍເຖິງຊື້ກ່ອນ 2 ມື້ ລວມທັງມື້ເດີນທາງ) ເພື່ອອຳນວຍຄວາມສະດວກ ແລະ ​ຕອບ​ສະ​ໜອງ​ຄວາມ​ຕ້ອງ​ການໃນການ​ເດີນ​ທາງ​ຂອງ​ຜູ້ໂດຍສານ​ຫຼາຍ​ຂຶ້ນ​.

      ປັດຈຸບັນ ລົດໄຟລາວ-ຈີນ ຍັງສາມາດຊື້ປີ້ເດີນທາງຕາມສະຖານີໄດ້ (ຕົວຢ່າງ: ຫາກຈະເດີນທາງຈາກແຂວງຫຼວງພະບາງ-ແຂວງອຸດົມໄຊ, ສາມາດຊື້ປີ້ຈາກສະຖານີນະຄອນຫຼວງວຽງຈັນ ຫຼື ສະຖານີອື່ນໆໄດ້) ແລະ ຍັງຈະໄດ້ມີການປັບປຸງປີ້ລົດໄຟໃຫ້ພຽງພໍຕໍ່ຄວາມຕ້ອງການຂອງຜູ້ໂດຍສານ. ພ້ອມດຽວກັນນີ້ ທາງບໍລິສັດ ຈຶ່ງແຈ້ງເຕືອນມາຍັງປະຊາຊົນທຸກຄົນຊື້ປີ້ຜ່ານປ່ອງຂາຍປີ້ຂອງແຕ່ລະສະຖານີຕ່າງໆເທົ່ານັ້ນ, ກະລຸນາຢ່າເຊື່ອຂໍ້ມູນ ຫຼື ຊື້ປີ້ຈາກທາງນອກຢ່າງເດັດຂາດ ເພື່ອປ້ອງກັນບໍ່ໃຫ້ຖືກຕົວະ ແລະ ກໍ່ໃຫ້ເກີດຄວາມເສຍຫາຍເກີດຂຶ້ນໄດ້.

      ຂໍຂອບໃຈສໍາລັບການສະໜັບສະໜູນຂອງຜູ້ໂດຍສານທຸກໆທ່ານ ບໍລິສັດຂອງພວກເຮົາຈະພະຍາຍາມປັບປຸງການບໍລິການໃຫ້ມີຄຸນນະພາບດີຂຶ້ນ, ເພື່ອໃຫ້ການເດີນທາງຂອງທ່ານມີຄວາມສະດວກສະບາຍຫຼາຍຂຶ້ນ.

(ແຫຼ່ງຂໍ້ມູນ ຈາກ ບໍລິສັດ ທາງລົດໄຟລາວ-ຈີນ)