ຂ່າວຕ່າງປະເທດລາຍງານໃນວັນທີ 13 ມັງກອນ, ກະຊວງແຮງງານສະຫະລັດອາເມລິກາລາຍງານວ່າ:ດັດຊະນີລາຄາຜູ້ບໍລິໂພກຂອງສະຫະລັດໄດ້ເພີ່ມສູງຂຶ້ນ 7% ໃນເດືອນທັນວາປີຜ່ານມາ ເມື່ອທຽບໃສ່ປີກ່ອນ ຊຶ່ງຖືເປັນລະດັບການເພີ່ມຂຶ້ນສູງສຸດໃນຮອບ 40 ປີ.

ໂຕເລກດັດຊະນີລາຄາທີ່ເພີ່ມຂຶ້ນ 7% ນີ້ສູງກວ່າລະດັບ 6,8% ຂອງເດືອນພະຈິກປີຜ່ານມາ ຊຶ່ງນັກວິເຄາະເຊື່ອວ່າເປັນຍ້ອນຄວາມຕ້ອງການທີ່ເພີ່ມຂຶ້ນ ບວກກັບບັນຫາການຂາດແຄນສິນຄ້າ ເນື່ອງຈາກປັດໃຈທີ່ກ່ຽວຂ້ອງກັບການແພ່ລະບາດຂອງພະຍາດ ໂຄວິດ-19 ເຮັດໃຫ້ລາຄາສິນຄ້າປະເພດຕ່າງໆເພີ່ມຂຶ້ນ ລວມທັງລົດ, ເຟີນີເຈີ, ອາຫານ ແລະ ນ້ຳມັນເຊື້ອໄຟ.

ກ່ອນຫນ້ານີ້, ລະບົບທະນາຄານກາງສະຫະລັດ ຫຼື Federal Reserve ໄດ້ຄາດຄະເນວ່າ ອັດ ຕາເງິນເຟີ້ໃນສະຫະລັດ ຈະຢູ່ໃນລະດັບສູງຕໍ່ເນື່ອງຕະຫຼອດປີ 2022, ໂດຍ Fed ໄດ້ໃຫ້ສັນຍານວ່າ: ຈະໃຊ້ມາດຕະການເພື່ອເຮັດໃຫ້ອັດຕາເງິນເຟີ້ຊ້າລົງ ໂດຍການຢຸດຕິການຊື້ພັນທະບັດກະຊວງການເງິນທີ່ມີເປົ້າໝາຍເພື່ອແນໃສ່ການອຸດໜູນເງິນເຂົ້າສູ່ລະບົບເສດຖະກິດ ພ້ອມທັງອາດຈະຂຶ້ນອັດຕາດອກເບ້ຍຂອງລັດຖະບານໄວກວ່າແຜນການເດີມ.

ທ່ານເຈີໂຣມ ພາວເວວ ປະທານທະນາຄານກາງສະຫະລັດ ກ່າວຕໍ່ຄະນະກຳມາທິການຂອງລັດ ຖະສະພາສະຫະລັດໃນວັນທີ 11 ມັງກອນທີ່ຜ່ານມາວ່າ: ການຫຼຸດລະດັບລາຄາສິນຄ້າໃຫ້ລົງມາຢູ່ທີ່ຈຸດທີ່ຫມັ້ນ ຄືກຸນແຈສໍາຄັນໃນການຟື້ນຟູເສດຖະກິດອາເມລິກາໃນໄລຍະຍາວ. ທ່ານພາວເວວກ່າວວ່າ: “ຖ້າອັດຕາເງິນເຟີ້ຍັງຢູ່ໃນລະດັບສູງອີກຕໍ່ໄປ ແລະ ກາຍເປັນສ່ວນໜຶ່ງຂອງເສດຖະກິດ ອາດຈະເຮັດໃຫ້ທະ ນາຄານກາງຕ້ອງໃຊ້ນະໂຍບາຍການເງິນທີ່ເຄັ່ງຄັດຫຼາຍຂຶ້ນ ຊຶ່ງອາດຈະເຮັດໃຫ້ເສດຖະກິດຕົກຢູ່ໃນສະ ພາບຖົດຖອຍ ແລະ ຈະບໍ່ເປັນຜົນດີຕໍ່ຕະຫຼາດແຮງງານເຊັ່ນກັນ.

ເສດຖະກິດສະຫະລັດ ມີການຈ້າງງານເພີ່ມຂຶ້ນ 6,4 ລ້ານຕໍ່າແໜ່ງໃນປີກາຍນີ້. ອັດຕາການຫວ່າງງານຫຼຸດລົງຈາກລະດັບ 6,3% ໃນຕົ້ນປີທີ່ຜ່ານມາ ລົງມາເຫຼືອ 3,9% ໃນເດືອນທັນວາ. ໃນຂະນະທີ່ລາຍໄດ້ຂອງຄົນງານທົ່ວໄປເພີ່ມຂຶ້ນ 5,8%, ແຕ່ລາຄາສິນຄ້າປະເພດຕ່າງໆສືບຕໍ່ເພີ່ມຂຶ້ນ.

ສະຖິຕິຂອງລັດຖະບານສະຫະລັດ ສະແດງໃຫ້ເຫັນວ່າ ຜູ້ຂັບລົດຕ້ອງໄດ້ຈ່າຍຄ່ານ້ຳມັນເພີ່ມຂຶ້ນ 58% ໃນປີກາຍນີ້. ໃນຂະນະທີ່ລາຄາລົດມືສອງເພີ່ມຂຶ້ນ 31%, ລາຄາລົດໃຫມ່ເພີ່ມຂຶ້ນ 11%, ລາຄາຊີ້ນ. ປາ ແລະ ສັດປີກ ເພີ່ມຂຶ້ນ 13% ແລະ ລາຄາເຟີນີເຈີ ເພີ່ມຂຶ້ນ 12%.