ຫົວ​ຂໍ້ : ປີ 2022 ລາຍໄດ້ຕໍ່ຫົວຄົນຂອງແອັສໂຕນີ ຈະຢູ່ໃນ 5 ອັນດັບສູງສຸດຂອງເອີຣົບ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 25/02/2020 09:01:06 ຈຳ​ນວນ​ຜູ້​ເຂົ້າ​ຢ້ຽມ​ຊົມ 372 ຄັ້ງ

ຮຽບຮຽງ: ລຸ້ງ​ດາວ ບຸນ​ມີ

  ແ​ອັສ​ໂຕ​ນີ ມີ​ຊື່​ທາງ​ການ​ແມ່ນ ສາທາລະນະ​ລັດ ແ​ອັສ​ໂຕ​ນີ, ມີ​ເນື້ອ​ທັງ​ໝົດ 45.228 ກິໂລ​ຕາ​ແມັດ, ຕັ້ງ​ຢູ່​ເຂດ​ທະເລ​ບານ​ຕິກ​ຂອງ​ທະວີບ​ເອີ​ຣົບ​ເໜືອ, ມີ​ຊາຍ​ແດນ​ທາງ​ດ້ານ​ເໜືອ​ຕິດ​ກັບ ອ່າວ​ແຟັງ​ລັງ. ສ່ວນ​ດ້ານ​ຕາເວັນຕົກ​ຕິດ​ກັບ ທະເລ​ບານ​ຕິກ, ທາງ​ດ້ານ​ໃຕ້​ຕິດ​ກັບ ລັດ​ເວຍ ແລະ ທາງ​ດ້ານ​ຕາເວັນ​ອອກ​ຕິດ​ກັບ ຣັດ​ເຊຍ, ມີ​ຊາຍ​ແດນ​ທາງ​ທະເລ​ຕິດ​ກັບ ຊູ​ແອັດ, ມີ​ນະຄອນຫຼວງ​ແມ່ນ ຕານ​ລິນ.
  ສະພາບ​ພູ​ມີ​ປະເທດ ເຕັມ​ໄປ​ດ້ວຍ​ອ່າງ​ນ້ຳ ແລະ ເປັນ​ທົ່ງ ພຽງ​ທາງ​ເໜືອ, ທາງ​ໃຕ້​ເຕັມ​ໄປ​ດ້ວຍ​ພູ. ສ່ວນ​ສະພາບ​ອາ​ອາດ ມີ​ລັກສະນະ​ອາກາດ​ແບບ​ທະເລຊາຍ, ປຽກ​ຊຸ່ມ ແລະ ຍາມ​ຮ້ອນ​ອາກາດ​ເຢັນ​ສະ​ບາຍ.  ຊັບພະຍາກອນ​ທຳ​ມະ​ຊາດ​ມີ ແຜ່ນ​ຫີນ​ຜາ, ຖ່ານ​ຫີນ, ກົດ​ຟອສ​ຟໍ​ຣັສ, ຫີນ​ປູນ, ຊາຍ, ໂດ​ໂລ​ໄມ (ແຮ່​ຊະນິດ​ໜຶ່ງ), ມີ​ເນື້ອທີ່​ດິນ​ເໝາະ​ກັບ​ການ​ປູກຝັງ ແລະ ຂີ້ຕົມ​ໃຕ້​ທະເລ.  ປະເທດ​ນີ້, ກ້າວໜ້າ​ທາງ​ດ້ານ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ ແລະ ໂທລະ​ຄົມ​ມະນາຄົມ, ລະບົບ​ປະຕິບັດ​ການ e-govermemt.  ອຸດ​ສາ​ຫະ​ກໍາ​ຕົ້ນຕໍ​ຂອງ​ປະເທດ​ມີ ວິສະວະກຳ, ເອ​ເລັກ​ໂຕ​ຣ​ນິກ, ໄມ້, ແຜ່ນ​ແພ, ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ ແລະ ໂທລະ​ຄົມ​ມະ​ນາ​ຄົມ. ຊັບພະຍາກອນ​ທຳ​ມະ​ຊາດ​ທີ່​ສຳຄັນ​ມີ ນ້ຳມັນ​ປີ​ໂຕ​ຣ​ລຽມ ຈາກ​ຊັ້ນ​ດິນ (Oil shale), ຟອສ​ຟໍ​ຣັສ, ປ່າໄມ້, ແຮ່​ຢູ​ເຣ​ນຽມ. ສິນຄ້າ​ສົ່ງ​ອອກ​ທີ່​ສຳຄັນ​ມີ ເຄື່ອງ​ຈັກ ແລະ ສ່ວນ​ປະກອບ, ໄມ້ ແລະ ຜະລິດ​ຕະ​ພັນ​ຈາກ​ໄມ້, ໂລຫະ, ເຟີ​ນີ​ເຈີ, ພາຫະນະ ແລະ ສ່ວນ​ປະກອບ​ຜະລິດ​ຕະ​ພັນ​ກະສິກຳ, ອາຫານ​ແປ​ຮູບ, ຜະລິດ​ຕະ​ພັນ​ແຜ່ນແພ ແລະ ພ​ລາ​ສ​ຕິກ.  
  ປະເທດ​ນີ້ ເປັນ​ຜູ້​ຜະລິດ​ເຮືອນ​ໄມ້ ເພື່ອ​ສົ່ງ​ອອກ​ໄປ​ປະເທດ​ເອີ​ຣົບ, ເຮັດ​ໃຫ້ ແ​ອັສ​ໂຕ​ນີ ກາຍເປັນ​ປະເທດ​ຜູ້​ຜະລິດ​ເຮືອນ​ໄມ້​ສົ່ງ​ອອກ​ປະສົບ​ຄວາມ​ສຳເລັດ​ໃນ​ເອີ​ຣົບ. ໃນ​ຫຼາຍ​ປີ​ມາ​ນີ້, ຂະແໜງ​ຜະລິດ​ເຮືອນ​ໄມ້​ສົ່ງ​ອອກ​ຂາຍ​ດີ​ຢ່າງ​ສະໝ່ຳສະເໝີ ແລະ ເຮັດ​ໃຫ້​ມູນ​ຄ່າ​ການ​ສົ່ງ​ອອກ​ເພີ່ມ​ຂຶ້ນ​ຢ່າງ​ຕໍ່​ເນື່ອງ. ປັດຈຸບັນ ມີ​ພຽງ 6 ປະເທດ​ທີ່​ສົ່ງ​ອອກເຮືອນ​ໄມ້​ຫຼາຍ​ກວ່າ ແ​ອັສ​ໂຕ​ນີ ເຊັ່ນ: ເຢຍ​ລະ​ມັນ, ອັງກິດ, ຊູ​ແອັດ, ແຟັງ​ລັງ, ໂອ​ຕຣິດ ແລະ ອີ​ຕາ​ລີ. ທ່ານ ສະ​ເວນ ແມັດ ປະທານ​ສະມາຄົມ​ເຮືອນ​ໄມ້​ຂອງ ແອັສ​ໂຕ​ນີ ກ່າວ​ວ່າ: ພວກ​ເຮົາ​ໄດ້​ຕັ້ງ​ເປົ້າ​ໝາຍ​ໃຫ້​ເປັນ​ຜູ້​ຜະລິດ​ເຮືອນ​ໄມ້ ໃນ 5 ອັນ​ດັບ​ຂອງ​ໂລກ. ແ​ອັສ​ໂຕ​ນີ ມີ​ປະເພນີ​ການ​ຜະລິດ​ເຮືອນ​ຈາກ​ທ່ອນ​ໄມ້​ກົມ​ມາ​ຫຼາຍ​ສະຕະ​ວັດ. ພວກ​ເຂົາ​ໄດ້​ສ້າງ​ຖຽງນາ ແລະ ໂຮງສີ​ຈາກ​ໄມ້​ສົນ, ມີ​ເຮືອນ​ເຮັດ​ຈາກ​ໄມ້​ກົມ​ສ້າງ​ຢູ່ ແອັສ​ໂຕ​ນີ ມາ​ໄດ້​ຫຼາຍ​ກວ່າ 300 ປີ. ລັດຖະບານ​ວາງ​ເປົ້າ​ໝາຍ​ໄວ້​ວ່າ:  ເມື່ອ​ຮອດ​ປີ 2022 ລາຍ​ໄດ້​ຕໍ່​ຫົວ​ຄົນ​ຂອງ​ປະຊາຊົນ ແ​ອັສ​ໂຕ​ນີ ຈະ​ຢູ່​ໃນ 5 ອັນ​ດັບ​ສູງ​ສຸດ​ຂອງ​ສະຫະພາບ​ເອີ​ຣົບ. ລວມ​ຍອດ​ຜະລິດ​ຕະ​ພັນ​ພາຍ​ໃນ​ປະເທດ​ບັນລຸ 25,92 ຕື້​ໂດ​ລາ (ທະນາຄານ​ໂລກ 2017), ລາຍ​ໄດ້​ສະເລ່ຍ​ໃສ່​ຫົວ​ຄົນ​ບັນລຸ 19.700 ກວ່າ​ໂດ​ລາ​ຕໍ່​ຄົນ​ຕໍ່​ປີ (ຂໍ້​ມູນ​ປີ 2017), ອັດຕາ​ການ​ຂະຫຍາຍຕົວ​ຂອງ​ລວມ​ຍອດ​ຜະລິດ​ຕະ​ພັນ​ພາຍ​ໃນ (GDP) 4,9%.
  ສາທາລະນະ​ລັດ ປະຊາ ທິປະໄຕ ປະຊາຊົນ​ລາວ ແລະ ສ.ແ​ອັສ​ໂຕ​ນີ ສ້າງຕັ້ງ​ສາຍ​ພົວ ພັນ​ທາງ​ການ​ທູດ​ນຳ​ກັນ ໃນ​ວັນ​ທີ  29 ມີນາ ປີ 1995.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110