ກອງພົນທີ 2 ໄດ້ຈັດການແຂ່ງຂັນກິລາຍິງປືນມິດຕະພາບຊີງຂັນປະທານ ປກຊ-ປກສ ແຂວງໄຊ​ຍະ​ບູ​ລີ ເພື່ອຂໍ່ານັບຮັບຕ້ອນວັນສ້າງຕັ້ງກອງທັບປະຊາຊົນລາວ ຄົບຮອບ 73 ປີ ຂຶ້ນຫວ່າງ​ບໍ່ດົນ​ມານີ້ ໂດຍການເຂົ້າຮ່ວມຂອງ ສະຫາຍ ພົງສະຫວັນ ສິດທະວົງ ປະທານປ້ອງກັນຊາດ-ປ້ອງກັນຄວາມສະຫງົບແຂວງ ເຈົ້າແຂວງໄຊຍະບູລີ, ມີບັນດາສະຫາຍຄະນະພັກ, ຄະນະບັນຊາກອງພົນທີ 2, ກອງບັນຊາການທະຫານແຂວງ ແລະ ພາກ​ສ່ວນ​ກ່ຽວ​ຂ້ອງເຂົ້າຮ່ວມ.

    ການຈັດຕັ້ງແຂ່ງຂັນກິລາຍິງປືນໃນຄັ້ງນີ້, ເພື່ອແນໃສ່ສ້າງຂະບວນການຂໍ່ານັບຮັບຕ້ອນບັນດາວັນສໍາຄັນຕ່າງໆ ຂອງຊາດ ຂອງກອງທັບ ເວົ້າລວມ ເວົ້າສະເພາະ ວັນສ້າງຕັ້ງກອງທັບປະຊາຊົນລາວ ຄົບຮອບ 73 ທີ່ຈະມາເຖິງນີ້ ໃຫ້ມີບັນຍາກາດຟົດຟື້ນມ່ວນຊື່ນ ແລະ ກວ້າງຂວາງ ເພື່ອໃຫ້ພະນັກງານການນໍາໄດ້ທົບທວນການນໍາໃຊ້ອາວຸດໃຫ້ມີຄວາມຊຳນິ, ຊຳນານ ເພື່ອປ້ອງກັນຕົວ ແລະ ແກ້ໄຂກໍລະນີສຸກເສີນ ໃຫ້ມີປະສິດທິຜົນສູງ ແລະ ​ສ້າງຄວາມສາມັກຄີອັນແໜ້ນແຟ້ນ ລະຫວ່າງ​ນັກ​ກິ​ລາດ້ວຍກັນໃຫ້ດີຂຶ້ນເລື້ອຍໆ.

ການແຂ່ງຂັນໃນຄັ້ງນີ້, ໄດ້ແບ່ງອອກເປັນ 2 ປະເພດຄື:  ປະເພດປືນກົນມື AK ຍິງເປົ້າຈານເຫຼັກ ແລະ ປະເພດປືນສັ້ນ K-59 ຍິງເປົ້າໝາຍຄົງທີ່ ຊຶ່ງມີນັກກິລາເຂົ້າຮ່ວມທັງໝົດ 9 ທີມ.

  (ຂ່າວ-ພາບ: ສຸວັນໂນ ທະລັງສີ)