ໃນທ້າຍອາທິດຜ່ານມານີ້, ທ່ານ ບຸນແຝງ ພູມມະໄລສິດ ລັດຖະມົນຕີ ກະຊວງສາທາລະນະສຸກ ໄດ້ລົງເຄື່ອນໄຫວຢ້ຽມຢາມ ແລະ ຕິດຕາມເບິ່ງໂຄງການກໍ່ສ້າງສູນຈຳກັດບໍລິເວນຂອງແຂວງສາລະວັນ ຊຶ່ງທ່ານໄດ້ເນັ້ນໃຫ້ພາກສ່ວນທີ່ກ່ຽວຂ້ອງເອົາໃຈໃສ່ຕິດຕາມ, ກວດກາໜ້າວຽກຕ່າງໆ ພ້ອມທັງເລັ່ງດໍາເນີນໂຄງການກໍ່ສ້າງດັ່ງກ່າວ ໃຫ້ສຳເລັດຕາມໄລຍະເວລາ, ຖືກຕາມແບບ ແລະ ມາດຕະຖານ, ແນໃສ່ຮັບໃຊ້ວຽກງານດັ່ງກ່າວຢ່າງຮີບດ່ວນ ເພື່ອຮັບປະກັນໃຫ້ແກ່ການຈຳກັດບໍລິເວນ, ການປິ່ນປົວຜູ້ຕິດເຊື້ອພະຍາດໂຄວິດ-19 ໃຫ້ປອດໄພ. ຈາກນັ້ນ, ທ່ານກໍໄດ້ຕິດຕາມເບິ່ງຈຸດກໍ່ສ້າງອາຄານ, ພາຍໃນອາຄານ ແລະ ແບບແຜນຜັງການຈັດວາງຕຽງນອນຄົນເຈັບ, ເຮືອນພັກແພດ ແລະ ການສາທິດຮູບແບບການເຂົ້າປິ່ນປົວຕື່ມອີກ.

ໂຄງການກໍ່ສ້າງສູນດັ່ງກ່າວ, ຕັ້ງຢູ່ເຂດບ້ານໜອງບູ່ຫີນ ເມືອງສາລະວັນ ໃນເນື້ອທີ່ 11,3 ເຮັກຕາ ຊຶ່ງໄດ້ເລີ່ມຈັດຕັ້ງປະຕິບັດມາແຕ່ເດືອນພະຈິກ 2021 ມາຮອດປັດຈຸບັນ ສໍາເລັດແລ້ວ 53,94% ເປັນຕົ້ນແມ່ນ ການກໍ່ສ້າງອາຄານຈໍາກັດບໍລິເວນ ເບີ 1, ເຮືອນພັກແພດ, ຫ້ອງນໍ້າ, ປ້ອມຍາມ, ບ່ອນຖິ້ມຂີ້ເຫຍື້ອ ແລະ ອ່າງນ້ຳສູງ, ພ້ອມທັງຕິດຕັ້ງລະບົບໄຟຟ້າ, ພັດລົມ ແລະ ອື່ນໆ ທັງສືບຕໍ່ເກັບລາຍລະອຽດໃນໜ້າວຽກຕ່າງໆ ເຊັ່ນ: ວຽກຕິດຕັ້ງ, ທາສີ, ອະນາໄມອາຄານ. ສຳລັບການດຳເນີນການກໍ່ສ້າງໂຄງການດັ່ງກ່າວ ແມ່ນສືບຕໍ່ກໍ່ສ້າງອາຄານ ຈຳກັດບໍລິເວນ ເບີ 2, ອາຄານປິ່ນປົວພາກສະໜາມ, ວຽກກໍ່ສ້າງຮົ້ວ, ວຽກໄຟຟ້ານອກອາຄານ ແລະ ໜ້າວຽກປັບເດີ່ນ ຄາດຈະໃຫ້ສໍາເລັດ 100% ໃນເດືອນທັນວາ 2022 ຊຶ່ງມີມູນຄ່າການກໍ່ສ້າງທັງໝົດ 6,5 ຕື້ກີບ, ໃນນັ້ນທຶນຂອງກະຊວງສາທາລະນະສຸກ 6 ຕື້ກີບ ແລະ ທຶນສົມທົບຂອງແຂວງ 500 ລ້ານກີບ.

ການລົງເຄື່ອນໄຫວຢ້ຽມຢາມ ຂອງທ່ານລັດຖະມົນຕີກະຊວງສາທາລະນະສຸກ ພ້ອມດ້ວຍຄະນະຄັ້ງນີ້, ໂດຍການຕ້ອນຮັບ ແລະ ນຳພາຂອງ ທ່ານ ອາຄົມ ລ່ຳວິຈິດ ຫົວໜ້າພະແນກສາທາລະນະສຸກແຂວງສາລະວັນ ພ້ອມດ້ວຍຄະນະ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

(ຂ່າວ-ພາບ: ວິໄລວອນ ສິດທິໄຊ)