ໃນລະຫວ່າງ ວັນທີ 17-18 ມັງກອນນີ້ ທີ່ສະໂມສອນເມືອງຈອມເພັດ ແຂວງຫຼວງພະບາງ ໄດ້ຈັດກອງປະຊຸມການສ້າງແຜນກໍານົດພະນັກງານນໍາພາ-ຄຸ້ມຄອງ (ຂັ້ນແຂວງຄຸ້ມຄອງ) ຂອງເມືອງຈອມເພັດ ແຕ່ປີ 2021-2025 ໂດຍການເປັນປະທານຂອງ ສະຫາຍ ຄໍາຄອງ ພົມມະປັນຍາ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງຫຼວງພະບາງ, ມີສະຫາຍ ສາຍສະໝອນ ສາລິວົງ ເລຂາພັກເມືອງ ເຈົ້າເມືອງຈອມເພັດ, ພະແນກການກ່ຽວຂ້ອງຂັ້ນແຂວງ, ມີຄະນະປະຈຳ-ກຳມະການພັກເມືອງ, ຫົວໜ້າ-ຮອງຫົວໜ້າຫ້ອງການ ແລະ ພະນັກງານ-ລັດຖະກອນ, ຕະຫຼອດຮອດອົງການປົກຄອງບ້ານອ້ອມຂ້າງເມືອງເຂົ້າຮ່ວມ.

ວາລະກອງປະຊຸມ ສະຫາຍ ນາງ ສົມສະໝອນ ຄຳສຸກສະຫວັດ ຄະນະປະຈຳພັກເມືອງ ຫົວໜ້າຄະນະຈັກຕັ້ງເມືອງ ໄດ້ຂຶ້ນຜ່ານມະຕິກົມການເມືອງສູນກາງພັກ ວ່າດ້ວຍມາດຕະຖານຂອງພະນັກງານນໍາພາ-ຄຸ້ມຄອງ, ຜ່ານມະຕິກົມການເມືອງສູນກາງພັກ ວ່າດ້ວຍ ວຽກງານສ້າງແຜນກໍານົດພະນັກງານນໍາພາ-ຄຸ້ມຄອງ, ຄໍາແນະນໍາຄະນະຈັດຕັ້ງສູນກາງພັກ ກ່ຽວກັບການຈັດຕັ້ງປະຕິບັດມະຕິຂອງກົມການເມືອງສູນກາງພັກ ວ່າດ້ວຍມາດຕະຖານຂອງພະນັກງານນໍາພາ-ຄຸ້ມຄອງ, ວຽກງານຄຸ້ມຄອງພະນັກງານ ແລະ ວຽກງານສ້າງແຜນກໍານົດພະນັກງານນໍາພາ-ຄຸ້ມຄອງ ເພື່ອເຮັດໃຫ້ການສ້າງແຜນການນໍາພາ-ຄຸ້ມຄອງຂອງເມືອງຈອມເພັດ ໄດ້ຮັບການຈັດຕັ້ງປະຕິບັດ ໃຫ້ສອດຄ່ອງຕາມຫຼັກການຕາມມາດຖານ-ເງື່ອນໄຂທີ່ກໍານົດໄວ້, ພ້ອມດຽວກັນນີ້  ຕາງໜ້າຄະນະຈັດຕັ້ງແຂວງໄດ້ຂຶ້ນຜ່ານມະຕິກົມການເມືອງ ເລກທີ 032 ວ່າດ້ວຍມາດຖານເງື່ອນໄຂຂອງພະນັກງານນຳພາຄຸ້ມຄອງ ພ້ອມທັງອະທິບາຍຊີ້ແຈງກ່ຽວກັບວິທີການ ແລະ ຂັ້ນຕອນໃນການທາບທາມ ໂດຍໄດ້ເຮັດເປັນ 3 ຮອບ, ເພື່ອເຮັດໃຫ້ສ້າງແຜນກໍານົດພະນັກງານ ໄດ້ມີການຄາດຄະເນເປົ້າໝາຍ ພະນັກງານທີ່ຈັດວາງເຂົ້າໃນຕໍາແໜ່ງງານພະນັກງານນຳພາ-ຄຸ້ມຄອງ ໃນແຕ່ລະຂະແໜງການ ແນໃສ່ຮັບປະກັນລັກສະນະສືບທອດປ່ຽນແທນ ຕໍ່ເນື່ອງໃນສະເພາະໜ້າ ແລະ ຍາວນານ, ເລືອກໃຫ້ໄດ້ພະນັກງານທີ່ມີຄຸນທາດການເມືອງໜັກແໜ້ນ, ມີຄຸນນະພາບ, ມີຄວາມຮູ້ຄວາມສາມາດ, ມີທັດສະນະທີ່ດີເປັນແບບຢ່າງໃຫ້ແກ່ມະຫາຊົນ ເພື່ອເປັນພະນັກງານສືບທອດປ່ຽນແທນໃນຕໍ່ໜ້າຂອງເມືອງໃຫ້ນັບມື້ນັບດີຂຶ້ນເທື່ອລະກ້າວ.

(ຂ່າວ-ພາບ: ຕາດຳ ກະເສີມສຸກ)