ສະ­ມາ­ຄົມ ລາວ​-​ໄທ ເພື່ອ​ມິດ­ຕະ­ພາບ ຮ່ວມກັບ ສະ­ຖານ​ເອກ​ອັກ​ຄະ​ຣາ​ຊະ​ທູດ​ແຫ່ງ​ຣາ​ຊະ​ອາ­ນາຈັກ​ໄທ ປະ­ຈຳ ​ສປປ ລາວ ແລະ ອົງ­ການ​ປົກ­ຄອງເມືອງ​ຫາດ​ຊາຍ​ຟອງ ໄດ້ຈັດກິດ­ຈະ­ກຳ​ປູກຕົ້ນໄມ້ ມິດຕະພາບ ເພື່ອ​ປະ­ກອບ­ສ່ວນ​​ໃນ​ການ​ສະເຫຼີມ­ສະ­ຫຼອງ​ວັນ​ສ້າງ­ຕັ້ງ​ສາຍ​ພົວພັນການ​ທູດ​ລາວ​-​ໄທ ຄົບ­ຮອບ 70 ປີ.

 ພິ​ທີ​ປູກ​ຕົ້ນ​ໄມ້​ດັ່ງ​ກ່າວມີ​ຂຶ້ນ​ໃນ​ວັນ​ທີ 19 ມັງ​ກອນ 2022 ທີ່​ເມືອງ​ຫາດ​ຊາຍ​ຟອງ ນະ​ຄອນຫຼວງວຽງ​ຈັນ ໂດຍ​ມີ ທ່ານ ສົມພອນ ສີຈະເລີນ ຮອງຫົວໜ້າຄະນະພົວພັນຕ່າງປະເທດສູນກາງພັກ, ມີ ທ່ານ​ຮອງ​ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ, ທ່ານ​ເອກ​ອັກ​ຄະ​ຣາ​ຊະ​ທູດ​ໄທ ປະ​ຈຳ ລາວ, ມີ​ພາກ​ສ່ວນ​ກ່ຽວ​ຂ້ອງ​ເຂົ້າ​ຮ່ວມ.

ຕົ້ນໄມ້ທີ່ເອົາມາປູກໃນຄັ້ງນີ້ ມີ​ຊື່​ພາສາລາວເອີ້ນວ່າ “ຕົ້ນຄາຍປ່າ” ແລະ ພາສາ​​ໄທເອີ້ນວ່າ “ຕົ້ນ​ກັນ​ລະ​ປະ​ພຶກ”  ຈຳ­ນວນ 140 ຕົ້ນ ໃນນັ້ນ, ຝ່າຍ​ລາວ 70 ຕົ້ນ ແລະ ຝ່າຍ​ໄທ 70 ຕົ້ນ ຊຶ່ງ​​ເປັນ​ສັນ­ຍາ​ລັກວັນສ້າງຕັ້ງສາຍພົວພັນການທູດ ລາວ-ໄທ ຄົບ­ຮອບ 70 ປີ. ຕົ້ນໄມ້ດັ່ງກ່າວຈະໄດ້ປູກລຽບຕາມແຄມທາງ ແຕ່ບ້ານຊຽງຄວນລົງຮອດບ້ານທ່າພະ, ຄາດວ່າອີກປະມານ 3 ປີ ຕົ້ນໄມ້ເຫຼົ່ານີ້ກໍຈະອອກດອກເປັນສີບົວ ຊຶ່ງຈະເຮັດໃຫ້ບໍລິເວນເສັ້ນທາງດັ່ງກ່າວມີຄວາມສວຍງາມ.

ປີ 2020 ຜ່ານ​ມາ ​ເປັນ​ປີ​ຄົບ­ຮອບວັນສ້າງຕັ້ງ​ສາຍ​ພົວ­ພັນ​ການ​ທູດ ລາວ​-​ໄທ ຄົບ­ຮອບ 70 ປີ (19 ທັນ­ວາ 1950-19 ທັນ­ວາ 2020), ແຕ່​ຍ້ອນ​ມີສະພາບ​ການ​ແຜ່​ລະ­ບາດ​ຂອງ​ພະ­ຍາດ​ໂຄ​ວິດ-19 ຈຶ່ງ​ເຮັດ​ໃຫ້ກິດ​ຈະ​ກຳ​ດັ່ງ​ກ່າວບໍ່​ສາ­ມາດ​ຈັດ​ຕັ້ງ​ປະຕິ­ບັດ​ຕາມ​ແຜນ­ການ​ທີ່​ວາງ​ໄວ້.

​ປີນີ້, ສະ​ມາ​ຄົມ ລາ​ວ-ໄທ ແລະ ໄທ-ລາວ ເພື່ອ​ມິ​ດ​ຕະ​ພາບ ກໍໄດ້​ພົວ​ພັນ​ຮ່​ວມ​ມື​ກັນ​​ເປັນເວລາຄົບ­ຮອບ 27 ປີ. ຕະຫຼອດ​ໄລ­ຍະ​ເວ­ລາ​​ຜ່ານ​ມາ ສະ­ມາ­ຄົມ ລາວ​-​ໄທ ເພື່ອ​ມິດ­ຕະ­ພາບ ແລະ ສະ­ມາ­ຄົມ ໄທ​-​ລາວ ເພື່ອ​ມິດ­ຕະ­ພາບ ໄດ້​ເຮັດ​ໜ້າ​ທີ່​ການ​ທູດ​ປະ​ຊາ​ຊົນ​ໃນ​ການ​ຊຸກ​ຍູ້​ສົ່ງ​ເສີມ​ການ​ພົວ​ພັນ​ຮ່ວມ​ມື​ພາກລັດ​ໃຫ້​ມີ​ປະ​ສິດ​ທິ​ພາບ ແລະ ​ປະ​ສິດ​ທິ​ຜົນ​ຕະຫຼອດມາ. ນອກນັ້ນ ກໍໄດ້​ມີ​ການ​ຮ່ວມ​ມື ແລະ ປະ​ກອບ​ສ່ວນ​ເຂົ້າ​ໃນ​ການ​ສ້າງ​ສາ​ພັດ​ທະ​ນາ ສ​ປ​ປ ລາວ ໂດຍ​ສະ­ເພາະ​ແມ່ນ​ພື້ນ­ຖານ​ໂຄງ​ລ່າງ​ດ້ານ​ການ​ສຶກ­ສາ, ສາ­ທາ­ລະ­ນະ​ສຸກ, ວັດ­ທະ­ນະ­ທຳ-​ສັງ­ຄົມ, ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ ແລະ ອື່ນໆ. ມາ​ຮອດ​ປັດຈຸ​ບັນ​ນີ້ ສອງ​ສະມາຄົມ ລາວ​-​ໄທ ແລະ ໄທ​-​ລາວ ເພື່ອ​ມິດ­ຕະ­ພາບ ໄດ້​ຮ່ວມ​ກັນ​ສ້າງ​ອາ­ຄານ​ໂຮງ­ຮຽນ​ປະ­ຖົມ ແລະ ມັດທະ­ຍົມ​ມິດ­ຕະ­ພາບ ລາວ​-​ໄທ, ໄທ-ລາວ ຢູ່ ສປປ ລາວ ​ລວມ​ທັງ​ໝົດ 11 ຫຼັງ, ໄດ້​ຮັບ​ເອົາ​ກະ­ຖິນ​ພະ​ຣາ​ຊະ​ທານ​ຂອງ​ເຈົ້າ​ຊີ­ວິດ​ແຫ່ງ​ຣາ​ຊະ​ອາ­ນາ­ຈັກ​ໄທ ມາ​ທອດ​ຖວາຍ​ຢູ່ ​ສປປ ລາວ ຈຳ­ນວນ 23 ຄັ້ງ ແລະ ຈັດຕັ້ງກອງ​ຜ້າ­ປ່າ​ສາ­ມັກ­ຄີໄປ​ທອດຖວາຍຢູ່​ຣາ​ຊະ​ອາ­ນາ­ຈັກ​ໄທ ຈຳ­ນວນ 3 ຄັ້ງ, ສອງສະມາຄົມ ໄດ້ປະກອບສ່ວນອັນສຳຄັນເຂົ້າໃນການເສີມສ້າງສາຍ​ພົວ​ພັນມິດຕະພາບ ຄວາມເຂົ້າໃຈ ແລະ ການຊ່ວຍ ເຫຼືອຊຶ່ງກັນ ແລະ ກັນ ລະຫວ່າງ ປະຊາຊົນສອງຊາດ ກໍຄືການພົວພັນຮ່ວມມື ລະຫວ່າງ ສອງປະເທດ ລາວ-ໄທ.

ຂ່າວ: ຄ​ຕ​ພ-ພາບ: ສຳ​ນານ