ເມື່ອບໍ່​ດົນ​ມານີ້, ກອງພົນທີ 2 ໄດ້ຈັດຕັ້ງກວດສຸຂະພາບຜູ້ທີ່ສະໝັກທະຫານໃໝ່ ສົກຈຳປີ 2021 ຢູ່ທີ່ເດີ່ນກິລາບານເຕະຂອງກອງພົນ, ມີບັນດາ ອະນຸກໍາການກວດກາຂັ້ນສອງຂອງກອງພົນ, ພະນັກງານແພດໝໍຕະຫຼອດຮອດຊາວໜຸ່ມຜູ້ທີ່ສະໝັກເຂົ້າເປັນທະຫານໃໝ່ເຂົ້າຮ່ວມ.

   ປະຕິບັດຕາມກົດໝາຍພັນທະປ້ອງກັນຊາດ ແລະ  ອີງຕາມຂໍ້ຕົກລົງຂອງກົມໃຫຍ່ເສນາທິການກອງທັບ ວ່າດ້ວຍການແບ່ງປັນ​ໂຕເລກລະດົມພົນ ປະຈຳປີ 2021 ຊຶ່ງສາມາດລະດົມໄດ້ 160 ສະຫາຍ ຍິງ 10 ສະຫາຍ. ໃນນັ້ນ, ຜູ້ເຂົ້າເປັນທະຫານໃໝ່ ຕ້ອງເປັນຄົນລາວ ສັນຊາດລາວ, ມີອາຍຸແຕ່ 18 ປີ ເຖິງ 25 ປີ,  ມີລະດັບການສືກສາຈົບມັດທະຍົມຕອນປາຍຂຶ້ນໄປ ບໍ່ຈົບວິຊາສະເພາະກໍໄດ້. ຖ້າຈົບວິຊາສະເພາະ ຕ້ອງແມ່ນວິຊາສະເພາະທີ່ກອງທັບຕ້ອງການ ແລະ ຕ້ອງມີສຸຂະພາບແຂງແຮງສົມບູນດີ ພ້ອມກັນນັ້ນ ຮ່າງກາຍຕ້ອງບໍ່ສັກເມິກ ສັກລາຍ, ເພດຊາຍບໍ່ບ່ອງຫູ, ເພດຍິງບໍ່ບ່ອງຫູຫຼາຍຮູ ບໍ່ບ່ອງດັງ ແລະ ເຮັດສັນຍາກຳຕ່າງໆ ລວງສູງເພດຊາຍ 160 cm ຂຶ້ນໄປ, ເພດຍິງ 1,55 cm ຂຶ້ນໄປ, ນ້ຳໜັກບໍ່ໃຫ້ຫຼຸດ ຫຼື ເກີນບວກ-ລົບ 10 ຂອງສອງ​ໂຕເລກທ້າຍລວງສູງຜູ້ກ່ຽວ, ມີຄວາມເປັນເພດຈະແຈ້ງ ເປັນຊາຍແທ້, ຍິງ​ແທ້, ຕ້ອງເປັນໂສດ ບໍ່ມີຜົວ ຫຼື ເມຍ ບໍ່ເຄີຍເປັນທະຫານ ຫຼື ຕຳຫຼວດມາກ່ອນ ມີປະຫວັດຈະແຈ້ງ ບໍ່ເຄີຍຕ້ອງໂທດ, ບໍ່ມີເຊື້ອພະຍາດໂຄວິດ-19, ບໍ່ມີສານເສບຕິດໃນຮ່າງກາຍ ຕ້ອງປະຕິບັດຕາມການສັບຊ້ອນຂອງການຈັດຕັ້ງລະບຽບການຂັດເລືອກທະຫານໃໝ່.

 (ຂ່າວ-ພາບ: ສຸວັນໂນ ທະລັງສີ)