ກອງປະຊຸມຄົບຄະນະບໍລິຫານງານພັກ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ (ກຊສ) ຄັ້ງທີ 2 ສະໄໝທີ II ໄດ້ຈັດຂຶ້ນໃນວັນທີ 19 ມັງກອນນີ້ ທີ່ຫ້ອງປະຊຸມຂອງກະຊວງດັ່ງກ່າວ, ພາຍໃຕ້ການເປັນປະທານຂອງ ສະຫາຍ ນາງ ບຸນຄໍາ ວໍລະຈິດ ກໍາມະການສູນກາງພັກ ເລຂາຄະນະພັກກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ມີພາກສ່ວນກ່ຽວຂ້ອງເຂົ້າຮ່ວມ.

      ກອງປະຊຸມຈະໄດ້ຮັບຟັງ ການຜ່ານມະຕິຕົກລົງຂອງຄະນະເລຂາທິການສູນກາງພັກ ວ່າດ້ວຍການຮັບຮອງເອົາຄະນະບໍລິຫານງານພັກ ກຊສ ສະໄໝທີ II; ສະເໜີຮ່າງມະຕິຕົກລົງ ວ່າດ້ວຍແບບແຜນວິທີເຮັດວຽກຂອງຄະນະບໍລິຫານງານພັກ ແລະ ຄະນະປະຈໍາພັກ ກຊສ ສະໄໝທີ II; ສະເໜີຮ່າງແຜນດໍາເນີນງານຂອງອົງຄະນະພັກ ກຊສ ສະໄໝທີ II (2022-2025). ຄະນະບໍລິຫານງານພັກກະຊວງ, ເຮັດວຽກແບບລວມສູນປະຊາທິປະໄຕ, ນໍາພາເປັນໝູ່ຄະນະ ແລະ ມີການແບ່ງງານ, ແບ່ງຄວາມຮັບຜິດຊອບໃຫ້ບຸກຄົນຈະແຈ້ງ, ທຸກຄົນຕ້ອງປະຕິບັດຕາມມະຕິທີ່ໄດ້ຮັບຮອງ ແລະ ປະຕິບັດຕາມການຈັດຕັ້ງຢ່າງເຂັ້ມງວດ, ສຽງສ່ວນໜ້ອຍຕ້ອງປະຕິບັດຕາມສຽງສ່ວນຫຼາຍ. ​ເພື່ອ​ສ້າງ​ຄວາມ​ເປັນ​ເອກະ​ພາບທາງ​ດ້ານ​ເນື້ອ​ໃນ ​ແລະ ​ແບບ​ແຜນການ​ເຄື່ອນ​ໄຫວນຳພາ-ຊີ້​ນຳ ຂອງ​ຄະນະ​ພັກ​ກະຊວງ, ​ໂດຍ​ສະ​ເພາະ​ແມ່ນ​ການ​ຜັນ​ຂະຫຍາຍມະຕິກ​ອງປະຊຸມ​ໃຫຍ່ ຄັ້ງ​ທີ XI ຂອງ​ພັກ​, ມະຕິກອງ​ປະຊຸມ​ໃຫຍ່​ຄັ້ງ​ທີ II ຂອງ​ອົງຄະ​ນະ​ພັກ ກຊສ ແລະ ເປັນ​ບ່ອນ​ອີງ​ໃຫ້​ແກ່​ການ​ກຳນົດ​ຄວາມ​ຮັບຜິດຊອບ,​ ສົ່ງ​ເສີມ​ຄວາມ​ເປັນ​ເຈົ້າ​ການ ກ້າ​ຄິດ, ກ້າ​ເຮັດ ​ແລະ ກ້າ​ຮັບຜິດຊອບ ຂອງ​ບັນ​ດາສະຫາຍ​ໃນ​ຄະນະ​ພັກ; ເພື່ອສືບຕໍ່ປັບປຸງແບບແຜນວິທີການນຳພາ ທົ່ວລະບົບການຈັດຕັ້ງ ຂອງອົງຄະນະພັກກະຊວງ ໃຫ້ມີວິທະຍາສາດ, ປະດິດສ້າງ ແລະ ແທດກັບຕົວຈິງ ເພື່ອຮັບປະກັນການຈັດຕັ້ງປະຕິບັດບັນດາຄາດໝາຍສູ້ຊົນແຕ່ລະດ້ານທີ່ກຳນົດໄວ້ ໃນລາຍງານການເມືອງຂອງກອງປະຊຸມໃຫຍ່ຄັ້ງທີ II ຂອງອົງຄະນະພັກກະຊວງໃຫ້ສໍາເລັດ;  ເພື່ອກຳນົດ​ເນື້ອ​ໃນ​ການ​ນຳພາໃຫ້​ຈະ​ແຈ້ງ, ​ເປັນ​ລະບົບ, ມີ​ຈຸດ​ສຸມ ສຸມ​ໃສ່​ແກ້​ໄຂ​ບັນ​ຫາ​ທີ່​ພົ້ນ​ເດັ່ນ ທີ່​ຮັບ​ຮອງ​ໃນ​ກອງ​ປະຊຸມ​ໃຫຍ່ ຄັ້ງ​ທີ XI ຂອງ​ພັກ​ ທີ່​​ເປັນຄວາມ​ຮັບຜິດຊອບຂອງ​ຂະ​ແໜງການ​ຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ ​ແລະ ກອງ​ປະຊຸມ​ໃຫຍ່​ຄັ້ງ​ທີ II ຂອງ​ອົງຄະ​ນະ​ພັກ ກຊສ ​ໃຫ້​ມີ​ຜົນສຳ​ເລັດ​ຕົວ​ຈິງ ພ້ອມ​ທັງ​ກຳນົດ​ລັກສະນະ ​ແລະ ວາລະຂອງ​ກອງ​ປະຊຸມ​ອົງຄະ​ນະ​ພັກ ​ໃຫ້​ສອດຄ່ອງ​ກັບ​ພາລະ​ບົດບາດ ໜ້າ​ທີ່ ທີ່​ລະບຸ​ໄວ້ໃນ​ກົດ​ລະບຽບ​ຂອງ​ພັກ, ສ້າງ​ການ​ຫັນປ່ຽນ​ໃຫ້​ຈະ​ແຈ້ງ ​ແນ​ໃສ່​ຍົກ​ລະດັບ​ຄຸນ​ນະພາ​ບການ​ເຄື່ອນ​ໄຫວຂອງ​ຄະນະ​ພັກ​ໃຫ້​ສູງ​ຂຶ້ນແລະ ວຽກງານອື່ນໆ.

ຂ່າວ-ພາບ: ນາງແສງຈັນ