ເມື່ອບໍ່​ດົນ​ມານີ້, ສະ​ຫາຍ ໂພໄຊ ໄຊຍະສອນ ກຳມະການສູນກາງພັກ ເລຂາພັກແຂວງ ເຈົ້າແຂວງສາລະວັນ ທັງແມ່ນປະທານປ້ອງກັນຊາດ ປ້ອງກັນຄວາມສະຫງົບແຂວງ ໄດ້ລົງຢ້ຽມຢາມ ພົບປະໂອ້ລົມນາຍ ແລະ ພົນທະຫານກອງພັນ 16 ຢູ່ທີ່ເມືອງລະຄອນເພັງ ແຂວງສາລະວັນ.

 ການລົງພົບປະຄັ້ງນີ້, ສະ​ຫາຍ ປະທານປ້ອງກັນຊາດ-ປ້ອງກັນຄວາມສະຫງົບແຂວງ ໄດ້ຍ້ອງຍໍຊົມເຊີຍນາຍ ແລະ ພົນທະຫານ ທີ່ໄດ້ເອົາໃຈໃສ່ເປັນເຈົ້າການໃນການສຶກສາອົບຮົມການເມືອງແນວຄິດ ພ້ອມທັງເຜີຍແຜ່ເຊື່ອມຊຶມບັນດາມະຕິ, ຄຳສັ່ງ, ແນວທາງຕ່າງໆພັກ, ກໍຄືຂອງຂັ້ນເທິງວາງອອກເຮັດໃຫ້ອ້າຍ-ນ້ອງນັກຮົບໄດ້ຮັບຮູ້ເຂົ້າໃຈ ແລະ ເອົາໃຈໃສ່ລາດຕະເວນຕາມບໍລິເວນຊາຍແດນ ໃຫ້ມີສະຖຽນລະພາບ, ມີຄວາມສະຫງົບ, ​ມີຄວາມເປັນລະບຽບຮຽບໂດຍພື້ນຖານ ພ້ອມກັນນັ້ນ ກໍເອົາໃຈໃສ່ໃນການຊ້ອມ​ຮົບ, ຫັດແອບສິລະປະຍຸດ, ຍຸດທະວິທີຕ່າງໆຂອງວິຊາສະເພາະ, ໄປພ້ອມກັນນັ້ນ ກໍເອົາໃຈໃສ່ໃນການເພີ່ມພູນຜະລິດຜົນປູກຝັງ-ລ້ຽງສັດ  ເພື່ອເຮັດໃຫ້ກົມກອງມີຄວາມເຂັ້ມແຂງ, ກຸ້ມຕົນເອງເພິ່ງຕົນເອງ. ຈາກນັ້ນ, ສະ​ຫາຍ ໄດ້ເນັ້ນໃຫ້ນາຍ-ພົນທະຫານທຸກສະຫາຍສືບຕໍ່ສຶກສາອົບຮົມການເມືອງແນວຄິດພາຍໃນກົມກອງໃຫ້ໜັກແໜ້ນ, ຕິດພັນກັບການຫັດແອບ, ຊ້ອມຮົບຍຸດທະວິທີດ້ານການທະຫານໃຫ້ມີຄວາມຊຳນານ, ທັງນີ້ ກໍເພື່ອເຮັດໃຫ້ສັງຄົມມີຄວາມສະຫງົບສຸກ, ເສດຖະກິດມີການພັດທະນາ, ສັງຄົມມີຄວາມຮຸ່ງເຮືອງສີວິໄລຂຶ້ນໄປເລື່ອຍໆຕາມແນວທາງຂອງພັກ-ລັດວາງອອກ.

ໃນ​ໂອ​ກາດນີ້, ສະ​ຫາຍ ປະທານປ້ອງກັນຊາດ-ປ້ອງກັນຄວາມສະຫງົບແຂວງ ກໍໄດ້ມອບເຄື່ອງຈຳນວນໜຶ່ງເປັນຕົ້ນນໍ້າດື່ມ, ເຈວລ້າງມື, ຜ້າອັດປາກ-ດັງ ແລະ ເງິນສົດຈຳນວນ 16 ລ້ານກີບ ທີ່ໄດ້ມາຈາກການລະດົມ ແລະ ປະກອບສ່ວນຂອງພະແນກການຕ່າງໆ​ພາຍ​ໃນແຂວງ, ເພື່ອເອົາໄປນຳໃຊ້ເຂົ້າໃນວຽກງານການພັດທະນາກໍ່ສ້າງພື້ນຖານໂຄງລາງຕ່າງໆ ທີ່ມີຄວາມຈຳເປັນຂອງກອງພັນ 16.

(ຂ່າວ-ພາບ: ສິດຕາ ເພັດວົງສາ)