ໃນວັນທີ 19 ມັງກອນ ນີ້, ທ່ານ ນາງ ວຽງທອງ ສີພັນດອນ ເລຂາທິການສູນກາງພັກ ເລຂາຄະນະບໍລິຫານງານພັກ ປະທານສານປະຊາຊົນສູງສຸດ ພ້ອມຄະນະ ເຄື່ອນໄຫວເຮັດວຽກຢູ່ແຂວງຈໍາປາສັກ ໂດຍມີ ທ່ານ ແກ້ວລັດຕະນະ ສີຫາວົງ ຄະນະປະຈໍາພັກແຂວງ ຮອງປະທານສະພາປະຊາຊົນແຂວງຈໍາປາສັກ ຜູ້ຊີ້ນໍາວຽກງານໃນຂົງເຂດຕຸລາການ ພ້ອມດ້ວຍຄະ​ນະ​ນຳຂອງແຂວງຕ້ອນຮັບຢ່າງອົບອຸ່ນ.

ການລົງເຄື່ອນໄຫວຂອງ ທ່ານປະທານສານປະຊາຊົນສູງສຸດຄັ້ງນີ້, ໄດ້ເປີດກອງປະຊຸມພົບປະເຮັດວຽກຮ່ວມກັບ ພະນັກງານສານປະຊາຊົນພາກໃຕ້, ສານປະຊາຊົນແຂວງ ແລະ ສານປະຊາຊົນບັນດາເຂດໃນທົ່ວແຂວງຈໍາປາສັກ ໂດຍໄດ້ຮັບຟັງການລາຍງານສະພາບການຈັດຕັ້ງປະຕິບັດວຽກງານສານປະຊາຊົນພາກໃຕ້ໂດຍຫຍໍ້ ຈາກທ່ານ ສົມພິດ ຊິນນະຈັກ ປະທານສານປະຊາຊົນ ພາກໃຕ້ ແລະ ຮັບຟັງການລາຍງານສະພາບການຈັດຕັ້ງປະຕິບັດວຽກງານສານປະຊາຊົນແຂວງຈໍາປາສັກ ແລະ ສານປະຊາຊົນເຂດ 1, ເຂດ 2, ເຂດ 3 ຈາກ ທ່ານ ນາງ ບົວລຽນ ປະທານສານປະຊາຊົນແຂວງຈໍາປາສັກ ທີ່ໄດ້ຍົກໃຫ້ເຫັນຜົນງານດ້ານດີ ແລະ ຂໍ້ຄົງຄ້າງບາງດ້ານທີ່ຈະຕ້ອງໄດ້ເພີ່ມທະວີໃນການຈັດຕັ້ງປະຕິບັດ.

ໃນໂອກາດດັ່ງກ່າວ, ທ່ານ ນາງ ວຽງທອງ ສີພັນດອນ ໄດ້ເນັ້ນໃຫ້ພະນັກງານສານປະຊາຊົນພາກໃຕ້, ແຂວງ, ສານເຂດ ໃນແຂວງຈໍາປສັກ ເອົາໃຈໃສ່ຫຼາຍບັນຫາສໍາຄັນ ຄື: ວຽກງານສຶກສາອົບຮົມການເມືອງ-ແນວຄິດ ຕໍ່ສະມາຊິກພັກ-ພະນັກງານ ໃຫ້ກໍາແໜ້ນທາດແທ້ຊົນຊັ້ນ ແລະ ຄຸນສົມບັດສິນທໍາປະຕິວັດ ໄປຄຽງຄູ່ກັບການປະຕິບັດກົດໝາຍ, ຕ້ອງເຄົາລົບຈັນຍາບັນ-ຈັນຍາທໍາໃນອາຊີບໃຫ້ເລິກ​ເຊິ່ງ, ບໍ່ອະນຸຍາດໃຫ້ໃຊ້ສິດ, ອໍານາດແບບອາຍາສິດ, ເຈົ້າ-ນາຍ, ຢູ່ເໜືອກົດໝາຍ, ຢູ່ເໜືອປະຊາຊົນ, ຍົກສູງຄວາມເປັນແບບຢ່າງນໍາໜ້າ ແລະ ເພີ່ມທະວີຄວາມສາມັກຄີເປັນເອກະພາບ, ກໍາຈັດ ແລະ ສະກັດກັ້ນການລະເມີດກົດໝາຍ, ຮັກສາສິດຜົນປະໂຫຍດອັນຊອບທໍາຂອງພົນລະເມືອງ, ຂອງລັດ ແລະ ຂອງລວມໝູ່ ຕາມທິດສ້າງລັດທີ່ປົກຄອງດ້ວຍກົດໝາຍ, ເພີ່ມທະວີການນໍາພາຂອງພັກ ໃນການຄົ້ນຄວ້າ ພິຈາລະນາຕັດສິນ, ພິພາກສາຄະດີ ໃຫ້ຮັບປະກັນຄວາມຖືກຕ້ອງຕາມກົດ ໝາຍ ແລະ ຖືກຕ້ອງຕາມຄວາມເປັນຈິງ ໂດຍມີການກວດກາ, ຮັບປະກັນຄວາມໂປ່ງໃສ ໃນທຸກຂັ້ນຕອນຂອງການດໍາເນີນຄະດີຢູ່ສານ. ເອົາໃຈໃສ່ພັດທະນາການຈັດຕັ້ງພັກຢູ່ສານໃຫ້ມີຄວາມໜັກແໜ້ນ, ເຂັ້ມແຂງ, ຮັບປະກັນການກໍ່ສ້າງພັກໃຫ້ໄປຕາມກົດລະບຽບຂອງພັກ ໂດຍຖືຄຸນນະພາບເປັນກົກ, ເອົາໃຈໃສ່ຄຸ້ມຄອງ, ປ້ອງກັນພັກ.  ສ້າງແຜນກໍານົດພະນັກງານນໍາພາ-ຄຸ້ມຄອງ ແລະ ວຽກ​ງານ​ອື່ນໆ ໃຫ້ແໜ້ນແຟ້ນ ເພື່ອແກ້ໄຂຄວາມຂັດແຍ່ງຕ່າງໆທີ່ເກີດຂຶ້ນຢູ່ໃນສັງຄົມ.

(ຂ່າວ-ພາບ: ສົມວິຈິດ ໄຊມົນຕີ)