ເມື່ອບໍ່​ດົນ​ມານີ້, ສະຫາຍ​ ສະເຫຼີມໄຊ​ ກົມມະສິດ​ ກຳມະການກົມການເມືອງສູນກາງພັກ​ລັດຖະມົນຕີກະຊວງການຕ່າງປະເທດ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ແລະ​ ເຮັດວຽກຢູ່ກອງພົນທະຫານຮາບທີ 3​  ເນື່ອງໃນໂອກາດວັນສ້າງຕັ້ງກອງທັບ ຄົບຮອບ 73 (20/1/1949-20/1/2022), ໃຫ້ກຽດຕ້ອນຮັບອັນອົບອຸ່ນຈາກ ສະຫາຍ​ ບຸນຄົງ ຫຼ້າຈຽມພອນ ກຳມະການສຳຮອງສູນກາງພັກ ເລຂາພັກແຂວງ ເຈົ້າແຂວງ​​ອຸດົມໄຊ,​ ມີສະຫາຍຄະນະພັກ-ຄະນະບັນຊາ​ກອງພົນທະຫານຮາບທີ 3 ພ້ອມດ້ວຍພະນັກງງານຫຼັກແຫຼ່ງ ແລະ​ ແຂກທີ່ຖືກເຊີນເຂົ້າຮ່ວມ.​

   ສະຫາຍ​ພົນ ຈັດຕະວາ ​ໄຊຍະວົງ ໄຊນາມທິລາດ ເລຂາຄະນະພັກ ຫົວໜ້າການທະຫານ ກອງພົນທະຫານຮາບທີ 3​ ໄດ້ລາຍງານການເຄື່ອນໄຫວຈັດຕັ້ງປະຕິບັດບັນດາວຽກງານທີ່ສໍາຄັນໂດຍສະເພາະໃນໄລຍະ 1 ປີ ຜ່ານມາ, ຄະນະພັກ-ຄະນະບັນຊາກອງພົນທະຫານຮາບທີ 3 ໄດ້ເປັນເຈົ້ານໍາພາ-ຊີ້ນໍາພະນັກງານນັກຮົບພາຍໃນກົມກອງຂອງຕົນສຶກສາອົບຮົມການເມືອງນໍາພາແນວຄິດເຮັດໃຫ້ພະນັກງານ-ນັກຮົບມີແນວຄິດອຸ່ນອ່ຽນທຸ່ນທ່ຽງເຊື່ອໝັ້ນຕໍ່ການນໍາພາຂອງພັກ-ລັດ, ຂໍ້ກໍານົດກົດລະບຽບຂອງກອງທັບ. ນໍາພາກໍາລັງເຄື່ອນໄຫວບໍລິເວນຊາຍແດນທີ່ກົມ-ກອງຮັບຜິດຊອບໂດຍໄດ້ປະສານສົມທົບ ກັບ ກໍາລັງປ້ອງກັນຄວາມສະຫງົບເພື່ອຕ້ານ ແລະ ສະກັດກັ້ນ ການລັກລອບເຂົ້າເມືອງແບບຜິດກົດໝາຍ, ຄ້າຂາຍເຖື່ອນ, ບັນຫາຢາເສບຕິດ ແລະ ສາສະໜາເຫຼົ່ານີ້ເປັນຕົ້ນ ພ້ອມທັງຈັດຕັ້ງປະຕິບັດມາດຕະການຕ້ານ ແລະ ສະກັດກັ້ນການແຜ່ລະບາດຂອງເຊື້ອພະຍາດໂຄວິດ-19. ນອກຈາກນີ້, ຍັງຈັດຕັ້ງເຜີຍແຜ່ບັນດາເອກະສານໃຫ້ພະນັກງານ-ນັກຮົບທຸກຄົນມີຄວາມຮັບຮູ້ເຂົ້າໃຈເຊື່ອມຊຶມກຳແໜ້ນ ແລະ ເປັນເອກະພາບຕໍ່ບັນດາເນື້ອໃນສຳຄັນຂອງມະຕິກອງປະຊຸມ​ໃຫຍ່ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງປ້ອງກັນປະເທດ, ຫັນມະຕິດັ່ງກ່າວ ເປັນທິດທາງວຽກງານ ແລະ ເປັນແຜນການປະຕິບັດງານລະອຽດຂອງອົງຄະນະພັກແຕ່ລະຂັ້ນ, ຍົກສູງຄວາມເປັນເຈົ້າການ ແລະ ຄວາມສາມາດຂອງພະນັກງານ-ນັກຮົບໃນທົ່ວກອງພົນທີ 3, ຈັດຕັ້ງພັນຂະຫຍາຍເຂົ້າສູ່ວຽກງານຕົວຈິງໃຫ້ມີຜົນສຳເລັດຢ່າງຈົບງາມເຮັດໃຫ້ກົມ-ກອງ ແລະ ບຸກຄົນມີການຫັນປ່ຽນໃໝ່ຢ່າງຈະແຈ້ງ ສືບຕໍ່ຜັນຂະຫຍາຍມະຕິດັ່ງກ່າວ ໂດຍຕິດພັນກັບການປັບປຸງບູລະນະການຈັດຕັ້ງພັກແຕ່ລະຂັ້ນ, ປັບປຸງແບບແຜນວິທີເຮັດວຽກ ແລະ ແບບແຜນດຳລົງຊີວິດແກ້ໄຂປະກົດການຫຍໍ້ທໍ້ ໃນການຈັດຕັ້ງກໍຄືຖັນແຖວ ພະນັກງານສະມາຊິກພັກ ແລະ ນັກຮົບທົ່ວກອງພົນທະຫານຮາບທີ 3.

ໂອກາດນີ້, ສະຫາຍ​ ສະເຫຼີມໄຊ ກົມມະສິດ ກໍໄດ້ໃຫ້ກຽດໂອ້ລົມ,​ ກ່ອນອື່ນກໍໄດ້ສະແດງຄວາມຊົມເຊີຍ ແລະ​ ຕີລາຄາສູງຕໍ່  ໝາກຜົນທີ່ກອງພົນທະຫານຮາບທີ 3 ຍາດໄດ້ໃນໄລຍະຜ່ານມາ ພ້ອມທັງເນັ້ນໜັກໃຫ້ຄະນະພັກ-ຄະນະບັນຊາ, ພະນັກງານຫຼັກແຫຼ່ງກອງພົນທີ 3 ຕ້ອງໄດ້ເອົາໃຈໃສ່ເປັນສຳຄັນຕໍ່ການປະຕິບັດໜ້າທີ່ວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຕິດພັນກັບຂົງເຂດເສດຖະກິດ-ວັດທະນາທຳ-ສັງຄົມ ແລະ ພົວພັນຮ່ວມມືກັບຕ່າງປະເທດ ພ້ອມກັນນັ້ນ ກໍຕ້ອງຍົກສູງສະຕິລະວັງຕົວ ກຳແໜ້ນທຸກສະພາບການ ສະກັດກັ້ນສະພາບການທີ່ອາດຈະເກີດຂຶ້ນໃຫ້ທັນເວລາ, ຈົ່ງຍົກສູງຄວາມສາມັກຄີເປັນເອກະພາບພາຍໃນໃຫ້ແໜ້ນແຟ້ນ, ມີແບບແຜນວິທີເຮັດວຽກ ຕາມຫຼັກການລວມສູນປະຊາທິປະໄຕ ເປັນໝູ່ຄະນະ ແລະ ມອບໝາຍໃຫ້ບຸກຄົນຮັບຜິດຊອບຢ່າງລະອຽດ, ເອົາໃຈໃສ່ນໍາພາ-ຊີ້ນໍາກົມກອງຂອງຕົນໃຫ້ມີບາດກ້າວໃໝ່ ສຸມໃສ່ການຝຶກແອບຮໍ່າຮຽນທາງດ້ານສິລະປະຍຸດ-ຍຸດທະວິທີ ເພື່ອໃຫ້ມີຄວາມສໍານິຊຳນານ ມີໄຫວພິກທີ່ຄ່ອງແຄ້ວ ແລະ ເຮັດສໍາເລັດໜ້າທີ່ ທີ່ຂັ້ນເທິງມອບໝາຍໃຫ້.

  (ຂ່າວ-ພາບ: ລີ​ໂດ ດວງ​ສະ​ຫວັນ)