ກະ​ຊວງ​ປ້ອງ​ກັນ​ຄວາມ​ສະ​ຫງົບ​ ປກ​ສ ​ຮ່ວມ​ກັບ ​ກະ​ຊວງ​ແຮງ​ງານ ແລະ ສະ​ຫວັດ​ດີ​ການ​ສັງ​ຄົມ (ຮສ​ສ) ຈັດ​ກອງ​ປະ​ຊຸມ​ເຜີຍ​ແຜ່ບັນ​ດາ​ເອ​ກະ​ສານ​ກ່ຽວ​ກັບ​ການ​ຈັດ​ຕັ້ງ​ຜັນ​ຂະ​ຫຍາຍ​ວາ​ລະ​ແຫ່ງ​ຊາດ​ວ່າ​ດ້ວຍ​ການ​ແກ້​ໄຂ​ບັນ​ຫາ​ຢາ​ເສບ​ຕິດ 2021-2023 ໄດ້​ຈັດ​ຂຶ້ນ​ໃນ​ວັນ​ທີ 19 ມັງ​ກອນນີ້ ທີ່​ກະ​ຊວງ​ ຮສ​ສ, ໂດຍ​ການ​ເປັນ​ປະ​ທານ ຂອງ​ທ່ານ ພົນໂທ ກົງ​ທອງ ພົງ​ວິ​ຈິດ ຮອງ​ລັດ​ຖະ​ມົນ​ຕີ ກະ​ຊວງ ປກ​ສ ແລະ ທ່ານ ປະ​ເດີມ​ພອນ ສົນ​ທະ​ນີ ຮອງ​ລັດ​ຖະ​ມົນ​ຕີ ກະ​ຊວງ ຮ​ສ​ສ, ມີ​ບັນດ​ພະ​ນັກງານ​ທີ່​ກ່ຽວ​ຂ້ອງ​ທັງ​ສອງ​ຝ່າຍ​ເຂົ້າ​ຮ່ວມ.

ທ່ານ ປະ​ເດີມ​ພອນ ສົນ​ທະ​ນີ ໄດ້​ຂຶ້ນ​ເຜີຍ​ແຜ່​ຄຳ​ສັ່ງ​ຂອງ​ກົມ​ການ​ເມືອງ​ສູນ​ກາງ​ພັກ ເລກ​ທີ 02/ກມ​ສ​ພ, ລົງ​ວັນ​ທີ 26 ກໍ​ລະ​ກົດ 2021 ວ່າ​ດ້ວຍ​ການ​ເພີ່ມ​ທະ​ວີ​ການ​ນຳ​ພາ​-ຊີ້​ນຳຂອງ​ຄະ​ນະ​ພັກ​ແຕ່​ລະ​ຂັ້ນ​ຕໍ່​ການ​ສະ​ກັດ​ກັ້ນ ແລະ ແກ້​ໄຂ​ຢາ​ເສບ​ຕິດ; ຄຳ​ສັ່ງ​ຂອງ​ນາ​ຍົກ​ລັດ​ຖະ​ມົນ​ຕີ ສະ​ບັບ​ເລກ​ທີ 19/ນຍ, ລົງ​ວັນ​ທີ 4 ຕຸ​ລາ 2021 ກ່ຽວ​ກັບ​ການ​ຈັດ​ຕັ້ງ​ປະ​ຕິ​ບັດ​ວາ​ລະ​ແຫ່ງ​ຊາດ​ວ່າ​ດ້ວຍ​ການ​ແກ້​ໄຂ​ບັນ​ຫາ​ຢາ​ເສບ​ຕິດ (2021-2023).

​ທ່ານ ພົນໂທ ກົງ​ທອງ ພົງ​ວິ​ຈິດ ຂຶ້ນ​ເຜີຍ​ແຜ່​ວາ​ລະ​ແຫ່ງ​ຊາດ​ວ່າ​ດ້ວຍ​ການ​ແກ້​ໄຂ​ບັນ​ຫາ​ຢາ​ເສບ​ຕິດ(2021-2023); ມະ​ຕິ​ ຂອງ​ສະ​ພາ​ແຫ່ງ​ຊາດ ສະ​ບັບ​ເລກ​ທີ 04/ສ​ພ​ຊ, ລົງ​ວັນ​ທີ 10 ສິງ​ຫາ 2021 ວ່າ​ດ້ວຍ​ການ​ຮັບ​ຮອງ​ເອົາ​ວາ​ລະ​ແຫ່ງ​ຊາດ​ວ່າ​ດ້ວຍ​ການ​ແກ້​ໄຂ​ບັນ​ຫາ​ຢາ​ເສບ​ຕິດ (2021-2023) ແລະ ທ່ານ​ພັນ​ເອກ ບົວ​ພັນ ຟອ​ງ​ມະ​ນີ ຮອງ​ຫົວ​ໜ້າ​ກົມ​ໃຫຍ່​ຕຳຫຼວດ ກະ​ຊວງ ປກ​ສ ​ຂຶ້ນ​ເຜີຍ​ແຜ່ ກົດ​ໝາຍ​ວ່າ​ດ້ວຍ​ການ​ປັບ​ປຸງ​ບາງ​ມາດ​ຕາ ຂອງ​ກົດ​ໝາຍ​ວ່າ​ດ້ວຍ​ຢາ​ເສບ​ຕິດ ສະ​ບັບ​ເລກ​ທີ 02/ສ​ພ​ຊ, ລົງ​ວັນ​ທີ 9 ສິງ​ຫາ 2021 ແລ​ະ ແຜນ​ການ​ຈັດ​ຕັ້ງ​ປະ​ຕິ​ບັດ​ວາ​ລະ​ແຫ່ງ​ຊາດ​ວ່າ​ດ້ວຍ​ການ​ແກ້​ໄຂ​ຢາ​ເສບ​ຕິດ (2021-2023) ສະ​ບັບ​ເລກ​ທີ 1843/ປກ​ສ, ລົງ​ວັນ​ທີ 5 ຕຸ​ລາ 2021 ຂອງ​ກະ​ຊວງ​ປ້ອງ​ກັນ​ຄວາມ​ສະ​ຫງົບ.

ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອ​ເຮັດໃຫ້ພະນັກງານ-ລັດຖະກອນ ຂອງກະຊວງແຮງງານ ແລະ ສະຫວັດດີການສັງຄົມ ໄດ້ຮັບຮູ້ ເຊື່ອມຊຶມ ແລະ ນໍາໄປ ເຜີຍແຜ່ໃຫ້ແກ່ພະນັກງານ-ລັດຖະກອນຢູ່ໃນກົມກອງຂອງຕົນ, ໃຫ້ແກ່ຄອບຄົວ ແລະ ສັງຄົມ ໃຫ້ຮັບຮູ້ຢ່າງກວ້າງຂວາງ ແລະ ໃຫ້ຄວາມຮ່ວມມືຈັດຕັ້ງປະຕິບັດໃຫ້ປະກົດຜົນເປັນຈິງ. ຂ່າວ​-ພາບ: ບຸນ​ອູ້ມ