ໜັງສືພິມ ປະຊາຊົນ

ສະຖາບັນການເງິນ-ການບັນຊີຮ່ວມມືດ້ານວິຊາການ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 20/01/2022 16:08:35 ຈຳນວນຢ້ຽມຊົມ 1514 ຄັ້ງ

ສະຖາບັນການເງິນ-ການບັນຊີ ກະຊວງການເງິນ ຮ່ວມກັບ ຄະນະເສດຖະສາດ ແລະ ບໍລິຫານທຸລະກິດ ມະຫາວິທະຍາໄລແຫ່ງຊາດ ໄດ້ມີພິທີເຊັນສັນຍາຮ່ວມມືແລກປ່ຽນທາງດ້ານວິຊາການພັດທະນາຫຼັກສູດການຮຽນ-ການສອນ, ການຝຶກອົບຮົມ, ການສ້າງຫຼັກສູດປະລິນຍາໂທ, ການຄົ້ນຄວ້າວິທະຍາສາດດ້ານການເງິນ-ການບັນຊີ ແລະ ຮ່ວມມືກັນດ້ານວິຊາການອື່ນໆ ຂຶ້ນໃນວັນທີ 19 ມັງກອນ ນີ້ ທີ່ຫ້ອງປະຊຸມຄະນະເສດຖະສາດ ແລະ ບໍລິຫານທຸລະກິດ ມະຫາວິທະຍາໄລແຫ່ງຊາດ ໂດຍການເຊັນລົງນາມຂອງທ່ານ ນາງ ກະເສີມສີ ພົມມະວົງສາ ຫົວໜ້າສະຖາບັນການເງິນ-ການບັນຊີ ກະຊວງການເງິນ ແລະ ທ່ານ ພູເພັດ ກ້ຽວພິລາວົງ ຄະນະບໍດີຄະນະເສດຖະສາດ ແລະ ບໍລິຫານທຸລະກິດ ມະຫາວິທະຍາໄລແຫ່ງຊາດ, ມີຮອງຫົວໜ້າສະຖາບັນການເງິນ-ການບັນຊີ, ຮອງຄະນະບໍດີ, ຫົວໜ້າພາກວິຊາ, ຮອງຫົວໜ້າພາກວິຊາ, ຫົວໜ້າພະແນກ ແລະ ຕາງໜ້າ 3 ອົງການຈັດຕັ້ງຂອງທັງສອງຝ່າຍເຂົ້າຮ່ວມ.

ການເຊັນສັນຍາລົງນາມການຮ່ວມມືດັ່ງກ່າວ, ເປັນການຍົກລະດັບຄຸນນະພາບຂອງຄູອາຈານ-ນັກສຶກສາ ແລະ ພັດທະນາຄຸນນະພາບດ້ານວິຊາຊີບໃຫ້ເປັນທີ່ຍອມຮັບທັງເປັນການແລກປ່ຽນທາງດ້ານວິຊາການ, ຍົກລະດັບການຮຽນ-ການສອນ, ຈັດການສໍາມະນາວິຊາການ ແລະ ການຈັດການຝຶກອົບຮົມອາຈານສອນ, ເພື່ອເພີ່ມທັກສະໃນການສິດສອນ; ຮ່ວມກັນພັດທະນາຫຼັກສູດການຮຽນ-ການສອນ, ປັບປຸງທິດສະດີການຮຽນ-ການສອນໃຫ້ສອດຄ່ອງກັບມາດຖານການສຶກສາແບບໃໝ່ ແລະ ແທດເໝາະກັບພາກປະຕິບັດຕົວຈິງໃນສາຂາວິຊາການທີ່ກ່ຽວຂ້ອງ, ແລກປ່ຽນເປັນອາຈານທີ່ປຶກສາຮ່ວມກັນ ຫຼື ຄະນະກຳມະການປ້ອງກັນບົດສຳລັບນັກສຶກສາປີສຸດທ້າຍທີ່ຂຽນບົດໂຄງການຈົບຊັ້ນປະລິນຍາຕີ ແລະ ບົດວິທະຍານິພົນສຳລັບປະລິນຍາໂທໃຫ້ມີຄຸນນະພາບທຽບເທົ່າສາກົນ ແລະ ແລກປ່ຽນດ້ານການຄົ້ນຄວ້າວິໄຈ, ສະໜອງຂໍ້ມູນ, ຕໍາລາຄົ້ນຄວ້າວິໄຈຕ່າງໆທີ່ຈໍາເປັນຕໍ່ການພັດທະນາໂຄງການເຮັດບົດຄົ້ນຄວ້າວິໄຈ ແລະ ມີການຈັດກອງປະຊຸມຮ່ວມກັນເພື່ອຄັດເລືອກບົດຄົ້ນຄວ້າວິໄຈແລກປ່ຽນອາຈານທີ່ປຶກສາ ເພື່ອຊ່ວຍຕິດຕາມ ແລະ ກວດແກ້ບົດ ເພື່ອຍົກລະດັບບົດຄົ້ນຄວ້າວິໄຈໃຫ້ມີຄຸນນະພາບດີຂຶ້ນ.

ພ້ອມທັງຮ່ວມມືກັນໃນການສ້າງຫຼັກສູດຝຶກອົບຮົມຢູ່ສະຖາບັນການເງິນ-ການບັນຊີ, ເພື່ອຍົກລະດັບຄວາມຮູ້ຄວາມສາມາດພະນັກງານຂະແໜງການເງິນ ແລະ ບັນດາລັດວິສາຫະກິດໃນສາຂາວິຊາທີ່ຕິດພັນກັບວາລະແຫ່ງຊາດ ແລະ ບັນຫາເລັ່ງດ່ວນທີ່ຕ້ອງການແກ້ໄຂຄວາມຫຍຸ້ງຍາກທາງດ້ານການເງິນ-ງົບປະມານ; ສ້າງຫຼັກສູດປະລິນຍາໂທຮ່ວມກັນທີ່ເປັນໂຄງການຮ່ວມມືລະຫວ່າງ ຄະນະເສດຖະສາດ ແລະ ບໍລິຫານທຸລະກິດ ແລະ ສະຖາບັນການເງິນ-ການບັນຊີ, ໂດຍຈັດຕັ້ງປະຕິບັດຫຼັກສູດຕາມປະສົບການທີ່ໄດ້ຈັດຕັ້ງປະຕິບັດຜ່ານມາ; ໂດຍຈະສ້າງຫຼັກສູດອີງໃສ່ຍຸດທະສາດ ແລະ ຄວາມຕ້ອງການຂອງຂະແໜງການເງິນໃນສາຂາທີ່ລົງເລິກດ້ານການເງິນ-ການບັນຊີ; ແລກປ່ຽນທາງດ້ານອາຈານສິດສອນ ໂດຍຈະນໍາໃຊ້ອາຈານທັງສອງສະຖາບັນ, ພ້ອມທັງຊ່ວຍເຫຼືອໃນການສະໜອງແບບຮຽນ ຫຼື ສື່ການຮຽນຮູ້ຕ່າງໆທີ່ຈໍາເປັນຕໍ່ການຮຽນການສອນ ຫຼັກສູດປະລິນຍາໂທດັ່ງກ່າວ.

(ຂ່າວ-ພາບ: ກະຊວງການເງິນ)

ຂ່າວທີ່ໄດ້ຮັບຄວາມນິຍົມ