ກອງປະຊຸມສ້າງຄວາມເຂົ້າໃຈລະຫວ່າງພາກລັດ ແລະ ທຸລະກິດກ່ຽວກັບການກະກຽມເປີດຕ້ອນຮັບນັກທ່ອງທ່ຽວຕ່າງປະເທດ ໃນໂຄງການເປີດເສັ້ນທາງ​ທ່ອງ​ທ່ຽວສີຂຽວ ​ຂຶ້ນໃນຕົ້ນເດືອນເມສາ 2022 ທີ່​ຈະ​ມາ​ເຖິງ, ໄດ້ຈັດຂຶ້ນໃນວັນທີ 20 ມັງກອນ ນີ້ ທີ່ຫ້ອງປະຊຸມພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ (ຖວ​ທ) ໂດຍການເປັນປະທານຂອງ ທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ, ມີຫົວໜ້າ, ຮອງຫົວໜ້າພະແນກການທີ່ກ່ຽວຂ້ອງພ້ອມດ້ວຍພາກທຸລະກິດ, ບ້ານພັກ, ໂຮງແຮມ ແລະ ບໍລິສັດນໍາທ່ຽວເຂົ້າຮ່ວມ.

      ໃນພິທີ ທ່ານ ນາງ ບົວຈັນ ພັນທະວົງ  ຫົວໜ້າພະແນກ ຖວ​ທ ແຂວງ ໄດ້ຂຶ້ນຜ່ານກໍານົດເຂດ ແລະ ເສັ້ນທາງທ່ອງທ່ຽວສີຂຽວຂອງແຂວງ ເຊັ່ນ: ໄລຍະທີ 1 ແມ່ນໄດ້ກໍານົດເອົາເມືອງໄຊຍະບູລີ, ເປັນເສັ້ນທາງ​ທ່ອງ​ທ່ຽວ ຫຼວງພະບາງ - ໄຊຍະບູລີີ, ນະຄອນຫຼວງວຽງຈັນ - ໄຊຍະບູລີ ຊຶ່ງກໍານົດສະຖານທີ່ພັກເຊົາມີ: ໂຮງແຮມພອນໄພລິນ, ໂຮງແຮມ ອຸທຸມພອນ, ເຮືອນພັກວັນນິກອນ, ເຮືອນພັກວິໄລ, ເຮືອນພັກວັນນິດາ. ກໍານົດເຂດແຫຼ່ງທ່ອງທ່ຽວ ມີສູນອະນຸລັກຊ້າງອ່າງນໍ້າຕຽນ, ສູນອະນຸລັກ ແລະ ຂະຫຍາຍພັນຊ້າງພູແຄນ, ມູນນິທິອະນຸລັກສັດ ແລະ ສິງແວດລ້ອມລາວ. ກໍານົດຮ້ານອາຫານແມ່ນ: ຮ້ານອາຫານສາຍນໍ້າຮຸ່ງ - ອ່າງນໍ້າຕ່ຽນ, ຣີສອດ ສາມເອື້ອຍນ້ອງ. ກໍານົດບໍລິສັດນໍາທ່ຽວມີ: ບໍລິສັດທ່ອງທ່ຽວສະກຸລະ, ບໍລິສັດ ທ່ອງທ່ຽວວັນນະວົງ, ບໍລິສັດ ທ່ອງທ່ຽວເຊໂນ - ລາວພູແຄນ; ໄລຍະທີ 2 ກໍານົດເອົາ 2 ເສັ້ນທາງຄື: ເສັ້ນທາງຈາກດ່ານສາກົນນໍ້າເຫືອງ ເມືອງແກ່ນທ້າວ ນັກທ່ອງທ່ຽວເຂົ້າມາຕ້ອງໄດ້ກັກໂຕ 24 ຊົ່ວໂມງ ຢູ່ສະຖານທີ່ເຮືອນພັກມິນຕາ. ສ່ວນຮ້ານອາຫານແມ່ນ ຮ້ານອາຫານແສນສະບາຍ ແລະ ເມືອງ​ອື່ນໆຂອງ​ແຂວງ​ກໍ​ເຊັ່ນ​ດຽວ​ກັນ. ຈາກນັ້ນ, ທ່ານ ເພັດພິໄຊ ສູນວິໄລ ຍັງໄດ້ເນັ້ນໜັກໃຫ້ບັນດານັກທຸລະກິດ ຜູ້ປະກອບການທຸກພາກສ່ວນທີ່ໄດ້ຮັບການມອບໝາຍໃຫ້ເພີ່ມທະວີຄວາມຮັບຜິດຊອບເພື່ອກຽມພ້ອມຮັບນັກທ່ອງທ່ຽວທີ່ຈະເຂົ້າມາທ່ອງທ່ຽວແຂວງໄຊຍະບູລີ ໃນຕົ້ນເດືອນເມສາ 2022 ນີ້, ໃຫ້ມີຄວາມປອດໄພທຸກຢ່າງທີ່ສໍາຄັນກໍຄືຮ່ວມກັນປະຕິບັດມາດຕະການຂັ້ນຕອນຕ່າງໆຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ - 19 ທັງຜູ້ບໍລິການ ແລະ ແຂກທີ່ມາທ່ອງທ່ຽວບໍ່ໃຫ້ເກີດມີການຕິດເຊື້ອພະຍາດ. ພ້ອມນີ້ ທ່ານຍັງໄດ້ໃຫ້ຄວາມຫວັງວ່າປີນີ້, ງານມະຫະກໍາບຸນຊ້າງທີ່ແຂວງໄຊຍະບູລີຈະໄດ້ຈັດຂຶ້ນໃນວັນທີ 20 ກຸມພາປີ 2022 ຈະຈັດງານຫຼຸດຈາກມະຫະກໍາບຸນຊ້າງມາເປັນງານເທດສະການບຸນຊ້າງ ເພື່ອປ້ອງກັນການແຜ່ລະບາດຂອງພະຍາດໂຄວິດ - 19. ສ່ວນລາຍລະອຽດຂອງງານຈະໄດ້ມີການຖະແຫຼງໃຫ້ຮັບຊາບຕາມພາຍຫຼັງ.       (ຂ່າວ-ພາບ: ບຸນທີ)