ຫົວ​ຂໍ້ : ຫວຽດນາມ ເຂົ້າຮ່ວມກອງປະຊຸມຫຼຸດຜ່ອນກຳລັງທັບ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 25/02/2020 09:05:20 ຈຳ​ນວນ​ຜູ້​ເຂົ້າ​ຢ້ຽມ​ຊົມ 260 ຄັ້ງ

  ວິທະຍຸ​ກະຈາຍສຽງ​ຫວຽດນາມ​ລາຍ​ງານ​ວ່າ: ທ້າຍ​ເດືອນ​ກຸມພາ​ນີ້, ຢູ່​ສຳນັກງານ ສປຊ ທີ່​ເຊີ​ແນວ ປະເທດ​ສະ​ວິດ, ທ່ານ ນາງ ເລ​ທິ​ຕວຽດ​ມາຍ ເອກ​ອັກ​ຄະ​ລັດ​ຖະ​ທູດ​ຜູ້​ມີ​ອຳນາດ​ເຕັມ, ຫົວໜ້າ​ຄະນະ​ຜູ້ຕາງໜ້າ​ຫວຽດນາມ ປະຈຳ ສປຊ, ອົງການ​ການ​ຄ້າ​ໂລກ ແລະ ບັນດາ​ອົງການ​ຈັດ​ຕັ້ງ​ສາກົນ​ອື່ນໆ, ຢູ່​ເຊີ​ແນວ ໄດ້​ເຂົ້າ​ຮ່ວມ​ບັນດາ​ການເຄື່ອນໄຫວ​ທຳອິດໃນ​ຂອບ​ເຂດ​ກອງ​ປະຊຸມ​ຫຼຸດ ຜ່ອນ​ກຳລັງ​ທັບ ປີ 2020.
  ຂ່າວ​ລະບຸ​ວ່າ: ໃນ​ກອງ​ປະຊຸມ​ຫຼຸດຜ່ອນ​ກຳລັງ​ທັບ (CD) ຈັດ​ຂຶ້ນ​ໃນ​ວັນ​ທີ 21 ກຸມພາ​ຜ່ານ​ມາ, ທ່ານ ນາງ ເລ​ທິ​ຕວຽດ​ມາຍ ສະແດງ​ຄວາມ​ຫວັງ​ວ່າ: ກອງ​ປະຊຸມ, ຈະ​ບັນລຸ​ໄດ້​ບັນດາ​ຄວາມ​ຄືບ​ໜ້າທີ່​ສຳຄັນ​ໃນ​ປີ 2020 ເພື່ອ​ຢັ້ງຢືນ​ນະໂຍບາຍ​ການ​ຕ່າງປະເທດ ຊຶ່ງ​ຍາມ​ໃດ​ກໍ​ຖື​ການ​ຮ່ວມ​ມື​ຫຼາຍ​ຝ່າຍ​ເປັນ​ສຳຄັນ, ທ່ານ ນາງ ເລ​ທິ​ຕວຽດ​ມາຍ ເນັ້ນ​ໜັກ​ວ່າ: ດ້ວຍ​ບົດບາດ​ເປັນ​ກຳມະການ​ບໍ່​ຖາວອນ ສະພາ​ຄວາມ​ໝັ້ນຄົງ ສປຊ ສົກ​ປີ 2020-2021, ຫວຽດນາມ ໄດ້​ໃຫ້​ຄຳ​ໝັ້ນ​ສັນຍາ​ຈະ​ພະຍາຍາມ​ພ້ອມ​ກັບ​ບັນດາ​ສະມາຊິກ​ຂອງ ສປຊ, ຊຸກຍູ້​ສັນຕິພາບ​ແບບ​ຍືນ​ຍົງ. ພ້ອມ​ກັນ​ນັ້ນ, ໃນ​ບົດບາດ​ເປັນ​ປະທານ​ອາ​ຊຽນ ປີ 2020, ຫວຽດນາມ ພ້ອມ​ແລ້ວ​ທີ່​ຈະ​ຊຸກຍູ້​ການ​ຮ່ວມ​ມື​ຢ່າງ​ແໜ້ນ​ແຟ້ນ ລະຫວ່າງ ອາ​ຊຽນ ແລະ ກອງ​ປະຊຸມ​ຫຼຸດຜ່ອນ​ກຳລັງ​ທັບ ກໍ​ຄື​ບັນດາ​ເວທີ​ປາ​ໄສ​ຂອງ ສປຊ.
  ໃນ​ເວລາ​ພົບ​ປະ​ກັບ ທ່ານ ນາງ ເລ​ທິ​ຕວຽດ​ມາຍ, ທ່ານ ຄາ​ລັອສ ມາ​ຣີ​ໂອ ເອກ​ອັກ​ຄະ​ລັດ​ຖະ​ທູດ​ອາກ​ຊັງ​ຕິນ ປະທານ​ໝູນວຽນ ຂອງ​ກອງ​ປະຊຸມ​ຫຼຸດ ຜ່ອນ​ກຳລັງ​ທັບ, ໄດ້​ຕີ​ລາຄາ​ສູງ​ບັນດາ​ການ​ປະກອບສ່ວນ​ຂອງ​ຫວຽດນາມ ໃນ​ຂອບ​ເຂດ​ກອງ​ປະຊຸມ​ຫຼຸດຜ່ອນ​ກຳລັງ​ທັບ. ພິເສດ, ຫວຽດນາມ ໄດ້​ປະຕິບັດ​ບົດບາດ​ປະທານ​ກອງ​ປະຊຸມ​ຫຼຸດຜ່ອນ​ກຳລັງ​ທັບ​ໃນ​ປີ 2019 ເປັນ​ຢ່າງ​ດີ. 
ສ່ວນ ທ່ານ ນາງ ເລ​ທິ​ຕວຽດ​ມາຍ ຢືນຢັນ​ວ່າ: ຫວຽດນາມ ຈະ​ສືບຕໍ່​ພະຍາຍາມ​ພ້ອມ​ກັບ​ປະທານ​ກອງ​ປະຊຸມ​ຫຼຸດຜ່ອນ​ກຳລັງ​ທັບ ປີ 2020 ແລະ ບັນດາ​ປະເທດ​ສະມາຊິກ ປະກອບສ່ວນ​ເຂົ້າ​ໃນ​ວຽກ​ງານ​ຂອງ​ກອງ​ປະຊຸມ​ຫຼຸດຜ່ອນ​ກຳລັງ​ທັບ  ເພື່ອ​ແນໃສ່​ຊຸກຍູ້​ສັນຕິພາບ ແລະ ຄວາມ​ໝັ້ນຄົງ​ສາ​ກົນ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110