ຫົວ​ຂໍ້ : ການເຈລະຈາລະຫວ່າງ ອາຊຽນ-ນິວຊີແລນ ຄັ້ງທີ 27

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 25/02/2020 09:07:36 ຈຳ​ນວນ​ຜູ້​ເຂົ້າ​ຢ້ຽມ​ຊົມ 406 ຄັ້ງ

  ວິທະຍຸ​ກະຈາຍສຽງຫວຽດນາມ​ລາຍ​ງານ​ວ່າ: ການ​ເຈລະຈາອາ​ຊຽນ - ນິວ​ຊີ​ແລນ ປະຈຳ​ປີ​ຄັ້ງ​ທີ 27 ໄດ້​ດຳເນີນ​ໃນ​ລະຫວ່າງ ວັນ​ທີ  20 - 21  ກຸມ ພານີ້ ຢູ່ ກຳປູເຈຍ ໂດຍ​ມີ​ການ​ເຂົ້າ​ຮ່ວມ​ຂອງ​ບັນດາ​ປະເທດ​ສະມາຊິກອາ​ຊຽນ ແລະ ນິວ​ຊີ​ແລນ.
  ຂ່າວ​ລາຍ​ງານ​ວ່າ: ໃນ​ເວລາ​ພົບ​ເຈລະຈາ, ນິວ​ຊີ​ແລນ ໄດ້​ຢັ້ງຢືນ​ເຖິງ​ການ​ສະໜັບສະໜູນ​ບົດບາດ​ເປັນໃຈ​ກາງຂອງອາ​ຊຽນ ໃນ​ພາກ​ພື້ນ, ຕີ​ລາຄາ​ສູງ​ເອກະສານ, ທັດສະນະ​ຂອງອາ​ຊຽນກ່ຽວ​ກັບ​ມະຫາ​ສະ​ໝຸດ​ອິນ​ເດຍ - ປາ​ຊີ​ຟິກ, ສະເໜີ​ໃຫ້​ເພີ່ມ​ທະວີ​ການ​ຮ່ວມ​ມື​ໃນ​ບັນດາ​ຂົງເຂດ​ຄື: ຄວາມ​ໝັ້ນຄົງ, ເສດຖະກິດ, ປະຊາຊົນ ແລະ ສິ່ງ​ແວດ​ລ້ອມ. ໃນ​ນັ້ນ, ສຸມ​ໃສ່​ຮ່ວມ​ມື​ຕ້ານ​ອາຊະຍາ​ກຳ​ຂ້າມ​ຊາດ ແລະ ຄວາມ​ໝັ້ນຄົງ​ຢູ່​ເຂດ​ຊາຍ​ແດນ, ສ້າງສັນ​ຍາ​ການ​ບໍລິການ​ທາງ​ການບິນລະຫວ່າງ ອາ​ຊຽນ - ນິວ​ຊີ​ແລນ​ໃຫ້​ສົມບູນ​ແບບ, ຮ່ວມ​ມື​ສ້າງ​ສະພາບ​ແວດ​ລ້ອມ ແລະ ກະສິກຳ​ແບບ​ຍືນ​ຍົງ, ຄຸ້ມ​ຄອງ​ແຫຼ່ງ​ແມ່ນ້ຳ​ຂອງ, ໜູນ​ຊ່ວຍ​ການ​ສ້າງ​ກຳລັງ​ຄວາມ​ສາມາດ ໂດຍ​ຜ່ານ​ບັນດາ​ໂຄງການ​ບຳລຸງ​ສ້າງ ແລະ ສະໜອງ​ທຶນ​ການ​ສຶກສາ​ໃຫ້​ແກ່​ບັນດາ​ປະເທດ ອາ​ຊຽນ.
  ໃນ​ເວລາ​ແລກປ່ຽນ​ກ່ຽວ​ກັບ​ສະພາບ​ການ​ຢູ່ພາກ​ພື້ນ ແລະ ສາກົນ, ສອງ​ຝ່າຍ​ໄດ້​ເນັ້ນ​ໜັກ​ເຖິງ​ຄວາມ​ສຳຄັນ​ຂອງ ການ​ຮັກສາ​ສັນຕິພາບ, ສະຖຽນ​ລະ​ພາບ, ຄວາມ​ໝັ້ນຄົງ, ຄວາມ​ເສລີ​ໃນ​ການ​ເດີນ​ເຮືອ ແລະ ການບິນ ຢູ່​ທະເລ​ຕາເວັນ​ອອກ, ການ​ປະຕິບັດ​ຖະແຫຼງການ​ແຫ່ງ​ການ​ປະພຶດ​ທາງ​ທະເລ (DOC) ຢ່າງ​ເຂັ້ມ​ງວດ ແລະ ຄົບ​ຖ້ວນ, ຕັ້ງໜ້າ​ເຈລະຈາ​ສ້າງ​ກົດ​ແຫ່ງ​ການ​ປະພຶດ​ທາງ​ທະເລ (COC) ໃຫ້​ມີ​ປະສິດທິພາບ ແລະ ປະສິດ​ທິ​ຜົນ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110