ໜັງສືພິມ ປະຊາຊົນ

ປະຫວັດຄວາມເປັນມາຂອງຕົ້ນໄມ້ລຳທຽນ (ໜອງຫຼົ່ມ) ບ້ານຈອມແລງ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 20/04/2022 11:25:24 ຈຳນວນຢ້ຽມຊົມ 2909 ຄັ້ງ

ຮຽບຮຽງໂດຍ: ວັນໄຊ ຕະວິນຍານ

ປ່າໄມ້ລຳທຽນແຫ່ງນີ້ຕັ້ງຢູ່ບ້ານຈອມແລງ ຫ່າງຈາກເທດສະບານເມືອງຮຸນ ແຂວງອຸດົມໄຊ ປະ ມານ 23 ກິໂລແມັດ, ສະພາບເສັ້ນທາງເຂົ້າເຖິງເປັນເສັ້ນທາງດິນແດງຍົກລະດັບ ທຽວໄດ້ລະດູດຽວ. ລັກ ສະນະຂອງຕົ້ນໄມ້ສູງຍາວ ບໍ່ມີງ່າ ຄືກັບລຳທຽນ ເປັນຕົ້ນໄມ້ທີ່ເກີດຂຶ້ນໂດຍທຳມະຊາດ ຊຶ່ງກວມເອົາຫຼາຍເຮັກຕາ. ເໝາະສົມໃນການພັດທະນາເປັນສະຖານທີ່ບໍລິການ, ສະຖານທີ່ທ່ອງທ່ຽວທີ່ຫາຊົມໄດ້ຍາກ ຊຶ່ງເວົ້າໄດ້ວ່າມີແຕ່ແຫ່ງດຽວຢູ່ໃນໂລກທີ່ມີຕົ້ນໄມ້ທີ່ອັດສະຈັນເກີດຂຶ້ນໃນລັກສະນະນີ້. ຕົ້ນໄມ້ລຳທຽນ ແລະ ໜອງຫຼົ່ມ ມີປະຫວັດເລົ່າຕໍ່ກັນມາວ່າ: ແຕ່ປາງກ່ອນຊາວບ້ານຈອມແລງ (ໃນອະດີດ) ໄດ້ຟານດ່ອນໂຕໜຶ່ງ ແລ້ວມາແບ່ງປັນຊີ້ນຟານດັ່ງກ່າວໃຫ້ແຕ່ລະຫຼັງຄາເຮືອນກິນ. ແຕ່ຍັງມີຄອບຄົວແມ່ໝ້າຍຄອບຄົວໜຶ່ງບໍ່ກ້າເອົາຊີ້ນນັ້ນມາປຸງແຕ່ງກິນກໍເລີຍເອົາຊີ້ນຟານດັ່ງກ່າວໄປຫ້ອຍໄວ້ຢູ່ເສົາຊານ. ຕໍ່ມາໃນຄ່ຳຄືນຂອງມື້ນັ້ນຈຶ່ງເກີດມີຝົນຕົກໜັກ, ຟ້າຮ້ອງລົມພັດມາຢ່າງແຮງ ແລະ ໃກ້ຂ້ອນແຈ້ງຈຶ່ງເກີດມີຂະບວນຂອງເງືອກມາພັດຖະຫຼົ່ມເອົາເຮືອນຂອງປະຊາຊົນຊາວບ້ານຈອມແລງຕາຍຈົນໝົດ ຍົກເວັ້ນແຕ່ແມ່ໝ້າຍ ຜູ້ທີ່ບໍ່ກ້າກິນຊີ້ນຟານດ່ອນດັ່ງກ່າວ. ແມ່ໝ້າຍຄົນນັ້ນເຫັນຄົນອື່ນພາຍໃນບ້ານຕາຍໝົດ ລາວກໍຄິດຢາກຕາຍນຳເຂົາ ເຈົ້າ, ລາວແນມສາຍຕາເບິ່ງບ່ອນໃດດິນພາຍໃນບ້ານເປັນວັງນໍ້າເລິກໝົດ, ລາວກໍໄດ້ຕັດສິນໃຈໂດດລົງວັງ ນໍ້າເລິກເພື່ອຂ້າໂຕເອງຕາຍ ແຕ່ເມື່ອໂດດລົງບ່ອນທີ່ເປັນນ້ຳວັງເລິກກໍກາຍເປັນບົກ ເປັນໂພນຂຶ້ນ ຍ້ອນລາວບໍ່ໄດ້ກິນຊີ້ນຟານດ່ອນ ເງືອກຈຶ່ງບໍ່ຕ້ອງການລາວ. ເຂດບ້ານດັ່ງກ່າວກໍເລີຍເປັນໜອງ. ແຕ່ປັດຈຸບັນ, ໜອງຫຼົ່ມ ບ້ານຈອມແລງ ຍັງມີຮ່ອງຮອຍໃຫ້ເຫັນເຊັ່ນ: ໂນນໂພນທີ່ແມ່ໝ້າຍກະໂດດ, ໂນນເຮືອນຂອງແມ່ໝ້າຍ. ເວລາຕໍ່ມາໃນບໍລິເວນບ້ານ ຫຼື ໜອງ ກໍເກີດມີຕົ້ນໄມ້ໃຫຍ່ຍາວ, ລຳຊື່, ບໍ່ມີງ່າຄືກັບລຳທຽນ. ດັ່ງນັ້ນ, ຊາວເມືອງຮຸນ ຈຶ່ງພາກັນເອີ້ນຊື່ວ່າໜອງຕົ້ນໄມ້ລຳທຽນ. ປັດຈຸບັນ, ໃນເຂດດັ່ງກ່າວກໍກາຍເປັນໜອງໃຫຍ່ເປັນບ່ອນລ້ຽງປາຂອງຊາວບ້ານ ສ່ວນຕົ້ນໄມ້ລຳທຽນແມ່ນຍັງມີໃຫ້ເຫັນເຖິງທຸກວັນນີ້ ຊຶ່ງເປັນຕົ້ນໄມ້ທີ່ຫາເບິ່ງໄດ້ຍາກ.