ຫົວ​ຂໍ້ : ການນຳເຮົາສົ່ງສານອວຍພອນວັນຊາດ ບຣູໄນ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 26/02/2020 08:50:09 ຈຳ​ນວນ​ຜູ້​ເຂົ້າ​ຢ້ຽມ​ຊົມ 3385 ຄັ້ງ

  ທ່ານ ບຸນ​ຍັງ ວໍລະ​ຈິດ ປະທານ​ປະເທດ ແຫ່ງ ສປປ ລາວ ໄດ້​ສົ່ງ​ສານ​ອວຍພອນ ເຖິງ ສົມເດັດ ຊຸນ​ຕານ ຮາ​ຈິ ຮັດ​ຊາ​ນານ ໂບນ​ເກຍ ແຫ່ງ ບຣູ​ໄນ ດາ​ຣູ​ຊາ​ລາມ ທີ່ ບັນດາ ສິ​ຣິ ເບ​ກາ​ວັນ ເມື່ອ​ວັນ​ທີ 23 ກຸມພາ​ ເນື້ອ​ໃນ​ສານ​ລະບຸ​ວ່າ:  
  ໃນ​ນາມ​ປະຊາຊົນ​ລາວ​ບັນດາເຜົ່າກໍ​ຄື​ໃນ​ນາມ​ສ່ວນ​ຕົວ, ຂ້າ​ພະ​ເຈົ້່າຂໍ​ສົ່ງ​ຄໍາ​ຊົມເຊີຍ​ອັນ​ອົບ​ອຸ່ນ ແລະ ພອນ​ໄຊ​ອັນ​ປະເສີດມາ​ຍັງ​ສົມເດັດ ແລະ ປະຊາຊົນ ແຫ່ງ ບຣູ​ໄນ ດາ​ຣູ​ຊາ​ລາມ ເນື່ອງ​ໃນ​ໂອກາດ​ວັນຊາດ ແຫ່ງ ບຣູ​ໄນ ດາ​ຣູ​ຊາ​ລາມ ຄົບຮອບ 36 ປີ.
  ຂ້າພະເຈົ້າມີ​ຄວາມ​ປິ​ຕິ​ຍິນດີ​ເປັນ​ຢ່າງ​ຍິ່ງທີ່​ເຫັນ​ວ່າ​ສາຍ​ພົວພັນ​ມິດຕະພາບ​ທີ່​ດີ ແລະ ການ​ຮ່ວມ​ມື​ຢ່າງ​ໃກ້ຊິດລະຫວ່າງ​ສອງ​ປະເທດ​ພວກ​ເຮົາ ໄດ້​ຮັບ​ການ​ເສີມ​ຂະຫຍາຍໃນ​ຫຼາຍ​ຂົງເຂດໃນ​ຊຸມ​ປີ​ທີ່​ຜ່ານ​ມາ. ຂ້າພະເຈົ້າຫວັງ​ຢ່າງ​ຍິ່ງ​ວ່າຈະ​ໄດ້​ຕ້ອນຮັບ ແລະ ເຮັດ​ວຽກ​ຮ່ວມ​ກັບສົມເດັດ ຢ່າງ​ໃກ້ຊິດໃນ​ອະນາຄົດ​ອັນ​ໃກ້​ນີ້ ເພື່ອ​ສືບຕໍ່​ເສີມ​ຂະຫຍາຍ​ສາຍ​ພົວພັນ​ມິດຕະພາບ ແລະ ການ​ຮ່ວມ​ມື​ທີ່​ດີງາມ ເພື່ອ​ຜົນ​ປະໂຫຍດ​ລວມຂອງ​ສອງ​ປະເທດ ແລະ ປະຊາຊົນ​ສອງ​ຊາດ​ພວກ​ເຮົາກໍ​ຄື​ເພື່ອ​ສັນຕິພາບ, ສະຖຽນ​ລະ​ພາບ ແລະ ການ​ຮ່ວມ​ມື ເພື່ອ​ການ​ພັດທະນາ​ຢູ່​ໃນ​ພາກ​ພື້ນ ແລະ ໃນ​ໂລກ.
  ຂ້າພະເຈົ້າຂໍ​ຖື​ໂອກາດ​ອັນ​ສະຫງ່າ​ລາສີ​ນີ້ອວຍພອນ​ໄຊ​ອັນ​ປະເສີດ​ແດ່ ສົມເດັດ ຈົ່ງ​ພະ​ກະ​ເສ​ມສໍາ​ລານ, ມີ​ພະລາ​ນາ​ໄມ​ສົມບູນ, ມີ​ຄວາມ​ຜາ​ສຸກ ແລະ ຂໍ​ໃຫ້​ປະຊາຊົນ​ບຣູ​ໄນ ດາ​ຣູ​ຊາ​ລາມ ພາຍ​ໃຕ້​ພະ​ບໍໍ​ຣົມ​ໂພທິສົມພານ ຂອງ​ພະ​ອົງ ຈົ່ງ​ສືບ​ຕໍໍ່​ມີ​ຄວາມ​ກ້າວໜ້າ ແລະ ຈະເລີນ​ຮຸ່ງເຮືອງ​ຍິ່ງໆ​ຂຶ້ນ.
  ໃນ​ໂອກາດ​ດຽວ​ກັນ​ນີ້ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ແຫ່ງ ສປປ ລາວ ກໍ​ໄດ້​ສົ່ງ​ສານ​ອວຍພອນ ເຖິງ ສົມເດັດ ຊຸນ​ຕານ ຮາ​ຈິ ຮັດ​ຊາ​ນານ ໂບນ​ເກຍ ແຫ່ງ ບຣູ​ໄນ ດາ​ຣູ​ຊາ​ລາມ ເຊັ່ນ​ດຽວ​ກັນ.
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110