ໜັງສືພິມ ປະຊາຊົນ

ຖ້ຳຈອມອອງ ເມືອງໄຊ ທີ່ໜ້າທ່ຽວຊົມ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 22/04/2022 11:09:45 ຈຳນວນຢ້ຽມຊົມ 4328 ຄັ້ງ

ຮຽບຮຽງໂດຍ: ວັນໄຊ ຕະວິນຍານ

ຖ້ຳຈອງອອງຕັ້ງຢູ່ບ້ານຈອມອອງ ເມືອງໄຊ ແຂວງ ອຸດົມໄຊ, ຫ່າງຈາກເທດສະບານເມືອງໄຊ ປະມານ 45 ກິໂລແມັດ (ເປັນເສັ້ນທາງດິນແດງ). ຖ້ຳຈອມອອງ ຕັ້ງຢູ່ຫ່າງຈາກບ້ານຈອມອອງ ປະມານ 3 ກິໂລແມັດ, ເປັນເສັ້ນທາງຍ່າງ (ລົດບໍ່ສາມາດເຂົ້າເຖິງໄດ້). ທ່າແຮງໃນການພັດທະນາການທ່ອງທ່ຽວຂອງແຂວງແມ່ນເປັນຖ້ຳໃຫຍ່, ຍາວ ແລະ ສວຍງາມທີ່ສຸດຂອງແຂວງອຸດົມໄຊ ຊຶ່ງປະກອບດ້ວຍສີສັນຕ່າງໆແບບທຳມະຊາດທີ່ອັດສະຈັນ, ມີຫຼາຍຮູເຂົ້າ-ອອກ ຊຶ່ງມີຄວາມຍາວທັງໝົດປະມານ 16 ກວ່າກິໂລແມັດ, ຄວາມກວ້າງຂອງຖ້ຳ ປະມານ 15 - 50 ແມັດ ແລະ ຄວາມສູງປະມານ 25-100 ແມັດ. ຢູ່ໃນຖ້ຳບາງບ່ອນມີສາຍນ້ຳໄຫຼຜ່ານ, ມີນົມຜາ, ຫີນຍ້ອຍທີ່ມີລວດລາຍສວຍງາມ, ຫີນແກ້ວເປັນສີຂາວເຫຼື້ອມຄືກັບເພັດພອຍເປັນກ້ອນໃຫຍ່ປະດັບປະດາຫ້ອຍຢູ່ຕາມຝາຫີນຄືກັບດອກໄຟຟ້າຢ່າງສວຍງາມ.

ປັດຈຸບັນຖ້ຳດັ່ງກ່າວໄດ້ເອົາໄຟຟ້າແສງຕາເວັນເຂົ້າແລ້ວປະມານ 500 ແມັດ. ຢູ່ໃນຖ້ຳຍັງເປັນລັກສະນະເດີມທີ່ຍັງບໍ່ໄດ້ຮັບການດັດແປງແຕ່ຢ່າງໃດ. ຖ້ຳນີ້ໄດ້ຜ່ານການສຳຫຼວດຂອງນັກວິທະສາດຈາກສະຫະພັນເອີຣົບໃນປີ 2009 ແລະ ປີ 2010 ເປັນຖ້ຳທີ່ເໝາະສົມໃນການພັດທະນາເປັນສະຖານທີ່ທ່ອງທ່ຽວລະດັບຊາດ.

ຖ້ຳນີ້ແຫ່ງນີ້, ໄດ້ຄົ້ນພົບໃນປີ ຄ.ສ 2005 ແລະ ເປີດບໍລິການປີ ຄ.ສ 2007. ຖໍ້າຈອມອອງ ແມ່ນເອີ້ນຕາມຊື່ຂອງບ້ານ, ປະຊາຊົນທ້ອງຖິ່ນເຄີຍເອີ້ນຊື່ຖ້ຳນີ້ໃນເມື່ອກ່ອນວ່າ ຖ້ຳເຈຍ ຫຼື ຖ້ຳຂີ້ເຈຍ ຍ້ອນວ່າສະໄໝກ່ອນ ມີໂຕເຈຍມາອາໄສຢູ່ເປັນຈຳນວນຫຼວງຫຼາຍ, ປະຊາຊົນເຂດຈອມອອງ ໄດ້ພາກັນຂຸດເອົາຂີ້ໂຕເຈຍຢູ່ໃນຖ້ຳມາເຮັດໝື້ປືນແກັບ. ດັ່ງນັ້ນ, ປະຊາຊົນເຂດຈອມອອງ ຈຶ່ງໄດ້ພາກັນເອີ້ນຊື່ຂອງຖ້ຳນີ້ວ່າ ຖ້ຳເຈຍ ຫຼື ຖ້ຳຂີ້ເຈຍ. ແຕ່ເພື່ອໃຫ້ສອດຄ່ອງ ກັບຊື່ຂອງບ້ານ ທາງພະແນກ ຖວທ ແຂວງອຸດົມໄຊ ຈຶ່ງຕົກລົງໃຫ້ເອີ້ນຊື່ວ່າຖ້ຳຈອມອອງຈົນເຖິງປັດຈຸບັນນີ້.

ສຳລັບດ້ານລຸ່ມເອີ້ນວ່າຖ້ຳນ້ຳອອກຮູ. ຍ້ອນວ່າລັກສະນະຂອງຖ້ຳມີນ້ຳໄຫຼອອກມາຈາກຮູຖ້ຳຄືກັບສາຍນ້ຳຫ້ວຍ, ຫ້ວຍນີ້ຊື່ວ່າຫ້ວຍກາງ ຊຶ່ງໄຫຼມາແຕ່ເຂດບ້ານຫຼັກ 22 ລົງມາປ່ອງໃສ່ຖ້ຳແຫ່ງນີ້ ແລະ ຢູ່ພາຍໃນຖ້ຳແຫ່ງນີ້ ປະມານ 7 ກິໂລແມັດ, ມີລະບົບນິເວດທີ່ອຸດົມສົມບູນ ແລະ ເໝາະສົມແກ່ການໄປທ່ຽວຊົມໃນລະດູຮ້ອນ.

ບ້ານຈອມອອງ ມີປະຫວັດເລົ່າສືບຕໍ່ກັນມາວ່າ: ຈອມອອງ ຍ້ອນວ່າ: ຄຳວ່າ “ຈອມ’’ ເປັນພາສາກຶມມຸ ຊຶ່ງແປວ່າຕິດຕາມໄປ, ນຳກົ້ນໄປ, ສ່ວນຄຳວ່າ “ອອງ” ແປວ່າໂຕຕໍ່ດິນ, ໃນສະໄໝກ່ອນປະຊາຊົນເມືອງນາໝໍ້ ໄດ້ໄປຄ້ອງຕໍ່ ຫຼື ຫາເອົາຮັງໂຕຕໍ່ ໂດຍໄດ້ເອົາຍວງຝ້າຍນ້ອຍໆອ່ອນໆມັດອາຫານໃສ່ຕີນໂຕຕໍ່ແລ້ວກໍປ່ອຍຕໍ່ໃຫ້ບິນກັບໄປຫາຮັງ ແລ້ວປະຊາຊົນກໍນຳໂຕຕໍ່ນັ້ນໄປ ຈຶ່ງໄປພົບເຫັນເຂດພື້ນທີ່ດັ່ງກ່າວເປັນເຂດທີ່ອຸດົມສົມບູນເໝາະສົມໃນການຜະລິດກະສິກຳ, ປູກຝັງ, ລ້ຽງສັດ. ຕໍ່ມາຈຶ່ງພາກັນຍ້າຍຖິ່ນຖານມາຢູ່ບ້ານນີ້ແລ້ວຈຶ່ງເອີ້ນວ່າບ້ານຈອມອອງ ມາເຖິງທຸກວັນນີ້.