ໂດຍ: ຍຸພີນທອງ

ໃນໄລຍະປີ 2019-2020 ມີຫຼາຍບໍລິສັດ ຈໍາເປັນຕ້ອງໄດ້ປິດ​ການ​ໃຫ້​ບໍ​ລິ​ການຊົ່ວຄາວ ຊຶ່ງໄດ້​ສົ່ງຜົນກະທົບ​ອັນໃຫຍ່ຫຼວງຕໍ່ການພັດທະນາເສດຖະກິດ - ສັງຄົມ ຂອງປະເທດເຮົາ.  ສະນັ້ນ, ເລື່ອງການໂຈະການ ເຮັດວຽກຊົ່ວຄາວຂອງກໍາມະກອນ ກໍຂ້ອນຂ້າງມີຫຼາຍ ເພື່ອເຮັດແນວໃດໃຫ້ສາມາດຢູ່ໄດ້ ແລະ ປະຄັບປະຄອງໃຫ້ພະ ນັກງານໃນອົງກອນຂອງຕົນມີວຽກເຮັດງານທໍາ ແລະ ມີລາຍໄດ້ໃນແຕ່ລະເດືອນ, ອັນນີ້ແມ່ນມີຜົນລວມຕໍ່ການພັດ ທະນາເສດຖະກິດ-ສັງຄົມຂອງຊາດ.

 ທ່ານ ນາງ ສຸກັນຍາ ເທບວົງສາ ປະທານ ບໍລິສັດ ທ່ອງທ່ຽວ ວຽງຈັນເຊັນເຕີ້ ຈໍາກັດຜູ້ດຽວ ໄດ້ໃຫ້ສໍາພາດເມື່ອບໍ່​ດົນ​ມານີ້ວ່າ: ພາຍຫຼັງທີ່ມີພະຍາດໂຄວິດ-19 ​ໄດ້​ແຜ່​ລະ​ບາດເຂົ້າມາ​ ສ​ປ​ປ ​ລາວ ເຮັດໃຫ້ຜູ້ປະກອບການຫຼາຍພາກສ່ວນໄດ້ຮັບຜົນກະທົບ. ສໍາລັບບໍລິສັດຂອງ​ຂ້າ​ພະ​ເຈົ້າແມ່ນໄດ້ຮັບຜົນກະທົບເກືອບ 100% ແຕ່ທາງເຮົາກໍພະຍາຍາມເພື່ອເຮັດແນວໃດໃຫ້ບໍລິສັດ ແລະ ພະນັກງານພາຍ​ໃນ​ບໍ​ລິ​ສັດຢູ່ໄດ້ ຊຶ່ງຜ່ານ ມາບໍລິສັດກໍໄດ້ໃຫ້ຄວາມຊ່ວຍເຫຼືອພະນັກງານຈຳນວນໜຶ່ງ ເພື່ອປະຄອງຊີວິດການເປັນຢູ່ຂອງພວກເຂົາ ໃນໄລຍະທີ່ມີໂຄວິດ-19 ໂດຍການເບີກຈ່າຍເງິນ​ອຸດ​ໜູນບໍ່ຫຼຸດ 50% ຂອງເງິນເດືອນປົກກະຕິ ຈຶ່ງເຮັດໃຫ້ບໍ​ລະ​ສັດ​ພວກ​ເຮົາຍັງຢູ່ໄດ້. ເພາະບໍລິສັດພວກເຮົາ ເປັນບໍລິສັດທີ່​ເຮັດ​ໜ້າ​ທີ່ໃຫ້ການບໍລິການ ການທ່ອງທ່ຽວ ແບບລາວທ່ຽວລາວ ແບບເຕັມຮູບແບບ ຊຶ່ງມີສິ່ງອໍານວຍຄວາມສະດວກ​ໃນ​ການ​ບໍ​ລິ​ການ ເປັນຕົ້ນ: ມີລົດຕູ້, ມີພະນັກງານນຳທ່ຽວ, ລົດບັດ ແລະ ອຳນວຍຄວາມສະດວກທາງດ້ານເອກະສານຕ່າງໆ. ພາຍຫຼັງທີ່ລັດຖະ ບານເປີດຕ້ອນຮັບນັກທ່ອງທ່ຽວໃນເຂດການທ່ອງທ່ຽວສີຂຽວຂຶ້ນໃນທ້າຍເດືອນທັນວາ ຂອງປີ 2021 ກໍເຫັນວ່າບໍລິສັດແມ່ນມີນັກທ່ອງທ່ຽວເພີ່ມຂຶ້ນເຖິງ 5-10%. ສໍາລັບມາດຕະການປ້ອງກັນພະຍາດໂຄວິດ-19 ພວກເຮົາກໍໄດ້ປະຕິບັດຕາມທາງຄະນະສະເພາະກິດວາງອອກຄື: ພະນັກງານນໍາທ່ຽວແມ່ນໄດ້ຮັບວັກຊິນ 95% ຂຶ້ນໄປ.  ໃນ​ໄລ​ຍະ​ຜ່ານ​ມາສ່ວນໃຫຍ່ ທາງ​ບໍ​ລິ​ສັດ​ພວກເຮົາເປັນບໍລິສັດທີ່ຮອງຮັບໃຫ້ບໍລິສັດຕ່າງປະເທດ ທີ່ນຳນັກ ທ່ອງທ່ຽວເຂົ້າມາ ໃຊ້ບໍລິການຂອງ​ພວກເຮົາ ຈຶ່ງເຮັດໃຫ້ບໍລິສັດມີສັກກະຍາພາບໃນການເປີດການ​ບໍ​ລິ​ການທ່ອງທ່ຽວລາວ “ແບບລາວທ່ຽວລາວ ຫຼື ການທີ່ນຳນັກທ່ອງທ່ຽວເຂົ້າມາໃນເຂດທ່ອງທ່ຽວສີຂຽວ’’, ບໍ​ລິ​ສັດ​ພວກເຮົາກໍໄດ້ມີນັກທ່ອງທ່ຽວເລີ່ມໃຫ້ຄວາມສົນໃຈຫຼາຍ.

ທ່ານປະທານບໍລິສັດ ທ່ອງທ່ຽວ ວຽງຈັນເຊັນເຕີ້ ຈໍາກັດຜູ້ດຽວ ໄດ້ກ່າວຕື່ມວ່າ: ໃນຕໍ່ໜ້າພວກເຮົາຈະ ໄດ້ກຽມພ້ອມພະນັກງານຫ້ອງການ, ພະນັກງານນໍາທ່ຽວ, ພະນັກງານຂັບລົດ ແລະ ສຶກສາຂໍ້ມູນແຫຼ່ງທ່ອງ ທ່ຽວໃຫ້ຊັດເຈນ ໄວ້ຄອຍບໍລິການໃຫ້ກັບລູກຄ້າ.

ເນື່ອງໃນໂອກາດວັນທີ 1 ພຶດສະພາ 2022 ເປັນວັນກໍາມະກອນສາກົນ ຄົບ​ຮອບ 136 ປີ (1/5/1886 -1/5/2022) ຈະ​ໄດ້​ໝູນ​ວຽນ​ມາ​ອີກວາ​ລະ​ໜຶ່ງ, ໃນທົ່ວໂລກຈະໄດ້ມີການສະເຫຼີມສະຫຼອງ ລະນຶກເຖິງ ວັນທີ່ສໍາຄັນຂອງຊາວຜູ້ອອກແຮງງານໃນທົ່ວໂລກ ເຊັ່ນກັບທຸກໆປີ.  ໃນນາມຕາງໜ້າບໍລິສັດທ່ອງທ່ຽວ ວຽງຈັນເຊັນເຕີ້ ທ່ອງທ່ຽວ ຈໍາກັດຜູ້ດຽວ  ຂໍອວຍພອນໄຊໃຫ້ຊາວຜູ້ອອກແຮງງານທຸກຊັ້ນຄົນ ຂໍໃຫ້ມີສຸຂະພາບເຂັ້ມແຂງ  ປະສົບ ຜົນສຳເລັດໃນໜ້າທີ່ການງານ ປະກອບສ່ວນເຂົ້າໃນການສ້າງສາພັດທະນາເສດຖະກິດ-ສັງຄົມຂອງປະເທດຊາດໃຫ້​ຈະ​ເລີນ​ຮຸ່ງ​ເຮືອງ.