ການນຳເມືອງຊະນະສົມບູນ ແຂວງຈຳປາສັກ ພ້ອມດ້ວຍຄະນະກຳມະການທີ່ກ່ຽວຂ້ອງໄດ້ເຄື່ອນໄຫວລົງຊຸກຍູ້ວຽກງານບໍລິການທ່ອງທ່ຽວຢູ່ແຫຼ່ງທ່ອງທ່ຽວແກ້ງກາງ ເມື່ອບໍ່ດົນມານີ້ ໂດຍມີທ່ານ ເກດມະນີ ຫຼ້າທະວີໄຊ ປະທານແນວລາວສ້າງຊາດເມືອງ ຜູ້ຊີ້ນຳວຽກງານຮອບດ້ານກຸ່ມ IV, ທ່ານ ບົວທອງ ບຸນຍະສິດ ຫົວໜ້າຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມເມືອງ, ທ່ານ ຂັນໄຊ ທິບພະກຸນ ຫົວໜ້າຫ້ອງການຖະແຫຼງຂ່າວ-ວັດທະນະທໍາ ແລະ ທ່ອງທ່ຽວເມືອງ, ມີອົງການປົກຄອງບ້ານພັດທະນາປາກຊອນເຂົ້າຮ່ວມ.

      ທ່ານ ໄພວັນ ສິງທະນູສອນ ເຈົ້າຂອງກິດຈະການແຫຼ່ງທ່ອງທ່ຽວແກ້ງກາງ ໄດ້ລາຍງານໃຫ້ຮູ້ວ່າ: ແຫຼ່ງທ່ອງທ່ຽວແກ້ງກາງ ແມ່ນແຫຼ່ງທ່ອງທ່ຽວທາງທຳມະຊາດໜຶ່ງ ຫຼື ເປັນແກ້ງນ້ຳໄຫຼ ທີ່ຕັ້ງຢູ່ແມ່ນ້ຳເຊໂດນ ບ້ານປາກຊອນ ເມືອງຊະນະສົມບູນ ແຂວງຈຳປາສັກ, ເລີ່ມເປີດໃຫ້ບໍລິການມາແຕ່ປີ 2019 ເຖິງປັດຈຸບັນ, ຜ່ານການຈັດ ຕັ້ງປະຕິບັດໃນໄລຍະຜ່ານມາເຫັນວ່າມີທັງຂໍ້ສະດວກ ແລະ ຂໍ້ຫຍຸ້ງຍາກ, ແຫຼ່ງທ່ອງທ່ຽວແກ້ງກາງ ມີຄວາມແຕກຕ່າງຈາກແຫຼ່ງທ່ອງທ່ຽວອື່ນ ໂດຍສະເພາະແມ່ນອີງໃສ່ສະພາບຝົນຟ້າອາກາດໃນແຕ່ລະປີບໍ່ເອື້ອອຳນວຍ ກໍບໍ່ສາ ມາດເປີດໃຫ້ບໍລິການທ່ອງທ່ຽວຕາມກຳນົດໄວ້ໄດ້ ແລະ ຍ້ອນສະສະພາບການແຜ່ລະບາດຂອງພະຍາດໂຄວິດ- 19 ຈຶ່ງໄດ້ຢຸດກິດຈະການ, ຈາກນັ້ນ, ທາງຄະນະກຳມະການທີ່ເຂົ້າຮ່ວມກໍໄດ້ມີຄຳເຫັນແລກປ່ຽນ ເພື່ອຊຸກຍູ້ສົ່ງເສີມວຽກງານບໍລິການທ່ອງທ່ຽວພາຍໃນແຫຼ່ງທ່ອງທ່ຽວແກ້ງກາງໃຫ້ໄດ້ຮັບການພັດທະນາສາມາດດຶງດູດນັກທ່ຽວທ່ຽວພາຍໃນໄດ້ເຂົ້າມາທ່ຽວຊົມຫຼາຍກວ່າເກົ່າ.

ຂ່າວ-ພາບ: ແຫຼມ ຖວທ