ທ່ານ ຂັນຕີ ສີລະວົງສາ ຮອງເຈົ້າແຂວງເຊກອງ ໄດ້ໃຫ້ຮູ້ວ່າ:  ແຂວງເຊກອງໄດ້ຊຸກຍູ້ກະກຽມເປີດການທ່ອງທ່ຽວສີຂຽວ ຊຶ່ງໄດ້ມີຄວາມພ້ອມແລ້ວຈໍານວນໜຶ່ງເປັນຕົ້ນ: ໄດ້ເປັນເຈົ້າການໃນການຈັດຕັ້ງປະຕິບັດມາດຕະການຄວບຄຸມ, ປ້ອງກັນ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ໂດຍສະເພາະການສັກວັກຊິນໃຫ້ປະຊາກອນກຸ່ມເປົ້າໝາຍໄດ້ກວມເປີເຊັນສູງສົມຄວນ, ສະພາບການລະບາດຂອງພະຍາດດັ່ງກ່າວມາຮອດມື້ນີ້ເຫັນວ່າຫຼຸດລົງ ແຂວງສາມາດເປີດການທ່ອງທ່ຽວໄດ້ເປັນປົກກະຕິໃນໄລຍະທີ 2.

      ແຂວງເຊກອງ ມີຄວາມອຸດົມສົມບູນທາງດ້ານທຳມະຊາດ, ມີສະຖານທີ່ທ່ອງທ່ຽວເຊັ່ນ: ສະຖານທີ່ທ່ອງທ່ຽວທາງດ້ານທຳມະຊາດ, ປະຫວັດສາດ, ວັດທະນະທຳ, ກະສິກຳ, ຫັດຖະກຳ ແລະ ອຸດສະຫະກຳ ທີ່ໄດ້ຮັບການພັດທະນາແລ້ວ, ກຳລັງພັດທະນາ ແລະ ມີແຜນຈະພັດທະນາອີກຈຳນວນໜຶ່ງ, ມີຄວາມພ້ອມທາງດ້ານສະຖານທີ່ພັກເຊົາ, ກິນດື່ມເຊັ່ນ: ໂຮງແຮມ, ເຮືອນພັກ, ຮ້ານອາຫານ, ຮ້ານກິນດື່ມ-ບັນເທີງ, ບຸກຄະລາກອນພາທ່ຽວ, ມີສິ່ງເອື້ອອໍານວຍຄວາມສະດວກທາງດ້ານພື້ນຖານໂຄງລ່າງເສັ້ນທາງເຂົ້າຫາແຫຼ່ງທ່ອງທ່ຽວ, ມີດ່ານສາກົນດາກຕະອອກ-ນາມຢາງ ທີ່ເຊື່ອມຕໍ່ເຊື່ອມຈອດກັບບັນດາແຂວງ ພາກກາງຂອງ ສສ ຫວຽດນາມ ແລະ ອອກສູ່ທະເລ ນະຄອນດານັງ ມີໄລຍະທາງເຊື່ອມໂຍງດ້ານຕາເວັນອອກ ແລະ ຕາເວັນຕົກທີ່ສັ້ນທີ່ສຸດ ເພື່ອຮອງຮັບ-ດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດທີ່ຈະເຂົ້າມາທ່ຽວຢູ່ແຂວງເຊກອງ.

      ມາຮອດປັດຈຸບັນມີຜູ້ຕິດເຊື້ອໂຄວິດ-19 ສະສົມທັງໝົດ 2.718 ຄົນ, ປິ່ນປົວຫາຍດີສະສົມ 2.335 ຄົນ ເທົ່າກັບ 85,90%, ຍັງສືບຕໍ່ປິ່ນປົວ 378 ຄົນ ເທົ່າກັບ 13,90%, ເສຍຊີວິດ 5 ຄົນ ເທົ່າກັບ 0,18%; ສິ່ງສຳຄັນແຂວງໄດ້ເລັ່ງການສັກຢາວັກຊິນໃຫ້ປະຊາກອນກຸ່ມເປົ້າໝາຍມາຮອດປັດຈຸບັນເຂັມທີ 1 ສັກໄດ້ 82%, ເຂັມທີ 2 ສັກໄດ້ 66,5%, ເຂັມທີ 3 ສັກໄດ້ 21%, ເຂັມທີ 4 ສັກໄດ້ 0,4% ຂອງປະຊາກອນທົ່ວແຂວງ.

ຂ່າວ-ພາບ: ພຸດທະສອນ