ໃນວັນທີ 9 ພຶດສະພາ ຜ່ານມາ, ທ່ານ ໄຊສົມບູນ ສຸວັນດາລາ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງຄຳມ່ວນ ໄດ້ລົງຕິດຕາມຄວາມຄືບໜ້າການພັດທະນາແຫຼ່ງທ່ອງທ່ຽວຖໍ້າຊຽງລຽບ ຊຶ່ງຕັ້ງຢູ່ຫ່າງຈາກເທດສະບານເມືອງທ່າແຂກ ປະມານ 10 ກວ່າກິໂລແມັດ ໂດຍແມ່ນ ບໍລິສັດ ເຄເຄ ພັດທະນາການທ່ອງທ່ຽວຈຳກັດ ເຂົ້າມາພັດທະນາສ້າງກິດຈະກຳ ແລະ ສິ່ງອຳນວຍຄວາມສະດວກຕ່າງໆເພື່ອບໍລິການແກ່ນັກທ່ອງທ່ຽວ.

ປັດຈຸບັນການພັດທະນາແຫຼ່ງທ່ອງທ່ຽວດັ່ງກ່າວໄດ້ສຳເລັດຫຼາຍກິດຈະກຳເປັນຕົ້ນ: ການສ້າງຂົວອູ່ ເພື່ອຍ່າງຊົມທຳມະຊາດ ຈຳນວນ 4 ຈຸດ, ມີຄວາມຍາວ 100 ກວ່າແມັດ, ຂົວຍ່າງທາຊານແບບ 1 ຖານ ລັກສະນະໂອ່ນເອ່ນໄປມາ, ສ້າງຂົວສະລິງຮູບຕົວວີ (V) ມີຖານຂ້າມຫ້ວຍຊຽງລຽບ ຍາວ 50 ແມັດ, ຕິດຕັ້ງສາຍຂີ່ສະລິງ 2 ຈຸດຍາວ 280 ແມັດ, ຕາໜ່າງແມງມຸມ ແລະ ຂົວຍ່າງໄປຫາຈຸດຖ່າຍຮູບຢູ່ບໍລິເວນໜ້າຖໍ້າ, ການສ້າງຫ້ອງນໍ້າສະອາດ, ກິດຈະກຳຂີ່ເຮືອກາຍັກຊົມຖໍ້າໄດ້ສຳເລັດແລ້ວ 100% ຄາດວ່າຈະເປີດ ບໍລິການໃນກາງເດືອນພຶດສະພານີ້, ນອກນີ້ຍັງມີການບໍລິການຮ້ານກາເຟ, ຮ້ານອາຫານເທິງຕົ້ນໄມ້, ເຮືອນພັກແຮມເທິງຕົ້ນໄມ້ ການກໍ່ສ້າງແມ່ນປະຕິບັດໄດ້ປະມານ 80% ແລະ ຈະໃຫ້ສຳເລັດພ້ອມເປີດໃຫ້ບໍລິການ ໃນເດືອນມິຖຸນາເປັນຕົ້ນໄປ.

ຂ່າວ-ພາບ: ກອງຄຳ