ໜັງສືພິມ ປະຊາຊົນ

ກຸມບໍລິການທ່ອງທ່ຽວຖ້ຳຈອມອອງ ພົບປະແລກປ່ຽນບົດຮຽນ ທີ່ຕາດນ້ຳກັດຢໍລະປ່າ

ເຜີຍແຜ່ໂດຍ: ວິໄລສັກ ເວລາ: 19/05/2022 08:50:39 ຈຳນວນຢ້ຽມຊົມ 6094 ຄັ້ງ

ເພື່ອສົ່ງເສີມການທ່ອງທ່ຽວພາຍໃນ ເຮັດໃຫ້ການບໍລິການດີ ມາໃນວັນທີ 16 ພຶດສະພາ ນິ້ ກຸ່ມບໍລິການທ່ອງທ່ຽວຖ້ຳຈອມອອງ ໄດ້ພາກັນເຄື່ອນໄຫວທ່ຽວຊົມແລກປ່ຽນບົດຮຽນຢູ່ທີ່ຕາດນ້ຳກັດຢໍລະປ່າ ແລະ ບາງຈຸດສຳຄັນພາຍໃນເທດສະບານແຂວງອຸດົມໄຊ, ທ່ານ ຄຳແດງ ຕຸ້ຍມະນີ ຮອງນາຍບ້ານໆຈອມອອງ ໄດ້ໃຫ້ສຳພາດຕໍ່ຜູ້ສື່ຂ່າວວ່າ: ຈຸດປະສົງໃນການລົງເຄື່ອນໄຫວທ່ຽວຊົມສະຖານທີ່ແຫຼ່ງທ່ອງທ່ຽວພາຍໃນເທດສະບານແຂວງອຸດົມໄຊ ແລະ ຕາດນ້ຳກັດຢໍລະປ່າ ໃນຄັ້ງນີ້, ແມ່ນເພື່ອເຮັດໃຫ້ຊາວບ້ານ ແລະ ກຸມບໍລິການນຳທ່ຽວປະຈຳຖ້ຳຈອມອອງໄດ້ຮຽນຮູ້ກ່ຽວກັບການບໍລິການຮັບແຂກທັງພາຍໃນ ແລະ ຕ່າງປະເທດ ທີ່ມາທ່ຽວຊົມ ເພື່ອອຳນວຍຄວາມສະດວກໃນການຕ້ອນຮັບນຳພາແຂກທ່ຽວຊົມຖ້ຳຈອມອອງ ໃຫ້ສະດວກສະບາຍ.

ໃນແຕ່ລະວັນ, ຊາວບ້ານໄດ້ຜັດປ່ຽນກັນແບ່ງຈຸໜ່ວຍ ເພືຶ່ອຕ້ອນຮັບແຂກຈະມາທ່ຽວຊົມຖ້ຳຈອມອອງ, 4 ເດືອນຜ່ານມາມີແຂກມາທ່ຽວຊົມ 4.000 ຄົນ, ສາມາດເກັບລາຍຮັບໄດ້ 60 ລ້ານກີບ, ໃນຕໍ່ໜ້າຄາດວ່າຈະມີຜູ້ເດີນທາງເຂົ້າມາທ່ຽວຊົມເພີ່ມຂຶ້ນ. ການເປີດປະເທດແບບເຕັມຮູບແບບຈະເປັນສ່ວນໜຶ່ງໃນການກະຕຸ້ນການທ່ອງທ່ຽວ ແລະ ປະກອບສ່ວນເຂົ້າໃນການແກ້ໄຂບັນຫາຫຍຸ້ງຍາກທາງດ້ານເສດຖະກິດຂອງປະເທດ, ປະກອບສ່ວນໃນການສ້າງວຽກເຮັດງານທຳ ແລະ ກະຈ່າຍລາຍໄດ້ສູ້ປະຊາຊົນ. ນອກຈາກນິ້, ຊາວບ້ານມີລາຍຮັບເພີ່ມຈາກການຂາຍຜະລິດຕະພັນພູມປັນຍາທີ່ຊາວບ້ານຈັກສານຕື່ມອີກ.

ການພົບປະແລກປ່ຽນບົດຮຽນຄັ້ງນີ້, ກຸ່ມບໍລິການຖ້ຳຈອມອອງ ແມ່ນໄດ້ຮຽນຮູ້ຫຼາຍຢ່າງໂດຍສະເພາະແມ່ນການບໍລິການທີ່ໄດ້ມາດຕະຖານຂອງສະຖານທີ່ທ່ອງທ່ຽວຕ່າງໆພາຍໃນແຂວງອຸດົມໄຊ ເພື່ອນຳໄປປັບປຸງໃຊ້ເຂົ້າໃນກຸ່ມຂອງຕົນເອງໃຫ້ມີຄຸນນະພາບ ໃຫ້ນັກທ່ອງທ່ຽວມີຄວາມປະທັບໃຈຕື່ມອິກ.

(ຂ່າວ-ພາບ: ດວງຕາ ແສງມະນີ)

ຂ່າວທີ່ໄດ້ຮັບຄວາມນິຍົມ