ໜັງສືພິມ ປະຊາຊົນ

“ພວກເຮົາຕ້ອງມີເຮືອບິນຂະໜາດໃຫຍ່ເປັນຂອງຕົນເອງ”

ເຜີຍແຜ່ໂດຍ: ວິໄລພອນ ເພັດໄພບູນ ເວລາ: 20/05/2022 13:35:32 ຈຳນວນຢ້ຽມຊົມ 2106 ຄັ້ງ

ວັນທີ 14 ພຶດສະພາ ຜ່ານມາ, ເຮືອບິນຂະໜາດໃຫຍ່ C919 ເລກ B-001J ໄດ້ບິນຂຶ້ນສູ່ທ້ອງຟ້າ ແລະ ລົງຈອດຢູ່ສະໜາມບິນຜູຕຸ່ງ ນະຄອນຊຽງໄຮ ຢ່າງປອດໄພ ຊຶ່ງເປັນຂີດໝາຍສະແດງໃຫ້ເຫັນວ່າ: ເຮືອບິນຂະໜາດໃຫຍ່ C919 ລຳທຳອິດທີ່ ບໍລິສັດຜະລິດເຮືອບິນການຄ້າຈີນ ຈຳກັດ ໃກ້ຈະສົ່ງມອບໃຫ້ລູກຄ້າ ໄດ້ທົດລອງການບິນຄັ້ງທຳອິດດ້ວຍຜົນສຳເລັດຢ່າງຈົບງາມ.

ເຮືອບິນ C919 ແມ່ນເຮືອບິນໂດຍສານຂະໜາດໃຫຍ່ ທາງເດີນດຽວລຸ້ນທຳອິດທີ່ຄົ້ນຄວ້າ ແລະ ຜະລິດຕາມມາດຕະຖານສາກົນທີ່ທັນສະໄໝ 100%, ເປັນ ຊັບສິນທາງປັນຍາຂອງຈີນ 100%, ສະມັດຖະນະເທົ່າທຽມກັບເຮືອບິນໂດຍສານຂະໜາດໃຫຍ່ທາງເດີນດຽວລຸ້ນໃໝ່ທີ່ໄດ້ນຳໃຊ້ຫຼາຍທີ່ສຸດຢູ່ໃນສາກົນ.

ເຮືອບິນໂດຍສານຂະໜາດໃຫຍ່ທີ່ຜະລິດໂດຍປະເທດຈີນ, ແມ່ນຄວາມໃຝ່ຝັນຂອງຊາວຈີນມາຫຼາຍເຊັ່ນຄົນ. ວັນທີ 23 ພຶດສະພາ ປີ 2014, ໃນໄລຍະທີ່ທ່ານປະທານ ສີຈິ້ນຜິງ ໄປສຳຫຼວດກວດກາວຽກງານຢູ່ນະຄອນຊຽງໄຮ, ເພິ່ນໄດ້ໄປສູນອອກແບບ ແລະ ຄົ້ນຄວ້າພັດທະນາເຮືອບິນການຄ້າຂອງຈີນໂດຍສະເພາະ, ທ່ານໄດ້ຂຶ້ນໄປເບິ່ງເຮືອບິນ C919 ຕົ້ນແບບ, ນັ່ງຢູ່ບ່ອນຂອງນັກບິນຫຼັກໃນຫ້ອງຂັບເຮືອບິນ, ຮັບຮູ້ໜ້າທີ່ໃຊ້ງານຂອງອຸປະກອນຕ່າງໆ ເຊັ່ນ:ໜ້າ ຈໍບອກຄວາມໄວ, ໜ້າຈໍບອກຄວາມສູງ, ແຜນທີ່ເສັ້ນທາງການບິນ ແລະ ອື່ນໆ.

ທ່ານ ສີຈິ້ນຜິງ ໄດ້ເວົ້າກັບຄົນທັງຫຼາຍວ່າ: ຈີນແມ່ນຕະຫຼາດເຮືອບິນຂະ ໜາດ ໃຫຍ່ທີ່ສຸດ, ໃນເມື່ອກ່ອນມີບາງຄົນເວົ້າວ່າ: ການຜະລິດເອງບໍ່ທໍ່ຊື້ຈາກຜູ້ອື່ນ, ການຊື້ບໍ່ທໍ່ການເຊົ່າເອົາ, ແນວຄິດນີ້ຕ້ອງຕ່າວປີ້ນຄືນ, ຄື: ຕ້ອງທຸ້ມເທເງິນທຶນຫຼາຍ ກວ່າເກົ່າເພື່ອດຳເນີນການຄົ້ນຄວ້າ ພັດທະນາ ແລະ ຜະລິດເຮືອບິນຂະໜາດໃຫຍ່ເປັນຂອງຕົນເອງ.

ນອກນີ້, ທ່ານ ສີຈິ້ນຜິງ ເຄີຍເນັ້ນໜັກແລ້ວເນັ້ນໜັກອີກໃນຫຼາຍກາລະໂອກາດວ່າ: ເຕັກໂນໂລຊີແກນກາງທີ່ເປັນຂໍກຸນແຈສຳຄັນ ແມ່ນສິ່ງທີ່ “ຫາຊື້ບໍ່ໄດ້ ແລະ ຂໍເອົາບໍ່ໄດ້ນຳຜູ້ອື່ນ”.

ດັ່ງນັ້ນ, ໃນສູ່ມື້ນີ້ ຄົນໃນໂລກໄດ້ເຫັນຍານສຳຫຼວດດາວອັງຄານ “ທ່ຽນເວິ້ນ 1”, ເຮືອດຳນ້ຳ “ເຟີນໂຕເຈີ” ທີ່ໄດ້ດຳນ້ຳເລິກສູ່ຮ່ອມທະເລມາເຣຍນາ, ການຄົ້ນຄວ້າຜະລິດນ້ຳຢາກວດເຊື້ອພະຍາດໂຄວິດ-19 ແລະ ວັກຊິນປ້ອງກັນພະຍາດທີ່ມີປະສິດທິພາບສູງ ຊຶ່ງຜົນງານດ້ານຕ່າງໆຂອງຈີນເຫຼົ່ານີ້ໄດ້ຈາລຶກໄວ້ຢູ່ບົນເສັ້ນທາງທີ່ກ້າວໄປສູ່ຈອມພູສູງແຫ່ງວິທະຍາສາດເຕັກນິກ.

ສຳລັບການຜະລິດເຮືອບິນດ້ວຍຕົນເອງ, ທ່ານ ສີຈິ້ນຜິງ ກ່າວວ່າ: “ຂ້າພະເຈົ້າຝາກຄວາມຫວັງເປັນຢ່າງຍິ່ງໄວ້ກັບບັນດາສະຫາຍ. ພວກເຮົາຕ້ອງມີເຮືອບິນຂະໜາດໃຫຍ່ເປັນຂອງຕົນເອງ!” ໂດຍໄດ້ເຮັດໃຫ້ພະນັກງານທຸກຄົນມີຄວາມຕື່ນເຕັ້ນຫຼາຍ ແລະ ໄດ້ຕົບມືຢ່າງຄຶກຄື້ນ.

ຫຼັງຈາກການສຳຫຼວດກວດກາວຽກງານຂອງ ທ່ານ ສີຈິ້ນຜິງ ຄັ້ງນັ້ນໄດ້ 3 ປີ, ຄື ວັນທີ 5 ພຶດສະພາປີ 2017, ເຮືອບິນ C919 ໄດ້ບິນຂຶ້ນສູ່ທ້ອງຟ້າ ແລະປະສົບຜົນສຳເລັດໃນການບິນຄັ້ງທຳອິດ. ປັດຈຸບັນ, ການທົດລອງການບິນຄັ້ງທຳອິດຂອງເຮືອບິນໂດຍສານຂະໜາດໃຫຍ່ C919 ລຳທຳອິດທີ່ຈະສົ່ງມອບໃຫ້ລູກຄ້າໄດ້ປະສົບຜົນສຳເລັດຢ່າງຈົບງາມ, ຄວາມໃຝ່ຝັນທີ່ “ຈີນຕ້ອງມີເຮືອບິນຂະ ໜາດໃຫຍ່ເປັນຂອງຕົນເອງ” ໄດ້ບັນລຸຜົນເປັນຈິງແລ້ວ.