ຫົວ​ຂໍ້ : ແລ່ນ ວຽງຈັນ ຮາຟມາຣາທອນນາໆຊາດ 1 ມີນາ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 26/02/2020 09:11:00 ຈຳ​ນວນ​ຜູ້​ເຂົ້າ​ຢ້ຽມ​ຊົມ 1066 ຄັ້ງ

  ພິທີ​ຖະແຫຼງ​ຂ່າວ​ງານ​ແລ່ນ​ວຽງ​ຈັນ ຮາ​ຟ​ມາ​ຣາ​ທອນ​ນາໆ​ຊາດ ຄັ້ງ​ທີ V ປະຈຳ​ປີ 2020 ໄດ້ຈັດ​ຂຶ້ນ​ວັນ​ທີ 21 ກຸມພາ​ຜ່ານ​ມາ ຢູ່​ຫ້ອງການ​ຄະນະ​ກຳມະການ​ໂອ​ແລ​ມ​ປິກ​ລາວ (ຄອລ) ມີ​ທ່ານ ກະເສມ ອິນ​ທະລາ ຮອງ​ປະທານ ຄອລ, ທ່ານ ຈັນ​ດີ ພົມ​ມະ​ບຸດ ປະທານ​ສະຫະພັນ​ກິລາ​ແລ່ນ​-​ລານ​ແຫ່ງ​ຊາດ​ລາວ ພ້ອມ​ດ້ວຍ​ບັນດາ​ຜູ້​ໃຫ້ການ​ສະໜັບສະໜູນຄະນະ​ຮັບຜິດຊອບ​ຈັດ​ງານ​ແຂ່ງຂັນ ນັກ​ກິລາ ແລະ ສື່​ມວນ​ຊົນ​ເຂົ້າ​ຮ່ວມ.
  ທ່ານ ຈັນ​ດີ ພົມ​ມະ​ບຸດ ກ່າວ​ວ່າ: ສືບ​ເນື່ອງ​ຈາກ​ຜົນສຳເລັດ​ຂອງ​ການ​ແຂ່ງຂັນ​ວຽງ​ຈັນ ຮາ​ຟ​ມາຣາ​ທອນ 4 ປີຜ່ານມາ ຊຶ່ງ​ມີ​ຈຳນວນ​ນັກ​ແລ່ນ​ທັງ​ພາຍ​ໃນ ແລະ ຕ່າງປະເທດ​ເຂົ້າ​ຮ່ວມ​ເພີ່ມ​ຂຶ້ນ​ແຕ່​ລະ​ປີກໍ​ເພື່ອ​ເປັນ​ການ​ສົ່ງເສີມ​ການ​ອອກກຳລັງ​ກາຍ ເພື່ອ​ສຸຂະພາບ ແລະ ມິດຕະພາບລະຫວ່າງ​ນັກ​ແລ່ນ​ດ້ວຍ​ກັນ ພ້ອມ​ກັນ​ນັ້ນກໍ​ເພື່ອ​ເຮັດ​ໃຫ້​ນະຄອນຫຼວງ​ວຽງ​ຈັນ ກາຍເປັນ​ນະຄອນຫຼວງ​ທີ່​ມີ​ການ​ຈັດການ​ແຂ່ງຂັນ​ກິລາ​ມວນ​ຊົນ ໃນ​ລະດັບ​ນາໆ​ຊາດ ນອກ​ນັ້ນ ຍັງ​ເປັນ​ການ​ສົ່ງເສີມ​ການທ່ອງທ່ຽວ​ລາວ ໃຫ້​ມີ​ບັນຍາກາດ​ຄຶກຄື້ນ​ຜ່ານ​ກິດຈະກຳ​ນີ້ ຊຶ່ງ​ເສັ້ນທາງ​ແລ່ນ​ຢູ່​ນະຄອນຫຼວງ​ວຽງ​ຈັນ ແມ່ນ​ມີ​ຄວາມ​ໜ້າ​ສົນໃຈ​ຫຼາຍ ແລະ ມີ​ເອກະລັກ ເນື່ອງ​ຈາກ​ແລ່ນ​ຜ່ານ​ຈຸດ​ທ່ອງ​ທ່ຽວ​ວັດທະນະທຳ ທີ່​ມີ​ສັນຍາ​ລັກ​ຂອງ​ລາວ​ເຮົາ ແລະ ເສັ້ນທາງ​ແຄມ​ຂອງ ທີ່​ມີ​ທິວ​ທັດ​ອັນ​ສວຍ​ງາມ ສາມາດ​ດຶງ​ດູດ​ນັກ​ແລ່ນ​ຈາກ​ທົ່ວ​ໂລກ​ໄດ້ ຊຶ່ງ​ຄາດ​ວ່າ ປີ​ນີ້​ຈະ​ມີ​ນັກ​ແລ່ນ​ເຂົ້າ​ຮ່ວມ 4.800 ຄົນ ໃນ​ນັ້ນ ນັກ​ກິລາ​ຕ່າງປະເທດ ປະມານ 500 ຄົນ ຈາກ 35 ສັນ​ຊາດ.
  ທ່ານ ສິດທິໄຊ ສັກ​ປະເສີດ ເລ ຂາທິການ​ສະຫະພັນ​ແລ່ນ​-​ລານ​ແຫ່ງ​ຊາດ ກ່າວ​ວ່າ: ການ​ແຂ່ງຂັນ​ຄັ້ງ​ນີ້ ລວມ​ມີ 3 ລາຍການ​ຄື: ປະເພດ ຮາ​ຟ​ມາ​ຣາ​ທອນ 21 ກິໂລແມັດ, ປະເພດ ມິ​ນິ​ມາ​ຣາ​ທອນ 10 ກິໂລແມັດ ແລະ ແລ່ນ​-​ຍ່າງ​ເພື່ອ​ສຸຂະພາບ 5 ກິໂລ ແມັດ (ສຳລັບ​ອັນ​ດັບ 1-5 ປະເພດ​ຍິງ​-​ຊາຍ ໃນ​ຮຸ່ນ​ທົ່ວ​ໄປ ແລະ ເກນ ​ອາຍຸ ໄລຍະ 10 ແລະ 21 ກິໂລແມັດ ແມ່ນ​ມີ​ຂັນ ແລະ ເງິນ​ລາງວັນ ລວມ​ທັງ​ໝົດ 78 ລ້ານ​ກວ່າ​ກີບ).
  ສຳລັບ​ຈຸດ​ປ່ອຍ ແລະ ເສັ້ນ​ໄຊ ແມ່ນ​ບໍລິເວນ​ປະຕູໂຂງ​ເດີ່ນ​ທາດຫຼວງ ສ່ວນ​ເສັ້ນທາງ​ແລ່ນ 21 ກິໂລແມັດ ເລີ່ມ​ເວລາ 5:00 ໂມງ ແຕ່​ທາດ​ຫຼວງ​-​ປະຕູ​ໄຊ​-​ຕະຫຼາດ​ເຊົ້າ​-​ສາມ​ແສນ​ໄທ​-​ໄຟ​ແດງ​ບ້ານ​ອາກາດ ໂຄ້ງ​ກັບ​-​ລ້ຽວ​ຂົວ​ເຂົ້າ​ເສັ້ນ​ປາກ​ປາ​ສັກ​-​ແຄມ​ຂອງ​ຮອດ​ໂຮງແຮມ​ແລນ​ມາກ ໂຄ້ງ​ກັບ​-​ຫໍ​ພັກ​ປາກ​ປ່າ​ສັກ​-​ວັດ​ອິນ​ແປງ​-​ຫໍຄຳ​-​ທາດຫຼວງ, ປະເພດ 10 ກິໂລແມັດ ເລີ່ມ​ເວລາ 5:30 ໂມງ ແຕ່​ທາດຫຼວງ​-​ອະ​ນຸ​ສາ​ວະ​ລີ​-​ຕະຫຼາດ​ເຊົ້າ​-​ສາມ​ແສນ​ໄທ​-​ລ້ຽວ​ຊ້າຍ​ຂ້າງ​ໂຮງແຮມ Crow Plaza ດ້ານ​ຫຼັງ​ເຈົ້າຟ້າ​ງຸ່ມ​-​ລ້ຽວ​ຂົວ​ໄປ​ປາກ​ປ່າ​ສັກ​-​ຮອດ​ບໍລິເວນ​ເສົາ​ທຸງ​ແຄມ​ຂອງ​ລ້ຽວ​ກັບ​-​ຫໍ​ພັກ​ປາກ​ປ່າ​ສັກ​-​ວັດ​ອິນ​ແປງ​-​ຫໍຄຳ​-​ທາດຫຼວງ ແລະ ປະເພດ 5 ກິໂລແມັດ ເລີ່ມ​ເວລາ 6:00 ໂມງ ແຕ່​ທາດ​ຫຼວງ​-​ອະ​ນຸ​ສາ​ວະ​ລີ​-​ໄຟ​ແດງ​ຕະຫຼາດ​ເຊົ້າ​ໂຄ້ງ​ກັບ​ທາດ​ຫຼວງ.
(ຂ່າວ: ວົງ​ຈອນ​ກິລາ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110