ການທ່ອງທ່ຽວຢູ່ເມືອງວັງວຽງ ແຂວງວຽງຈັນ ກັບມາມີບັນຍາດຄຶກຄື້ນອີກຄັ້ງ ພາຍຫຼັງທີ່ລັດຖະບານເປີດປະເທດ ເຮັດໃຫ້ຜູ້ປະກອບການທຸລະກິດເພິ່ງພໍໃຈ ມີກຳລັງໃຈໃນການດຳເນີນທຸລະກິດ ພ້ອມມີແຜນຮອງຮັບນັກທ່ອງທ່ຽວທີ່ຈະເຂົ້າມາທ່ອງທ່ຽວເມືອງວັງວຽງ ໂດຍຜ່ານເສັ້ນທາງລົດໄຟລາວ-ຈີນ ແລະ ຜ່ານເສັ້ນທາງດ່ວນວຽງຈັນ-ວັງວຽງ.

ທ່ານ ຫົງຄຳ ແກ້ວດວງສີ ປະທານ ບໍລິສັດ ທ່ອງທ່ຽວນໍ້າທິບ ຈຳກັດ ທັງເປັນຜູ້ຈັດການບໍລິສັດລາວ ຟຣາຍອິງມີເດຍ ຈຳກັດ (ບອນລູນ) ໄດ້ໃຫ້ສຳພາດຕໍ່ສື່ມວນຊົນເມື່ອວັນທີ 24 ພຶດສະພາ ນີ້ ທີ່ເມືອງວັງວຽງ ແຂວງວຽງຈັນ ວ່າ: ພາຍຫຼັງລັດຖະບານໄດ້ເປີດປະເທດຖືເປັນຄວາມໂຊກດີທີ່ ສປປ ລາວໄດ້ມີເສັ້ນທາງລົດໄຟລາວ-ຈີນ ຊຶ່ງເປັນປັດໄຈສຳຄັນໃນການຄົມມະນາຄົມ ການໄປມາຫາສູ່ ການຂົນສົ່ງສິນຄ້າພາຍໃນຈາກນະຄອນຫຼວງວຽງຈັນຫາພາກເໜືອ ແລະ ເຊື່ອມຕໍ່ໄປຍັງ ສປ ຈີນ ເຮັດໃຫ້ການເດີນສະດວກສະບາຍ ວ່ອງໄວ ທັນເວລາ ມີຄວາມປະຢັດ ແລະ ປອດໄພສູງ, ເປັນສີສັນໃນການທ່ອງທ່ຽວເຮັດໃຫ້ຜູ້ປະກອບການທຸລະກິດຂອງເມືອງວັງວຽງໄດ້ຮັບຜົນປະໂຫຍດໄປນໍາ ຊຶ່ງໄດ້ສ້າງຄວາມເພິ່ງພໍໃຈ ແລະ ສ້າງກຳລັງໃຈ ໃນການຊຸກຍູ້ດຳເນີນທຸລະກິດ ຊຶ່ງໃນໄລຍະທຳອິດທີ່ເປີດນໍາໃຊ້ເສັ້ນທາງລົດໄຟລາວ-ຈີນ ຖືເປັນກະແສສຳຄັນເພື່ອກະຕຸ້ນການທ່ອງທ່ຽວ ຍູ້ແຮງເຮັດໃຫ້ວຽກງານການທ່ອງທ່ຽວເມືອງວັງວຽງເພີ່ມຂຶ້ນຫຼາຍເທົ່າໂຕ ໂດຍສະເພາະຂ້າພະເຈົ້າທີ່ບໍ່ເຄີຍຂີ່ລົດໄຟ ກໍໄດ້ໄປທົດລອງຂີ່ ຈຶ່ງຮັບຮູ້ໄດ້ວ່າເສັ້ນທາງລົດໄຟລາວ-ຈີນ ມັນໄດ້ອຳນວຍຄວາມສະດວກໃນການເດີນທາງ, ການຂົນສົ່ງສິນຄ້າ ທັງປະຢັດເວລາໄດ້ຫຼາຍເທົ່າ ແລະ ມີຄວາມປອດໄພສູງ ຊຶ່ງເປັນໂອກາດອັນດີເຮັດໃຫ້ມີນັກທ່ອງທ່ຽວທັງພາຍໃນ-ຕ່າງປະເທດ ໂດຍສະເພາະນັກທ່ອງທ່ຽວຈາກໄທມາທ່ອງທ່ຽວເປັນກຸ່ມເຂົ້າມາທ່ອງທ່ຽວເມືອງວັງວຽງຫຼາຍຂຶ້ນ ໂດຍຜ່ານເສັ້ນທາງລົດໄຟລາວ-ຈີນ ຊຶ່ງສະແດງອອກໃນໄລ​ຍະວັນສຸກ, ເສົາ, ອາທິດ ມີນັກທ່ອງທ່ຽວເຂົ້າມາທ່ອງທ່ຽວເມືອງວັງວຽງ ປະມານ 100 ຄົນຕໍ່ອາທິດ, ເວົ້າເລື່ອງການບໍລິການມີລ່ອງເຮືອ, ຂີ່ສະລິງ ແລະ ຂີ່ບອນລູນ ແລະ ອື່ນໆ ຊຶ່ງທາງບໍລິສັດໄດ້ເອົາໃຈໃສ່ດ້ານການຮັກສາຄວາມປອດໄພໃຫ້ກັບລູກຄ້າເປັນໝາກຫົວໃຈຫຼັກ ຊຶ່ງເປັນກົດເຫຼັກຂອງບໍລິສັດ ຖ້າຫາກຂາດສິ່ງໃດສິ່ງໜຶ່ງທີ່ບໍ່ພຽງພໍ ພວກເຮົາຈະບໍ່ບໍລິການລູກຄ້າເດັດຂາດເພື່ອຫຼີກລ່ຽງຄວາມສ່ຽງທີ່ຈະເກີດຂຶ້ນໃຫ້ໄດ້ຫຼາຍທີ່ສຸດ.

ສຳລັບການບິນບອນລູນນັກບິນໄດ້ມີປະສົບການໃນການບິນ 600-700 ຊົ່ວໂມງ ສະເພາະຢູ່ເມືອງວັງວຽງ ຊຶ່ງໃນການບິນແຕ່ລະຄັ້ງບັນຫາສຳຄັນແມ່ນອາໄສຄວາມຊິນເຄີຍຂອງສະພາບອາກາດ ແລະ ພື້ນທີ່ ໃນໄລຍະເປີດປະເທດຂຶ້ນບິນອາທິດໜຶ່ງ 2-3 ຖ້ຽວ, ຄ່າບໍລິການຄົນໜຶ່ງ 800.000 ກີບຕໍ່ຄັ້ງ, ຂຶ້ນບິນເທື່ອໜຶ່ງໃຊ້ເວລາ 25 ນາທີ, ເພື່ອຮອງຮັບນັກທ່ອງທ່ຽວທີ່ຈະເຂົ້າມາທ່ອງທ່ຽວເປັນຈຳນວນຫຼາຍພາຍຫຼັງເປີດປະເທດ ທາງບໍລິສັດໄດ້ເອົາໃຈໃສ່ຕໍ່ພະນັກງານ ໂດຍມີການຖອດຖອນບົດຮຽນ, ກ່ອນການບິນບອນລູນ ແລະ ຫຼັງຈາກບິນບອນລູນທຸກຄັ້ງຈະມີການອະທິບາຍເພື່ອແກ້ໄຂຈຸດບົກຜ່ອງ ເພື່ອເຮັດໃຫ້ພະນັກງານມີຄວາມຕື່ນຕົວ ມີບົດຮຽນ ແລະ ເອົາໃຈໃສ່ເປັນພິເສດຕໍ່ໜ້າທີ່ຄວາມຮັບຜິດຊອບຂອງຕົນ, ເພື່ອໃຫ້ນັກທ່ອງທ່ຽວມີຄວາມປະທັບໃຈ ເພິ່ງພໍໃຈ ເພື່ອດຶງດູດນັກທ່ອງທ່ຽວເຂົ້າມາທ່ອງທ່ຽວໃນຕົວເມືອງວັງວຽງໃຫ້ຫຼາຍຂຶ້ນ.

ທ່ານກ່າວໃຫ້ຮູ້ອີກວ່າ: ໃນອະນາຄົດທາງບໍລິສັດໄດ້ເນັ້ນໜັກການໂຄສະນາຜ່ານສື່ອອນລາຍ ຊຶ່ງທາງບໍລິສັດໄດ້ມີ ເຟສນໍ້າທິບທົວວັງວຽງລາວ ແລະ ເຟສບອນລູນວັງວຽງ ຊຶ່ງເປັນຊ່ອງທາງໃນການໂຄສະນາຜ່ານສື່ທາງອອນລາຍ, ໃນປັດຈຸບັນທາງບໍລິສັດກຳລັງປັບປຸງບາງກິດຈະກຳເພື່ອໃຫ້ນັກທ່ອງທ່ຽວທີ່ເຄີຍມາໃຊ້ບໍລິການທ່ອງທ່ຽວນໍາພວກເຮົາມີຄວາມເຊື່ອໝັ້ນມາແລ້ວ ຢາກກັບຄືນມາທ່ອງທ່ຽວເມືອງວັງວຽງອີກຄັ້ງ ຊຶ່ງໄດ້ສ້າງບ່ອນຖ່າຍຮູບຢູ່ຖໍ້າປູຄຳ, ສ້າງຈຸດຊົມວີວ, ມີປ້າຍເປັນສັນຍາລັກສະເພາະ, ສຳລັບບອນລູນພາຍຫຼັງທີ່ຂີ່ແລ້ວໄດ້ມີການແນະນຳໃຫ້ລູກຄ້າຖ່າຍຮູບເປັນສື່ໂຄສະນາອີກຮູບແບບໜຶ່ງ ຊຶ່ງເປັນອີກກິດຈະກໍາເພື່ອກະຕຸ້ນການທ່ອງທ່ຽວໃຫ້ມີບັນຍາກາດຄືກຄື້ນຍິ່ງຂຶ້ນ.

ຂ່າວ: ພູວັນ