ການທ່ອງທ່ຽວຢູ່ນະຄອນ-ຫຼວງພະບາງ ແຂວງຫຼວງພະບາງ ກັບມາມີບັນຍາກາດຄຶກຄື້ນອີກຄັ້ງ ໂດຍຜ່ານເສັ້ນທາງລົດໄຟລາວ-ຈີນ ທີ່ສະດວກສະບາຍ ວ່ອງໄວ ປະຢັດເວລາໃນການເດີນທາງ ພາຍຫຼັງທີ່ລັດຖະບານເປີດປະເທດ ເຮັດໃຫ້ມີນັກທ່ອງທ່ຽວເຂົ້າມາທ່ອງທ່ຽວແຂວງຫຼວງພະບາງເປັນຈຳນວນຫຼາຍ ຜູ້ປະກອບການທຸລະກິດດີໃຈ ຊີວິດການເປັນຢູ່ດີຂຶ້ນ.

ທ່ານນາງ ຕູ່ ມິ່ງບຸບຜາ ເຈົ້າຂອງທຸລະກິດຂາຍເສື້ອຜ້າ ຊຶ່ງມີເສື້ອຜ້າຍິງ-ຊາຍ ແລະ ເສື້ອຜ້າເດັກນ້ອຍ ຮ້ານຕັ້ງຢູ່ຕະຫຼາດສວນລາດແລງ ນະຄອນ-ຫຼວງພະບາງ ແຂວງຫຼວງພະບາງ ໄດ້ໃຫ້ສຳພາດຕໍ່ສື່ມວນຊົນໃນວັນທີ 25 ພຶດສະພາ ຜ່ານມາວ່າ: ພາຍຫຼັງທີ່ລັດຖະບານເປີດປະເທດເຮັດໃຫ້ມີນັກທ່ອງທ່ຽວທັງພາຍໃນ ແລະ ຕ່າງປະເທດເດີນທາງເຂົ້າມາທ່ອງທ່ຽວນະຄອນ-ຫຼວງພະບາງ ເພີ່ມຂຶ້ນຫຼາຍເທົ່າ ໂດຍຜ່ານເສັ້ນທາງລົດໄຟລາວ-ຈີນ ເຮັດໃຫ້ບັນຍາກາດການທ່ອງທ່ຽວກັບມາຄືກຄື້ນອີກຄັ້ງ, ຜູ້ປະກອບການທຸລະກິດມີຄວາມເພິ່ງພໍໃຈ ດີໃຈ ໂດຍສະເພາະໃນໄລຍະວັນສຸກ, ເສົາ, ທິດ ຈະມີນັກທ່ອງທ່ຽວເຂົ້າມາຫຼາຍ ເຮັດ​ໃຫ້ການຄ້າຂາຍດີຂຶ້ນຫຼາຍເທົ່າເມື່ອທຽບໃສ່ໃນໄລຍະທີ່ຜ່ານມາ.

ທ່ານ ວັນສະເຫຼີມ ພັກດີສັດຕະຢາກຸນ ຊຶ່ງເປັນນັກທ່ອງທ່ຽວຈາກປະເທດໄທ ໃຫ້ຮູ້ກ່ຽວກັບຄວາມຮູ້ສຶກທີ່ໄດ້ມາທ່ອງທ່ຽວແຂວງຫຼວງພະບາງວ່າ: ພາຍຫຼັງຮູ້ຂ່າວວ່າ ສປປ ລາວ ເປີດປະເທດ ແລະ ໂຄງການລົດໄຟລາວ-ຈີນກໍເປີດໃຫ້ບໍລິການ ຢ່າງເປັນທາງການ ກໍເລີຍຢາກມາລອງຂີ່ລົດໄຟຖືໂອກາດນີ້ທ່ອງທ່ຽວໄປນໍາ ຊຶ່ງການເດີນທາງດ້ວຍລົດໄຟລາວ-ຈີນ ມີຄວາມສະດວກສະບາຍ, ວ່ອງ ໄວ, ສະອາດ, ພະນັກງານຕ້ອນຮັບຢູ່ລົດໄຟກໍໜ້າຮັກ. ເປົ້າໝາຍການເດີນທາງມາທ່ອງທ່ຽວນະຄອນ-ຫຼວງພະບາງ ຊຶ່ງເປັນນະຄອນເກົ່າແກ່ທາງດ້ານວັດທະນະທຳ, ກ່ອນໜ້ານີ້ເປັນເວລາ 10 ປີ ເຄີຍມາທ່ຽວເມືອງຫຼວງພະບາງ ຍ້ອນຄວາມປະທັບໃຈ ມາແລ້ວຢາກກັບຄືນມາທ່ຽວອີກຄັ້ງໜຶ່ງ.

ທ່ານກ່າວໃຫ້ຮູ້ຕື່ມອີກວ່າ: ແຜນການທ່ອງທ່ຽວຄັ້ງນີ້, ນອກຈາກທ່ຽວຢູ່ນະຄອນ-ຫຼວງພະບາງແລ້ວ ຍັງກັບມາທ່ຽວຢູ່ເມືອງວັງວຽງ ແລະ ນະຄອນຫຼວງວຽງຈັນອີກ.

ຂ່າວ-ພາບ: ພູວັນ