ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແຂວງສາລະວັນ ລົງເຜີຍແຜ່ແຜນປັບປຸງຜະລິດຕະພັນທ່ອງທ່ຽວຢູ່ຕາດເລາະ-ຕາດຮັງ ສຳລັບທ້າຍປີ 2022 ແລະ ແຜນປີ 2023 ໄດ້ຈັດຂຶ້ນໃນວັນທີ 7 ມິຖຸນາ ຜ່ານມາ ທີ່ສູນຂໍ້ມູນຂ່າວສານທ່ອງທ່ຽວຕາດເລາະ ຊຶ່ງມີ ທ່ານ ມະໄລວອນ ສີປະເສີດ ຫົວໜ້າພະແນກ ຖວທ ແຂວງ, ມີບັນດາແຂກຖືກເຊີນກ່ຽວຂ້ອງເຂົ້າຮ່ວມ.

ທ່ານ ທິບພະວົງ ສຸວັນນະແພງສີ ຮອງຫົວໜ້າຂະແໜງທ່ອງທ່ຽວພະແນກ ຖວທ ແຂວງ ໄດ້ຜ່ານແຜນການປັບປຸງຜະລິດຕະພັນທ່ອງທ່ຽວຕາດເລາະ-ຕາດຮັງ ສຳລັບທ້າຍປີ 2022 ແລະ ແຜນປີ 2023 ຊຶ່ງແຜນດັ່ງກ່າວຈະມີການປັບປຸງກິດຈະກຳທ່ອງທ່ຽວເຂດຕາດເລາະ-ຕາດຮັງ ເພື່ອຜັນຂະຫຍາຍແຜນຕ້ອນຮັບນັກທ່ອງທ່ຽວຂອງແຂວງ ຕິດພັນກັບເສັ້ນທາງທ່ອງທ່ຽວສີຂຽວ “ເພື່ອຟື້ນຟູການທ່ອງທ່ຽວຕາດເລາະ-ຕາດຮັງໃຫ້ກັບສູ່ການບໍລິການປົກກະຕິ, ສະອາດ-ປອດໄພ ສາມາດຕ້ອນຮັບນັກທ່ອງທ່ຽວ, ເພື່ອສ້າງອາຊີບ, ສ້າງລາຍຮັບ ເຮັດໃຫ້ເສດຖະກິດທ້ອງຖິ່ນມີການຂະຫຍາຍຕົວເທື່ອລະກ້າວ” ໃຫ້ກາຍເປັນຜະລິດຕະພັນທ່ອງທ່ຽວທີ່ໂດດເດັ່ນ ແລະ ປະທັບໃຈນັກທ່ອງທ່ຽວທັງພາຍໃນ ແລະ ຕ່າງປະເທດ, ສ້າງຄວາມເຂັ້ມແຂງໃຫ້ຜູ້ປະກອບການ ແລະ ພະນັກງານບໍລິການ ໂດຍຮູບການສ້າງຕັ້ງເປັນກຸ່ມຜູ້ປະກອບການທຸລະກິດທ່ອງທ່ຽວຕາດເລາະ ແລະ ມີການແຕ່ງຕັ້ງຄະນະຮັບຜິດຊອບທ່ອງທ່ຽວຂັ້ນບ້ານ, ສົ່ງເສີມການມີສ່ວນຮ່ວມຂອງບ້ານ ແລະ ປະຊາຊົນທ້ອງຖິ່ນເຂົ້າໃນກິດຈະກຳທ່ອງທ່ຽວເຊັ່ນ: ການວາງແຜນ, ການອອກແຮງງານ ແລະ ການແບ່ງປັນຜົນປະໂຫຍດ, ສ້າງວຽກເຮັດງານທຳ, ການເຂົ້າຮ່ວມກິດຈະກຳ, ການຍົກລະດັບການບໍລິການຂອງພາກລັດ-ພາກທຸລະກິດໃນການບໍລິການທ່ອງທ່ຽວ, ສ້າງສິ່ງອຳນວຍຄວາມສະດວກໃນຈຸດທ່ອງທ່ຽວເຊັ່ນ: ຈຸດຖ່າຍຮູບ, ຂົວຂ້າມນໍ້າ, ທາງຍ່າງ, ປ້າຍໂຄສະນາ, ປ້າຍແນະນຳ ແລະ ການປັບປຸງພື້ນທີ່, ສ້າງຄວາມປອດໄພແກ່ນັກທ່ອງທ່ຽວ, ແຫຼ່ງທ່ອງທ່ຽວ ແລະ ບ້ານອ້ອມຂ້າງຕາດເລາະ-ຕາດຮັງ, ເພື່ອຄຸ້ມຄອງ ແລະ ແກ້ໄຂບັນຫາຂໍ້ຂັດແຍ່ງພາຍໃນແຫຼ່ງທ່ອງທ່ຽວເຊັ່ນ: ການບຸກລຸກເນື້ອທີ່ດິນ, ການຕັດໄມ້, ຄວາມບໍ່ເຂົ້າໃຈຕໍ່ວຽກງານທ່ອງທ່ຽວ ແລະ ສ້າງລະບຽບການຄຸ້ມຄອງແຫຼ່ງທ່ອງທ່ຽວ, ເພື່ອສ້າງລະບົບລາຍງານ-ສ່ອງແສງ-ຖອດຖອນບົດຮຽນກ່ຽວກັບການຈັດຕັ້ງປະຕິບັດສ້າງຜະລິດຕະພັນທ່ອງທ່ຽວ; ແຫຼ່ງທ່ອງທ່ຽວຕາດເລາະ-ຕາດຮັງຕັ້ງຢູ່ແມ່ນໍ້າເຊເສັດ ເຂດບ້ານແສນວັງ ເມືອງສາລະວັນ ແລະ ບ້ານຂົວເສັດ ເມືອງເລົ່າງາມ ແຂວງສາລະວັນ ເປັນແຫຼ່ງທ່ອງທ່ຽວທີ່ສວຍງາມ, ມີໂຮງແຮມ, ເຮືອນພັກ, ບັງກະໂລ, ຮ້ານອາຫານ, ນຳທ່ຽວ, ຮ້ານກິນດື່ມ, ມີວັດທະນະທຳໂດດເດັ່ນ, ງານປະເພນີໜ້າສົນໃຈ, ສາມາດເຊື່ອມໂຍງທ່ອງທ່ຽວກັບບັນດາເມືອງ ແລະ ພາກໃຕ້ຂອງລາວ, ຈາກນັ້ນຜູ້ເຂົ້າຮ່ວມຍັງໄດ້ຮັບຟັງການຜ່ານເອກະສານນຳທ່ຽວ ແລະ ຜູ້ນຳທ່ຽວ, ເອກະສານເງື່ອນໄຂ-ມາດຖານສະມາຄົມ/ກຸ່ມຜູ້ປະກອບການທຸລະກິດທ່ອງທ່ຽວຕາດເລາະ ແລະ ເອກະສານອື່ນໆ.

ໂອກາດນີ້, ທ່ານ ມະໄລວອນ ສີປະເສີດ ໄດ້ກ່າວເນັ້ນໃຫ້ຜູ້ປະກອບການເຂດແຫຼ່ງທ່ອງທ່ຽວຕາດເລາະ-ຕາດຮັງ ເພີ່ມທະວີຄວາມສະມັກຄີຮ່ວມແຮງຮ່ວມໃຈ, ຈັດຕັ້ງປັບປຸງຜະລິດຕະພັນທ່ອງທ່ຽວຂອງຕົນ ເພີ່ມສີສັນດຶງດູດນັກທ່ອງທ່ຽວ ເພື່ອສ້າງລາຍຮັບໃຫ້ການທ່ອງທ່ຽວຢ່າງຍືນຍົງ.

ຂ່າວ: ກິນດາວັນ ອ້ວນນາຄູ