ຂະແໜງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ເອົາໃຈໃສ່ໂຄສະນາການຈັດຕັ້ງຜັນຂະຫຍາຍວາລະແຫ່ງຊາດ ຢ່າງພົ້ນເດັ່ນຫຼາຍດ້ານ ແຕ່ກໍຍັງມີຂໍ້ຈຳກັດ ເປັນຕົ້ນ ຄວາມຫຍຸ້ງຍາກໃນການເຂົ້າເຖິງແຫຼ່ງຂໍ້ມູນຂ່າວສານ ເນື່ອງຈາກພາກສ່ວນທີ່ກ່ຽວຂ້ອງ ຍັງບໍ່ສາມາດຕອບສະໜອງໄດ້ຕາມຄວາມຕ້ອງການຂອງສັງຄົມ ແລະ ບັນຫາອື່ນໆ ຊຶ່ງຂະແໜງ ຖວທ ກໍໄດ້ວາງ 4 ວິທີການແກ້ໄຂເພື່ອສະເໜີທຸກພາກສ່ວນກ່ຽວຂ້ອງ ແລະ ຈະສືບຕໍ່ປະຕິບັດບັນດາວຽກງານທີ່ກ່ຽວຂ້ອງ.

ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງ ຖວທ ໄດ້ຂຶ້ນຊີ້ແຈງກ່ຽວກັບການໂຄສະນາຜົນຮ້າຍ ແລະ ຄວາມອັນຕະລາຍຂອງຢາເສບຕິດ ຜ່ານສື່ຕ່າງໆ ເພື່ອໃຫ້ປະຊາຊົນເຂົ້າຮ່ວມໃນການຕ້ານຢາເສບຕິດ ຕໍ່ກອງປະຊຸມສະໄມສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ໃນວັນທີ 21 ມິຖຸນາ ນີ້ ພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ.

ທ່ານລັດຖະມົນຕີ ກະຊວງ ຖວທ ໄດ້ກ່າວວ່າ: ເນື້ອໃນຕົ້ນຕໍການໂຄສະນາຜ່ານສື່ມວນຊົນ ແມ່ນການເອົາໃຈໃສ່ໂຄສະນາ ການຈັດຕັ້ງຜັນຂະຫຍາຍວາລະແຫ່ງຊາດ ກ່ຽວກັບການແກ້ໄຂບັນຫາຢາເສບຕິດ ຂອງຂະແໜງການຕ່າງໆ ທັງສູນກາງ ແລະ ທ້ອງຖິ່ນ ຢ່າງກວ້າງຂວາງ ແລະ ຕໍ່ເນື່ອງ, ໂດຍສະເພາະສື່ມວນຊົນ ໄດ້ສູມໃສ່ປະຕິບັດຕາມທິດຊີ້ນໍາຂອງຂັ້ນເທິງ ຕໍ່ກັບການໂຄສະນາການແກ້ໄຂບັນຫາດັ່ງກ່າວນີ້ ຢ່າງເປັນລະບົບ ຊຶ່ງເຫັນວ່າໄລຍະຜ່ານມາ ການແກ້ໄຂບັນຫາຢາເສບຕິດ ແມ່ນພົ້ນເດັ່ນຫຼາຍສົມຄວນ ໃນນັ້ນສື່ມວນຊົນ ກໍຄື ໄດ້ອອກໂຄສະນາ ບັນດາເນື້ອໃນຕົ້ນຕໍ ເຊັ່ນ: ໄດ້ອອກໂຄສະນາເຕືອນສະຕິ, ສຶກສາອົບຮົມໃຫ້ສັງຄົມກໍຄືປະຊາຊົນ, ຊາວໜຸ່ມ ແລະ ເຍົາວະຊົນ ໄດ້ຮັບຮູ້ ເຂົ້າໃຈຜົນຮ້າຍຂອງຢາເສບຕິດ ໂດຍອອກເປັນບົດຂ່າວ, ບົດແນະນໍາ, ບົດສຶກສາອົບຮົມ, ບົດເລື່ອງ ຄໍາຂວັນ, ຜະລິດ ຫົວຂໍ້ໂຄສະນາລາຍການຜ່ານວິທະຍຸ-ໂທລະໂຄ່ງ, ໂທລະພາບ, ໜັງສືພິມ ແລະ ສື່ສັງຄົມອອນລາຍ ຊຶ່ງຕາມພາລະບົດບາດຂອງສື່ ກໍແມ່ນໄດ້ມອບໃຫ້ສື່ມວນຊົນ ປກສ ເປັນຜູ້ລົງເລິກ, ເປັນເຈົ້າການໃນການໂຄສະນາວຽກງານດັ່ງກ່າວນີ້. ສ່ວນສື່ມວນຊົນອື່ນ ກໍນໍາເອົາບັນຫາດັ່ງກ່າວນີ້ໄປເຜີຍແຜ່ຕໍ່.

ນອກນີ້, ກໍໄດ້ອອກໂຄສະນາການແກ້ໄຂບັນຫາການຄ້າຂາຍຢາເສບຕິດ ໂດຍອອກຂ່າວຕາມເຫດການຂອງເຈົ້າໜ້າທີ່ ທີ່ກ່ຽວຂ້ອງ ເປັນຕົ້ນການຈັບກຸມຜູ້ຂົ່ນສົ່ງ, ຜົນການສືບສວນ-ສອບສວນ, ການຖະແຫຼງຂ່າວຂອງເຈົ້າໜ້າທີ່ ແລະ ການດໍາເນີນຄະດີໃນແຕ່ລະຄັ້ງ; ໄດ້ອອກໂຄສະນາການລົງເຄື່ອນໄຫວວຽກງານຂອງການນໍາພັກ-ລັດ ແລະ ເຈົ້າໜ້າທີ່ ທີ່ກ່ຽວຂ້ອງ ຢູ່ສູນກາງ ແລະ ທ້ອງຖິ່ນ ໃນການຊຸກຍູ້ການຈັດຕັ້ງປະຕິບັດແຜນວາລະແຫ່ງຊາດ ກໍຄື ການແກ້ໄຂບັນຫາຢາເສບຕິດ ຢ່າງ ກວ້າງຂວາງ ແລະ ຕໍ່ເນື່ອງ; ໄດ້ຕິດຕາມ ເກັບກໍາບັນຫາຫາງສຽງສັງຄົມ ຜ່ານສື່ສັງຄົມອອນລາຍ ກ່ຽວກັບບັນຫາທີ່ພົ້ນເດັ່ນ ໃນນັ້ນກໍ ແມ່ນບັນຫາການແກ້ໄຂຢາເສບຕິດ ໂດຍເຮັດເປັນບົດລາຍງານປະຈໍາວັນໃຫ້ການນໍາ ແລະ ພາກສ່ວນ ທີ່ກ່ຽວຂ້ອງຮັບຊາບ.

ແຕ່ເຖິງຢ່າງໃດກໍຕາມ, ວຽກງານດັ່ງກ່າວກໍຍັງມີຂໍ້ຫຍຸ້ງຍາກຊຶ່ງທ່ານລັດຖະມົນຕີກະຊວງ ຖວທ ໄດ້ຊີ້ແຈງໃຫ້ເຫັນວ່າ: ສື່ມວນຊົນທາງການ ຍັງມີຄວາມຫຍຸ້ງຍາກໃນການເຂົ້າເຖິງແຫຼ່ງຂໍ້ມູນຂ່າວສານ ເນື່ອງຈາກພາກສ່ວນທີ່ກ່ຽວຂ້ອງ ຍັງບໍ່ສາມາດຕອບສະໜອງໄດ້ຕາມຄວາມຕ້ອງການຂອງສັງຄົມ; ບັນຫາການຄວບຄຸມການໃຊ້ສື່ສັງຄົມອອນລາຍ ເຫັນວ່າຍັງມີຄວາມຫຍຸ້ງຍາກພໍສົມຄວນ ຊຶ່ງໄລຍະຜ່ານມາ ເຈົ້າໜ້າທີ່ທາງການຍັງບໍ່ທັນໄດ້ຖະແຫຼງຂ່າວ ແຕ່ບຸກຄົນ ຫຼື ຜູ້ໃຊ້ສື່ອອນລາຍສ່ວນຕົວ ໄດ້ກະຈາຍພາບ ແລະ ຂໍ້ມູນ ອອກສູ່ສື່ສັງຄົມອອນລາຍ ເຮັດໃຫ້ສັງຄົມເກີດມີການວິພາກວິຈານໄປຫຼາຍແງ່ມູມ; ພາຫະນະ ແລະ ອຸປະກອນຮັບໃຊ້ສື່ມວນຊົນ ຍັງບໍ່ທັນພຽງພໍຕາມຄວາມຕ້ອງການໃນວຽກງານຕົວຈິງ ເຮັດໃຫ້ການອອກໂຄສະນາບາງຄັ້ງບໍ່ທັນຕາມສະພາບການ; ຄວາມຈໍາກັດທາງດ້ານບຸກຄະລາກອນສື່ມວນຊົນທີ່ມີວິຊາສະເພາະດ້ານສື່; ຂ່າວກ່ຽວກັບຢາເສບຕິດ ຕ້ອງໄດ້ລໍຖ້າຈາກ ກະຊວງ ປກສ ເຮັດໃຫ້ການອອກຂ່າວບາງຄັ້ງບໍ່ສາມາດຕອບສະໜອງໄດ້ທັນເວລາ.

ຕໍ່ບັນຫານີ້, ຂະແໜງ ຖວທ ໄດ້ວາງ 4 ວິທີການແກ້ໄຂເພື່ອເຮັດໃຫ້ການໂຄສະນາໃຫ້ແກ່ການຈັດຕັ້ງປະຕິບັດວາລະແຫ່ງຊາດ ກ່ຽວກັບການແກ້ໄຂບັນຫາຢາເສບຕິດ ໃຫ້ກວ້າງຂວາງ ແລະ ເປັນລະບົບ, ຕໍ່ເນື່ອງ ກໍຄື ເພື່ອສ້າງຈິດສໍານຶກໃຫ້ສັງຄົມ ກໍຄືປະຊາຊົນ ມີສ່ວນຮ່ວມ, ເປັນເຈົ້າການ ຕ້ານຢາເສບຕິດ ຊຶ່ງ ກະຊວງ ຖວທ ໄດ້ສະເໜີບາງບັນຫາຕົ້ນຕໍ ດັ່ງນີ້: 1). ແຕ່ລະຂະແໜງການ ແລະ ເຈົ້າໜ້າທີ່ ທີ່ກ່ຽວຂ້ອງໂດຍສະເພາະ ປກສ ທີ່ໄດ້ຮັບຂໍ້ມູນ ຄວນໄດ້ໃຫ້ການຮ່ວມ ມືກັບສື່ມວນຊົນທາງການ ຂອງພວກເຮົາຕື່ມ ໃນການສະໜອງຂໍ້ມູນ ເພື່ອໃຫ້ສື່ມວນຊົນນໍາໄປໂຄສະນາຜ່ານສື່ມວນຊົນ ໃຫ້ທັນເວລາ; 2). ການກະຈາຍຂໍ້ມູນສູ່ສື່ສັງຄົມອອນລາຍ ແຕ່ລະພາກສ່ວນ ຕ້ອງໄດ້ເປັນເຈົ້າການຮ່ວມກັນ ເພື່ອຮັບປະກັນການ ຮົ່ວໄຫຼ່ຂໍ້ມູນທີ່ບໍ່ເປັນທາງການ ຫຼື ຂ່າວທີ່ບິດເບືອນຄວາມຈິງ; 3). ຄວນມີຮູບການຜະລິດສາລະຄະດີສັ້ນ ເຊັ່ນ: ສາລະຄະດີສັ້ນ, ລະຄອນ ແລະ ໂຄສະນາອອກເປັນພາສາເຜົ່າ (ເຜົ່າມົ້ງ, ເຜົ່າກຶມມຸ) ແລະ 4). ລັດຕ້ອງລົງທຶນວຽກງານໂຄສະນາການແກ້ໄຂບັນຫາດັ່ງກ່າວນີ້ຕື່ມ.

ນອກນີ້, ໃນຕໍ່ໜ້າ ກໍຕ້ອງໄດ້ສືບຕໍ່ໂຄສະນາເນື້ອໃນຕົ້ນຕໍ ເປັນຕົ້ນ ສືບຕໍ່ໂຄສະນາຊຸກຍູ້ການຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຢູ່ສູນກາງ ແລະ ທ້ອງຖິ່ນ ຢ່າງເປັນລະບົບ, ຕໍ່ເນື່ອງ; ສືບຕໍ່ຂະຫຍາຍຕາຂ່າຍໂທລະໂຄ່ງ ເພື່ອນໍາໃຊ້ເປັນພາຫະນະໂຄສະນາໃຫ້ໄປເຖິງເຂດຫາງໄກສອກຫຼີກຕື່ມ. ສືບຕໍ່ອອກໂຄສະນາສຶກສາອົບຮົມ, ເຕືອນສະຕິສັງຄົມ ກໍຄືຊາວໜຸ່ມ, ເຍົາວະຊົນ ໃຫ້ຮັບຮູ້, ເຂົ້າໃຈ ຜົນຮ້າຍ ຂອງຢາເສບຕິດ ດ້ວຍຮູບແບບຕ່າງໆ ເປັນຕົ້ນອອກບົດແນະນໍາ, ບົດສຶກສາອົບຮົມ ແລະ ນິຕິກໍາອື່ນໆທີ່ກ່ຽວຂ້ອງ; ສືບຕໍ່ໂຄສະນາການດໍາເນີນຄະດີຜູ້ຄ້າຂາຍຢາເສບຕິດ, ຜ່ານການຖະແຫຼງຂ່າວຂອງເຈົ້າໜ້າທີ່ໆກ່ຽວຂ້ອງ ໃນແຕ່ລະໄລຍະ; ສືບຕໍ່ໂຄສະນາກິດຈະກໍາ ແລະ ຂະບວນການຕ່າງໆ ໃນການຕ້ອນຮັບວັນຕ້ານຢາເສບຕິດແຫ່ງຊາດ ແລະ ວັນ ຕ້ານຢາເສບຕິດສາກົນ; ສືບຕໍ່ຕິດຕາມບັນຫາຫາງສຽງສັງຄົມ ຜ່ານສື່ສັງຄົມອອນລາຍ ທີ່ຕິດພັນກັບການແກ້ໄຂບັນຫາຢາເສບຕິດ ເພື່ອສັງລວມລາຍງານໃຫ້ພາກສ່ວນທີ່ກ່ຽວຂ້ອງຮັບຊາບ.

(ຂ່າວ: ບຸນອູ້ມ, ພາບ: ບຸນຕອມ)