ຜົນສຳເລັດຂອງກອງປະຊຸມໃຫຍ່ ຄັ້ງທີ VII ຂອງຜູ້ແທນອົງຄະນະພັກເມືອງທຸລະຄົມ

ເຜີຍ​ແຜ່​ໂດຍ​: siththiphone rasphone ເວ​ລາ: 27/02/2020 09:34:16 ຈຳ​ນວນ​​ຢ້ຽມ​ຊົມ 452 ຄັ້ງ

   ເພື່ອອຸທິດໃຫ້ແກ່ວັນສຳຄັນຂອງພັກ, ຂອງຊາດ ຕະຫຼອດປີ 2020, ໜັງສືພິມ ປະຊາຊົນ ໄດ້ຈັດພິມຄໍລຳ ສະເໜີມູນເຊື້ອ, ຜົນງານການນຳ ພາຂອງພັກໃນການຕໍ່ສູ້ປົດປ່ອຍຊາດ ພ້ອມດ້ວຍຜົນງານການປົກປັກຮັກສາ ແລະ ສ້າງສາປະເທດຊາດ ພາຍໃຕ້ການນຳພາຂອງພັກ ປປ ລາວ ຕະຫຼອດ 65 ປີ ຜ່ານມາ, ໂດຍຈະຈັດພິມໃນທຸກໆວັນລັດຖະການ 

 ກອງ​ປະຊຸມ​ໃຫຍ່​ ຄັ້ງ​ທີ  VII ຂອງ​ຜູ້​ແທນ​ອົງຄະ​ນະ​ພັກ​ເມືອງ​ທຸລະຄົມ​ໄດ້​ເປີດ​ຂຶ້ນ ​ແລະ ​ປິດລົງ​ດ້ວຍ​ຜົນສຳເລັດ​ໃນ​ລະຫວ່າງ​ວັນ​ທີ 24-25 ກຸມພາ ຜ່ານ​ມາ ທີ່​ສະໂມສອນ​ເມືອງ​ດັ່ງກ່າວ​ໂດຍ​ການ​ເປັນ​ປະທານ​ຂອງ​ສະຫາຍ ນາງ  ວົງ​ເດືອນ ວັດຕະ​ໂສ ວ່າການ​ເລຂາ​ພັກ​ເມືອງ ວ່າການ​ເຈົ້າເມືອງໆ​ທຸລະ​ຄົມ. ເປັນ​ກຽດ​ເຂົ້າ​ຮ່ວມ​ຂອງ ສະຫາຍ ຄຳ​ພັນ ສິດທິ​ດຳ​ພາ ກຳມະການ​ສູນ​ກາງ​ພັກ ເລຂາ​ພັກ​ແຂວງ​ ເຈົ້າແຂວງໆ​ວຽງ​ຈັນ, ມີ​ຄະນະ​ຊີ້​ນຳ​ກອງ​ປະຊຸມ​ຂັ້ນ​ແຂວງ, ອະດີດ​ການ​ນຳ​ຂອງ​ເມືອງ, ພະນັກງານ​ອາວຸໂສ, ບຳນານ​ຂອງ​ເມືອງ, ມີ​ບັນດາ​ຜູ້​ແທນ​ສົມບູນ​ເຂົ້າ​ຮ່ວມ 136 ສະຫາຍ ຍິງ 34 ສະຫາຍ ຊຶ່ງ​ເປັນ​ຕົວ​ແທນ​ໃຫ້​ແກ່​ສະມາຊິກ​ພັກ​ທົ່ວ​ເມືອງ​ທັງ​ໝົດ 2.015 ສະ​ຫາຍ.  
   ກອງປະຊຸມໃຫຍ່ຜູ້ແທນ ​ອົງຄະນະພັກເມືອງທຸລະຄົມ ​ຄັ້ງ​ທີ VII ໄດ້​ລົງ​ປະຊາ​ມະຕິ​ຮັບຮອງບົດລາຍງານການ ເມືອງ, ແຜນ​ພັດທະນາ​ເສດ​ຖະ​ກິດ​-​ສັງຄົມ, ບົດ​ສຳຫຼວດ​ການ​ນຳພາ​ລວມ​ຂອງ​ຄະນະ​ພັກ​ຊຸດ​ເກົ່າ​ຮັບຮອງ​ເອົາ​ແຜນ ການ​ແຕ່​ປີ 2020-2024 ຊຶ່ງ​ໄດ້​ເອກະ​ພາບ​ກັນ​ສູ້​ຊົນ​ຫັນເອົາ​ ແນວທາງ​ປ້ອງ​ກັນ​ຊາດ​-​ປ້ອງ​ກັນ​ຄວາມ​ສະຫງົບ​ເປັນ​ຂອງ​ທົ່ວ​ປວງ​ຊົນ​ຮອບດ້ານ​ຂອງ​ພັກ, ສ້າງ​ກໍາ​ລັງ​ປະກອບ​ອາ ວຸດ​ໃຫ້​ມີ​ຄວາມ​ໜັກແໜ້ນເຂັ້ມ ແຂງ​ໃນ​ທຸກ​ດ້ານ, ສ້າງ​ບ້ານ ​ປ້ອງ​ກັນ​ຊາດ​ເຂັ້ມແຂງ ​ແລະ​ບ້ານ​ປ້ອງ​ກັນ​ຄວາມ​ສະຫງົບ​ດີ​ໃຫ້​ຫຼາຍ​ຂຶ້ນ, ສູ້​ຊົນ​ໃຫ້​ເສດ ຖະກິດ​ຂອງ​ເມືອງ​ມີ​ການ​ຂະ ຫຍາຍຕົວ​ຢ່າງ​ຕໍ່​ເນື່ອງ, ໝັ້ນ​ທ່ຽງ ​ແລະ​ ຖືກ​ທິດ, ສົ່ງເສີມການ ​ຜະລິດ​ສິນຄ້າ​ຕາມ​ແລວ​ເສດ ຖະກິດ 443 ທີ່​ແຂວງ​ວາງອອກ​ ແລະ​ ຕາມ 3 ແລວ​ທີ່​ເມືອງ​ວາງ​ອອກ, ສືບຕໍ່​ພັດທະນາ​ເມືອງ​ໃຫ້​ເປັນ​ເມືອງ​ທາງ​ຜ່ານ​ຕິດ​ພັນກັບການທ່ອງທ່ຽວ​ແລະ ​ການ​ບໍລິການ, ເຮັດໃຫ້ ການ​ຂະຫຍາຍຕົວ​ຂອງ​ເສດ ຖະກິດ​ຢູ່​ໃນ​ລະດັບ 8% ຕໍ່​ປີ, ສະເລ່ຍ​ລາຍ​ຮັບ​ຕໍ່​ຫົວ​ຄົນ​ໃຫ້​ໄດ້​ຜູ້​ລະ 25.970.000 ກີບ​ຕໍ່​ຄົນ​ຕໍ່​ປີ, ຜະລິດ​ເຂົ້າເປືອກ​ໃຫ້​ບັນລຸ 1.512 ກິໂລ​ຕໍ່​ຄົນ​ຕໍ່​ປີ, ພັດທະນາ​ຂົງເຂດ​ວັດທະນະ​ທຳ​-​ສັງຄົມ​ໃຫ້​ໄປ​ສູ່​ຄຸນ​ນະ​ພາບ​ໃໝ່.
   ຜູ້​ແທນ​ກອງ​ປະຊຸມ​ໄດ້​ນຳ​ໃຊ້​ສິດ​ປະຊາທິປະໄຕ​ຂອງ​ຕົນ​ປ່ອນ​ບັດ​ຄັດ​ເລືອກ ເອົາ​ຄະນະ​ບໍລິຫານ​ງານ​ພັກ​ເມືອງ​ຊຸດ​ໃໝ່ ຊຶ່ງ​ມີ​ຜູ້​ຮັບ​ສະ ໝັກ​ເລືອກ​ຕັ້ງ 27 ສະຫາຍ, ຍິງ 6 ສະຫາຍ, ເລືອກ​ເອົາ 23 ສະຫາຍ ຍິງ 4 ສະຫາຍ; ກອງ​ປະຊຸມ​ຄັ້ງ​ປະຖົມ​ມະ​ລືກ​ໄດ້​ເລືອກ​ເອົາ​ຄະນະ​ປະຈຳ​ພັກ​ເມືອງ​ຈຳນວນ 7 ສະຫາຍ ຍິງ 2 ສະຫາຍ,ເລືອກ​ເອົາສະຫາຍ ນາງ ວົງ​ເດືອນ ວັດຕະ​ໂສ ເປັນ​ເລຂາ​ພັກ​ເມືອງ, ເລືອກ​ເອົາ ສະຫາຍ ບຸນ​ທັບ ວົງ​ໄຊ ແລະ​ສະຫາຍ ບຸນ​ເລີດ ສີ​ຫາ​ປັນຍາ ເປັນ​ຮອງ ເລຂາ​ພັກເມືອງ, ເລືອກ​ເອົາ ສະຫາຍ ບຸນ​ເລີດ ສີ​ຫາ​ປັນຍາ ເປັນ​ປະທານ​ກວດ ກາ, ສະຫາຍ ນາງ ລັດສະໝີ ໄຊຊະນະ​ວົງ ແລະ ສະຫາຍ ວົງ​ສະຫວັນ ອຸໄທ​ວັນ ເປັນ​ຮອງ​ປະທານ​ກວດກາ.
   ກອງ​ປະຊຸມ​ຄັ້ງ​ນີ້​ຍັງ​ໄດ້​ຮັບ​ຟັງ​ການ​ໂອ້​ລົມ​ຈາກ ສະ ຫາຍ ຄຳ​ພັນ ສິດທິ​ດຳ​ພາ ຊຶ່ງ​ສະຫາຍ​ໄດ້​ສະແດງ​ຄວາມຍ້ອງ ຍໍ​ຊົມເຊີຍ​ຕໍ່​ຜົນງານ​ທີ່​ຄະນະ​ພັກ​ເຮັດ​ໄດ້​ໃນ​ໄລຍະ​ຜ່ານ​ມາ, ພ້ອມ​ນີ້​ສະຫາຍ​ຍັງ​ໄດ້​ຊີ້​ນຳ​ໃຫ້ຄະນະ​ພັກ​ຊຸດ​ໃໝ່​ເຊີດ​ຊູ​ຄວາມ​ຮັບຜິດຊອບ​ເພື່ອ​ເຮັດ​ສຳ ເລັດ​ໜ້າທີ່​ຜູ້​ແທນ​ກອງ​ປະຊຸມ​ໄດ້​ມອບ​ໝາຍ​ໃຫ້​ເພື່ອ​ເຮັດ ແນວໃດ​ໃຫ້​ເມືອງ​ທຸລະຄົມ​ມີ​ການ​ສ້າງສາ​ພັດທະນາ​ດີ​ຂຶ້ນ​ເລື້ອຍໆ.
 (ຂ່າວ: ພູ​ຂອງ) 


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110