ໂດຍ: ວັນເພັງ

ເລີ່ມແຕ່ ສປປ ລາວ ເປີດປະເທດ ແລະ ຜ່ອນຜັນບາງມາດຕະການ ປ້ອງກັນການຕິດເຊື້ອພະຍາດ ໂຄວິດ-19 ເຮັດໃຫ້ນັກທ່ອງທ່ຽວທັງພາຍໃນໄດ້ໄປທ່ອງທ່ຽວບັນດາແຂວງຕ່າງໆ ແລະ ນັກທ່ອງທ່ຽວຕ່າງປະເທດ ກໍໄດ້ເດີນທາງເຂົ້າມາທ່ອງທ່ຽວຢູ່ສະຖານທີ່ທ່ອງທ່ຽວຕ່າງໆໃນຂອບເຂດທົ່ວປະເທດ ໃນນັ້ນກໍມີນັກທ່ອງທ່ຽວຕ່າງ ປະເທດຈຳນວນຫຼາຍເຂົ້າມາທ່ອງທ່ຽວ ສປປ ລາວ ນັບມື້ນັບຫຼາຍຂຶ້ນ ​ນັກທ່ອງທ່ຽວຕາງກໍຮູ້ສຶກດີໃຈຫຼາຍທີ່ ໄດ້ມີໂອກາດມາທ່ຽວ​ ສປປ ລາວ.​

ເມື່ອບໍ່ດົນມານີ້ຜູ້ຂຽນໄດ້ມີໂອກາດສຳພາດ ທ່ານ ວຸດ ໜຶ່ງໃນນັກທ່ອງທ່ຽວຈາກປະເທດໄທ ທີ່ເຂົ້າ ມາທ່ອງທ່ຽວລາວ ວ່າ: ຕົນເອງໄດ້ມາທ່ຽວ ສປປ ​ລາວ​ ເປັນຄັ້ງທຳອິດຮູ້ສຶກດີໃຈ ແລະ ພາກພູມໃຈຫຼາຍ ຊຶ່ງ ໄດ້ຮູ້ໄດ້ເຫັນຫຼາຍສິ່ງຢ່າງ ແລະ​ ສປປ​ ລາວ ເປັນປະເທດທີ່ອຸດົມສົມບູນໄປດ້ວຍຊັບພະຍາກອນທຳມະຊາດ, ມີແຫຼ່ງທ່ອງທ່ຽວທາງທຳມະຊາດທີ່ສວຍສົດງົດງາມເຕັມໄປດ້ວຍພູຜາປາໄມ້, ພ້ອມນັ້ນຍັງມີແຫຼ່ງທ່ອງທ່ຽວທາງດ້ານ ປະຫວັດສາດ, ວັດທະນະທຳ ວັດວາອາຮາມອັນເກົ່າແກ່ທີ່ສວຍງາມ, ມີພາສາປາກເວົ້າທີ່ຄ້າຍຄືກັນ ເຮັດໃຫ້ສື່ ສານກັນເຂົ້າໃຈກັນງ່າຍ, ເດີນທາງໄປທາງໃດກໍມີຄວາມສະດວກສະບາຍ ໄດ້ມາທ່ຽວແລ້ວຮູ້ສຶກຜ່ອນຄ້າຍ, ຮູ້ສຶກ ປອດໄພ. ພ້ອມກັນນີ້, ການໃຫ້ບໍລິການຢູ່ບັນດາສະຖານທີ່ທ່ອງທ່ຽວ ແມ່ນມີຄວາມສະດວກສະບາຍ, ບໍລິການດີ ສ້າງຄວາມປະທັບໃຈມາແລ້ວຢາກມາອີກ. ໂດຍສະເພາະນະຄອນຫຼວງວຽງຈັນ ກໍມີຫຼາຍສະຖານທີ່ທ່ອງທ່ຽວທີ່ ສວຍງາມໜ້າທ່ຽວຊົມ ເປັນຕົ້ນ ພະທາດຫຼວງວຽງຈັນ, ປະຕູໄຊ, ແຄມຂອງ, ວັດວາອາຮາມ ແລະ ສະຖານ ທີ່ອື່ນໆ, ຫຼັງຈາກນັ້ນທີມງານຈະເດີນທາງໄປທ່ອງທ່ຽວຢູ່ເມືອງວັງວຽງ ໂດຍຂຶ້ນລົດໄຟລາວ-ຈີນ. ຂະນະດຽວກັນ, ທ່ານ​ ນາງ ໝີນ້ອຍ ໄກ້ນຳທ່ຽວນັກທ່ອງທ່ຽວໄທ ຍັງໃຫ້ຮູ້ວ່າ: ການນຳພານັກທ່ອງທ່ຽວມາທ່ຽວ ສປປ​ ລາວ​ ໃນຄັ້ງ ນີ້ມີຄວາມສະດວກສະບາຍຫຼາຍ ເນື່ອງຈາກວ່າ ສປປ ລາວ ຫາກໍເປີດປະເທດ ນັກທ່ອງທ່ຽວຍັງບໍ່ຫຼາຍຖ້າທຽບ ໃສ່ໄລຍະກ່ອນມີການລະບາດພະຍາດໂຄວິດ - 19, ການບໍລິການຢູ່ດ່ານຍັງມີບາງຢ່າງຢາກໃຫ້ປັບປຸງ ຄືການບໍລິ ການໃຫ້ໄວ ແລະ ມີລະບົບທັນສະໄໝ ບ່ອນຮອງຮັບຕ່າງໆສຳລັບນັກທ່ອງທ່ຽວໃຫ້ຫຼາຍຂຶ້ນ ເນື່ອງຈາກໃນ ຕໍ່ໜ້າເຊື່ອວ່າຈະມີນັກທ່ອງທ່ຽວເຂົ້າມາຫຼາຍ.

ທ່ານ​ ສົມພອນ​ ລາວນໍຢາ ພະນັກງານຂາຍປີ້ທັງເປັນພະນັກງານນຳທ່ຽວ ປະຈຳສະຖານທີ່ທ່ອງທ່ຽວ ພະ ທາດຫຼວງວຽງຈັນ ໃຫ້ຮູ້ວ່າ: ນັກທ່ອງທ່ຽວຕ່າງປະທດເລີ່ມເຂົ້າມາທ່ຽວພະທາດຫຼວງວຽງຈັນຫຼາຍຂຶ້ນ ສ່ວນຫຼາຍ ແມ່ນນັກທ່ອງທ່ຽວມາຈາກໄທ,​ ຫວຽດນາມ,​ ຈີນ,​ ເກົາຫຼີ​ ມາເປັນທີມ,​​ ຄອບຄົວ,​ ໝູ່ຄູ່ ມາກາບໄຫວ້, ​ຂໍ​ພອນ,​ ຖ່າຍຮູບ​ ແລະ​ ອື່ນໆ.