ຫົວ​ຂໍ້ : ສ.ເກົາຫຼີ ພົບຜູ້ປ່ວຍ COVID-19 ເກີນ 1.000 ຄົນ

ເຜີຍ​ແຜ່​ໂດຍ​: ທ່ານ ສ.ຜາບມີໄຊ ເວ​ລາ: 27/02/2020 10:26:24 ຈຳ​ນວນ​ຜູ້​ເຂົ້າ​ຢ້ຽມ​ຊົມ 335 ຄັ້ງ

  ຂ່າວຕ່າງປະເທດລາຍງານ ວັນທີ 26 ກຸມພາຜ່ານມາ, ສູນຄວບຄຸມ ແລະ ປ້ອງກັນໂຣກຂອງ ສ.ເກົາຫຼີ (KCDC) ໄດ້ລາຍງານສະຖານະການເຊື້ອໄວຣັສ COVID-19 ໃນ ສ.ເກົາຫຼີ ຢືນຢັນພົບຜູ້ປ່ວຍລາຍໃໝ່ອີກ 169 ຄົນ, ເພີ່ມຈຳນວນຜູ້ຕິດເຊື້ອສະສົມໃນປະເທດເປັນຢ່າງໜ້ອຍ 1.146 ຄົນ, ນັບຕັ້ງແຕ່ທ້າຍເດືອນມັງກອນທີ່ຜ່ານມາ. ຂະນະທີ່ຜູ້ເສຍຊີວິດເພີ່ມຂຶ້ນ 11 ຄົນ.

  ບົດລາຍງານຂອງ KCDC ລະບຸວ່າ: ເມືອງໃຫຍ່ເກືອບທຸກແຫ່ງໃນ ສ.ເກົາຫຼີ ພົບຜູ້ປ່ວຍດ້ວຍໂຣກ COVID-19. ເຖິງຢ່າງໃດກໍຕາມ, ພື້ນທີ່ວິກິດ ຫຼື ສູນກາງການແຜ່ລະບາດຂອງເຊື້ອໄວຣັດ COVID-19 ໃນປະເທດຍັງຄົງຢູ່ທີ່ໂຮງໝໍແດນຳ ໃນເມືອງຊັອງໂດ ແລະ ໂບດຂອງລັດທິຊິນຊອນຈິ ໃນເມືອງແທກູເມືອງໃຫຍ່ອັນດັບທີ ຂອງປະເທດ. ອີກຢ່າງໜຶ່ງ, ເມືອງທັງສອງແຫ່ງຕັ້ງຢູ່ທາງພາກຕາເວັນອອກ ຊຶ່ງລັດຖະບານ ສ.ເກົາຫຼີ ໄດ້ປະກາດເມື່ອທ້າຍອາທິດທີ່ຜ່ານມາວ່າ: ໃຫ້ທັງສອງເມືອງຢູ່ພາຍໃຕ້ຄຳສັ່ງບໍລິຫານຈັດການພິເສດດ້ານສາທາລະນະສຸກ ແລະ ຍົກລະດັບການເຕືອນໄພດ້ານສາທາລະນະສຸກໃນປະເທດເປັນສີແດງ ຊຶ່ງເປັນລະດັບສູງສຸດ. ຂະນະທີ່ KCDC ກຽມກວດພະຍາດຕໍ່ສະມາຊິກໃນລັດທິຊິນຊອນຈິ ທົ່ວປະເທດ. ອີງຕາມການລາຍງານ ມີຈຳນວນຫຼາຍເຖິງ 215.000 ຄົນ.

  ຂະນະດຽວກັນ, ທ່ານ ມູນແຈອິນ ປະທານາທິບໍດີ ສ.ເກົາຫຼີ  ໄດ້ລົງພື້ນທີ່ເມືອງແທກູ ເພື່ອໃຫ້ກຳລັງໃຈບຸກຄະລາກອນທາງການແພດ ແລະ ປຶກສາຫາລືກັບບັນດາການນໍາທ້ອງຖິ່ນກ່ຽວກັບຄວາມຊ່ວຍເຫຼືອຈາກສູນກາງ ໃນການຄວບຄຸມການແຜ່ລະບາດຂອງເຊື້ອໄວຣັດ COVID-19 ໂດຍປະກາດເປົ້າໝາຍຕ້ອງຢຸດຕິການແຜ່ລະບາດຂອງເຊື້ອໂຣກໃຫ້ໄດ້ພາຍໃນ 4 ອາທິດ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110